從前有隻老屎忽食左好多鹽,有一日,佢食死左

政治 / 最新文章綜覽
(photo via cc Flickr user JD Hancock)

(photo via cc Flickr user JD Hancock)

 

前果排落街下午茶,隔離檯坐左幾件中年人,成檯不斷係度屌鳩去佔領既後生仔,係咁話佢地唔捱得苦,少少野就對社會咁多控訴。跟住又係度打飛機話上一代人係幾咁努力,而家呢代後生仔又幾咁不濟。係你話我地唔捱得苦之前,我想先問你一句:「你訓過街未?」你試下長期係街訓得唔係幾好,訓醒去返學,放學又返黎訓街,仲要間唔中同班警渣開片。你試過既話,你就會知道我地呢班「不濟」既後生仔有幾咁捱得。

 

新一代人接收既資訊同教育機會多過上一代好多,係呢種環境之下出黎既後生仔理應係比上一代更加有邏輯思考同批判能力,如果你覺得咁多後生仔讀完大學都係不如上一代既話,咁唔該你班粉腸唔好再諗住將班仔女谷入大學,反正佢地畢左業係你眼中都係讀屎片。

「一代不如一代」呢個萬惡既概念,完全係果堆不知所謂既媒體機構鼓吹出黎,特別係最中意話後生仔辭工偷懶無上進心果份報紙,仲有果堆廢話有如長江之水滔滔不絕既人力資源顧問。事實上,好多時垃圾媒體都係將某堆個別例子無限發大,然後講到而家班後生有幾咁仆街。

與其話後生仔係職場上不負責任,點解又無人諗下間公司turnover rate咁高係因為班僱主仆街?而家好多老細都expect班大學畢業生十項全能,做到隻狗咁,奉旨OT,人工唔合理又跟唔上通漲,人地唔幫你打工都係想搵個更好既老細姐。要留住人才,要懂得善待員工是常識吧?

 

上一代同下一代既分歧都唔止係呢樣野咁簡單,我呀爸呀媽身為上一代人,有時佢地都好似睇唔透香港到底有咩咁大問題,成日問我點解而家班後生仔咁熱衷出黎抗爭。我同佢講,你個女真係睇唔透自己既將來會係點。可惜佢唔識中史,唔係既話我會一句「上品無寒門,下品無世族」車埋去,我覺得呢句說話完全可以總結到而家既社會狀況,而我,擺到明係出身於寒門的小薯。而呢一種現象,好多上一代既人係察覺唔到,佢地亦唔明白自己既仔女未來十年係會一齊受苦做隻悲慘的港豬。

係香港,如果你係大學唔係讀醫讀law呢類專業既科,基本上已經宣布玩完,餓你唔死,但無可能買到樓。見過有報導講後生仔想置業唔應該咁急進,要慢慢黎。我屌,你自己睇下而家既樓價,仲有而家香港既入息中位數,三成首期,講緊係百幾萬呀!我到底要點樣儲先可以儲到?人工遠遠追唔上火箭般的樓價,就算草到都要做一世樓奴。拿,等我教精你地,最快既買樓方法應該係辛辛苦苦用一年草到五萬蚊,然後我爸剛好是首富,我爸又剛好有百幾萬後手,咁我就可以成功上車喇。

唔好再同我講結束佔領會令香港回復正常,如果你覺得本來既狀況叫正常,Sorry,除左on9我唔知可以點樣形容你。

 

作者:婷欣

婷欣
你好,我係風月亭亭長:)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 92718
Date: 2014-12-05 18:32:55
Generated at: 2020-10-30 10:18:08
Permalink: https://www.vjmedia.com.hk/articles/2014/12/05/92718/從前有隻老屎忽食左好多鹽,有一日,佢食死左