決戰中環之:都仲未開始巷戰!

(photo via cc Flickr user vishalsoniji)

(photo via cc Flickr user vishalsoniji)

 

街道清理完成,大家繼續安定繁榮,普天同慶!

因為班佔中份子,搞陣地戰又唔識去網上訂盾(一舊水起標啫),游擊戰又冇下文。唔摺埋又點會有新思維呢又?

 

最近聽到有人話要打巷戰。但係得把口講係冇用嘅,巷戰有巷戰嘅打法嘛。而雨傘運動其實對建制派冇乜殺傷力囉,因為除咗佔中三位大傻之外,其實學聯都係細傻而已。因為正當各路人馬在「退場」之後,正謀發動反攻,學聯居然乜都冇幫手,反而企咗埋去「抗稅抗租」嗰邊!仲大言不慚,話要「拖跨政府」咁話。

其實所謂抗稅抗租,一來完全冇用,亦都會繼續在政治上失分,真係同自殺完全冇分別。因為政治力量基於信心,同銀紙一樣,信嘅就要乜有乜、唔信嘅只係廢紙一張。所謂抗租抗稅,會跟嘅人只係佔人口比例一條毛咁大把。政府只需要公佈到時「出事」嘅個案數目,學聯即時冇哂公信力。

 

假如唔信,請留意統計數字:抗租只限公屋,請問公屋註冊戶主、負責交租嘅,有幾多係學聯嘅人?有乜差錯,住戶扣分事小、違例而被驅逐事大。享受緊政府福利又點會拎自己嘅福利同你賭命吖,玩咩?

交稅方面,薪俸稅只佔稅收好小比例,再者:全港350萬打工仔,要交稅嘅只有130萬咁上下,而其中一半人交咗95%嘅稅。想點?即使70萬個夾心人響應,政府都係損失5%薪俸稅收入咁上下囉。而其實頂頭幾位打工皇帝經已照起咗50%薪俸稅,唔通各位以為呢幾位打工天王會埋堆?

因此所謂抗租抗稅,真係可以話完全倒米之外,全無其他作用。

 

至於點解班傻仔會有幻覺以為會有用?好明顯係「唔識睇中國歷史」,因為中國皇朝覆亡之前,都總有抗租抗稅的農民起義動作。不過香港政府唔係滿清,無需靠租稅維生,而香港市民亦都唔係農民,間接稅由地價同租金上繳晒俾政府。講完。

 

不過,咁都未夠傻,因為學聯連外國歷史都睇錯:

所謂成功案例,其實戴卓爾當年係想強徵「人頭稅」,根本同英國憲制相違背,因此在不信任動議下倒台。呢個係民主政體嘅制衡作用。香港根本冇民主議會可以通過不信任動議嘛。用嚟做參考?錯哂。至於美國抗稅,開國就有!波士頓倒茶葉落海(Boston Tea Party)就係咁嚟:no taxation without representation. 最終演變到立國後按交稅嚟定投票權,然後過咗好耐先至解除投票權嘅資產同稅務限制,但係心理上同文化上,交稅同公民權利掛勾,改變唔大。美國同樣都係因為已經有民主政體在發揮制衡作用,又關香港乜事?

真正令到雨傘運動搞得落去嘅,係要俾人見到有「具體成績」,而唔係好高鶩遠咁諗埋啲假大空嘅倒米號召。

 

講番巷戰一事:所謂「巷戰」也者,梗係唔會真係用暴力嚟打啦。而係「死纏爛打」,仲要「超合作」地合法、同埋「響應政府號召加強法治」先至算吖嘛!愛國青年更加要努力學習毛主席嘅偉大號召,學習毛澤東兵法「農村包圍城市」,逐個擊破。

例如先前已經見到有「鳩嗚團」響應特首號召幫手振興經濟,又有「報佳音團」響應愛國教會宣揚愛與和平。更有「食肆監督團」幫手清理黑店,而最新更加有「道路安全隊」申請法庭禁制令解決「違例泊車霸佔街道」。呢啲先叫得上係「巷戰」吖嘛。

其實先前都已經有不同食肆被人「點相」連冒牌都俾人起理底,但係真係要做到「宣揚法治」,其實仲有好多嘢未有人做。例如「消防衛生團」都仲未出動!

因為除咗可以「淨飲雙計」幫補愛國食肆嘅生意之外,仲有機會經過走火通道去洗手間視察。咁到時影到啲違法嘅嘢,例如後樓梯走火通道塞到爆呀、屎坑塞到爆呀、小強米奇大巡遊呀,諸如此類….咁作為一個好市民,係義不容辭應該要通知消防同食環!咁先至可以提高愛國食肆嘅質素吖嘛,否則同胞遊客嘅消費利益受損,隨時車個杯麵落佢個頭度都有份呀。俾啲愛心啦各位。

 

至於「佔領區議會」一事,其實同樣都係巷戰嚟,但係居然班老鴿黨同埋學聯班細傻,仲以為係要重複番「民主回歸派」嘅「落區服務」傳統,真係懞到上心口囉,不如響應魚欄校長號召去跳老舞把啦。

 

佔領區議會嘅目的,唔係要去做免費阿四呀,係要為所有高登巴絲帶來「融入社區」嘅歡樂呀!慳啲啦各位老餅。詳情下回詳談。

 

作者:蕭少滔

蕭少滔
香港中文大學工商管理學院本科生校友會會長、 (前) 香港中文大學學生會辯論學會首席顧問、香港中文大學辯論隊校友會主席、香港中文大學工商管理學院 (國際商業/法律) HEC School of Management Paris, (Financial Engineer, Geopolitics) 恒生商學書院 香港華仁書院

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 「媽劇停」之苦 by 小盛女
    最緊忙緊咩?忙緊請人,你無睇錯,我終於可以請人喇!唔使再一個人頂晒所有嘢,好感動!起初我滿心歡喜,以為會有好多CV send過嚟,點知原來10份都無,仲要有幾份係印度人,我唔係歧視佢地,只係唔識中文真係搞唔掂,好難勝任「媽劇停」嘅工作。…
  • 【轉工適用】Reference Check 又黎料啦 by HR 扮工週記
    Reference check 一般會喺個 Candidate 拎咗 Offer 之後做,公司會跟據 Candidate 俾嘅資料,然後向以前嘅僱主查詢所提供資料係咪屬實。不過唔係所有公司都會做,一般某啲特定行業或者有少少規模嘅先會去做。其…
  • 香港警察的政治智慧 by 健吾
    當時特首梁振英叫盧偉聰向習近平交代香港犯罪率情況,盧偉聰即說道:「現在我們的犯罪率是1978年以來最低的一年。」習近平指出香港社會情況變得複雜,人口亦愈來愈多,但犯罪率反而有所下降。盧偉聰答道:「要感謝我們內地的公安部對我們的支持,沒有他們…
  • 《彼岸島》絕對是我人生中看的其中一套最令我無言的漫畫。 by 鵝鑾鼻燈塔
    如果你沒有看過,恭喜你,你的人生是完全沒有任何損失的。這種比狗血更狗血的劇情,永無休止又不斷無限loop的橋段,看了也想把自己雙眼也插盲。簡單來說,主角不論做了甚麼,也無法打死早已不死的吸血鬼之王,只能眼看自己的同伴一個又一個的死去(有時甚…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 93733
Date: 2014-12-18 00:00:49
Generated at: 2022-06-29 11:11:21
Permalink: https://www.vjmedia.com.hk/articles/2014/12/18/93733/決戰中環之:都仲未開始巷戰!