《撐起雨傘》同《叮噹》都唔buy唔得?

叮噹

「你睇吓我哋呢個世界,睇吓我哋呢個城市係乜嘢樣,除咗錢呢個字之外,我哋已經分辨唔出是非黑白,我哋每個人都被環境訓練到,好似倒模出嚟咁。鍾意食同一樣嘅嘢、鍾意同一樣電視節目、支持同一種政治立場,信奉同一種生老病死嘅做人方法,this city is dying, you know?」——《天與地》Dr. Dylan(Joe Junior飾)

諗諗下,最鍾意quote呢句嘢嘅人,就係嗰啲會因為容祖兒冇四萬咁口跟住《撐起雨傘》打拍子就批評人係藍絲嘅人(真實例句:「如果佢係黃絲,點解我哋首歌得大獎,佢一啲都唔興奮,仲要寸樣?」),係嗰啲會因為逆嘶亭喺《叮噹》粵語配音員林保全先生死訊傳出嗰日冇同大家一齊瘋狂懷念叮噹仲話自己細細個就唔鍾意睇《叮噹》而話佢不留餘地同刻薄嘅人。

有趣嘅係,嗰啲人最常掛在口邊嘅,就係呢句”This city is dying, you know?” 喂前面抽中文講得咁好你唔記住唔吸收,一日到黑淨係拋呢句英文斷章取義,家下你係咪淨係識英文?I go to school by bus, you know?

 

喺我未啟智時,舊同學已經成日都話:「香港人未配有民主。」我而家明,真係好明。思想單一到咁、諗嘢粗淺到咁,講咩多元自由民主啫?

民意從來就唔代表真理。(拿,係你地最鍾意拋嗰句「你永遠都無法叫醒一個裝睡的人」嗰本書嘅作者周濂講咖,咁鍾意拋人本書名,書你有冇睇?定唔知有呢本書?)《撐起雨傘》得票最高,所以唔鍾意呢首歌就唔得?《叮噹》係普遍人嘅童年回憶,所以唔懷念呢套卡通就唔得?《撐起雨傘》同《叮噹》本質就係公義、係自由、係民主?唔buy唔得?

連多一種聲音都容納唔到,點講多元?所有嘢淨係識二分,講咩文明進步?

 

唔睇論述唔睇思考過程,一味問立場,最後限制嘅唔單止係你自己嘅視野同胸襟,仲有個社會嘅發展。

一個社會幾百萬個方丈,你話啲方丈聰明都算啦。幾百萬個冇腦方丈,真係好難頂。

 

 

無聊申報:

我覺得《撐起雨傘》幾好聽,但佢獲獎我冇乜感覺;
我細個好鍾意睇《叮噹》(粵語)、《成語動畫廊》(粵語),但《幽遊白書》我係睇日文版嘅;
我不嬲都睇TVB,最鍾意睇八點鐘嗰啲唔使用腦嘅劇;
我冇唱中小學choir好耐,好多年冇戴絲帶,唔使諗我咩色了。

 

作者:Grace

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 95331
Date: 2015-01-04 01:47:24
Generated at: 2020-02-19 18:17:59
Permalink: https://www.vjmedia.com.hk/articles/2015/01/04/95331/《撐起雨傘》同《叮噹》都唔buy唔得?