到底坤哥係唔係得罪左TV Buddy呀?

(原載於:姐死姐還在

10277900_306873466187666_2830721040352121208_n

 

11月19日我一心打算睇Wiki Wong,奈何load 左一世都load 唔到,我搓到個F5冇哂生命力都睇唔到。同一時間,我屋企人一如以往睇TBB台慶,其間我阿媽笑住咁叫我出廳,話有條友好好笑,叫我立即出黎齊齊取笑佢,個條友就係坤哥。

當我睇到個畫面,見到坤哥同另一個我連名都講唔出但熟口熟面嘅演員,好似迪迪尼樂園公仔咁,行到成隻企鵝咁扮一粒棋,我真係覺得TBB 好冇人性。點解唔搵個茄哩啡扮粒棋,點解會選中坤哥?到底坤哥係唔係得罪左TV Buddy呀?到我10 點再出廳,見到坤哥仲扮緊粒棋,呢個世界真係沒有最仆街,只有更仆街,有冇需要扮一粒棋扮一個晚上。

我又諗返起,小學個時,我比個仆街MISS揀中左做馬槽故事嘅一棵樹。我諗所有嘅唔開心都源自比較,當我以為我同其他同學係平等嘅時候,我竟然係一棵完全發揮唔到演技嘅樹,仲要平時蝦我個死肥仔都有得扮綿羊,起碼都有得郁呀。所以我真係好明白當坤哥見到其他巨聲朋友仔扮到成隻雀嘅心情,你叫我點平伏心情呀。

 

————————————————————————————–

 

TBB 冇人性實錄:

TBB冇人性的確街知巷聞, TBB冇人性嘅慘案多不勝數,例如獎門人玩揸lift 嘅阿夢,著短裙又要fing 人落地。美女廚房D 美女著低胸,又要邊夾事業線邊夾餸比班咸濕主持睇。又例如東華呢秒呼籲人為善最樂,下part 就叫吳剛食炭。你永遠估唔到佢可以幾咁無人性,簡直將無人性呢件事發揮得淋漓盡致。

 

————————————————————————————–

 

坤哥做粒棋之無力向上流嘅社會啟示:

 

作為一個長期比人壓搾嘅員工,我係完全估到TBB高層係點同坤哥講要佢做粒棋呢單野。

「公司其實真係比好多機會比唔同員工,雖然係一粒棋,但你諗下周星星都扮過衙差啦。粒棋全晚爆光率好高,其實係益你。你連粒棋都做唔好,我點比你做其他更重要嘅工作,就算係一粒棋,你都要做一粒有個性嘅棋,將粒棋演繹出有靈魂一樣。」

我完全了解D 無人性嘅公司係點將所有唔合理嘅事合理化。好似我阿姐成日叫我OT 都會話:「OT 即係比多D 機會你學多D,返工有得學野唔係間間公司都有架」,阿姐又會話:「你做野效率真係同姚明咁高,所以我決定比更多野你做」

 

有網民話坤哥留喺TBB 浪費青春,不如去HKTV。坤哥扮粒棋呢件事唔係東家唔打打西家就解決到,呢件事完全係反應到香港電視市場窄,TBB嘅長期壟斷迫使三四線嘅演出者完全冇上流嘅空間。

今日終於有人討論坤哥扮棋嘅慘劇,有娛記報導表示同情,亦有人話台慶版面都比哂王祖藍,坤哥好唔抵。我作為一個扮個樹嘅過來人,我就寧願呢一世都冇人記得呢個悲劇,真係唔想再比人恥笑,奈何,有發生過的,即使冇人提起,自己諗起都隱隱心絞痛。

 

PS. 我想特別提一提台慶當晚除左坤哥,仲有何遠東扮演棋,何遠東畢業於香港演藝學院戲劇學院,並於2014年憑《華佗六頂記》獲得第二十三屆香港舞台劇獎提名最佳男主角。講到呢到,係唔係覺得TBB對表演者欠了一份尊重。

 

作者:姐死姐還在

姐死姐還在
我叫奴隸獸,任職大公司極小職員,日日比阿姐政治迫害,深明「姐姐不盡」的真諦,以「你睇我唔到⋯⋯」為每日工作目標。 「姐死姐還在」fb page

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 91473
Date: 2014-11-21 14:41:23
Generated at: 2020-12-06 06:12:32
Permalink: https://www.vjmedia.com.hk/articles/2014/11/21/91473/到底坤哥係唔係得罪左tv-buddy呀?