輸打贏要的政改思維

Terence Yun 攝

根據偉大祖國所寫既基本法附件一及二規定，2/3以上立法會議員贊成，政改方案先可通過。假設立法會已全面直選，咁即係呢個規定既精神係要2/3以上香港人贊成先可以改動香港既政治制度，超過1/3人反對就無得改。咁林鄭同689點可以話民意過半支持而民主派議員投反對就係罪人呢？佢地點解唔問下中央，當初個制度邊個定先既呢，而家係咪輸打贏要呢？

講番轉頭，當年（2004）唔係無啦啦釋法，加入人大先設框架既五步曲方案，成件事就唔會為中央同特區政府不斷創造危機。因為原本既制度係俾佔半數既功能組別議員去守尾門，否決影響佢地利益既真普選方案，所以驚通過唔到政改既唔係政府同建制派，而應該係泛民。而家局面搞成咁，就係中央十年前駛橫手，破壞自己設計既基本法，將主導政改既責任變成由中央自己揹晒，咁咪做成支持民主既市民同中央不斷對抗囉。只要跟番原本個制度，中央其實可以乜都唔理架喎，到時到候就叫功能組別班廢柴做醜人，㩒個制否決就得啦！搞成而家咁，學老夫子話齋：「自作自受」。

議員被選出黎就係向投佢票既選民負責，唔係全香港市民，佢地唔聽民意（全港性）係天公地道架喎，連咁簡單既民主精神都唔識，枉班負責政改既問責官員，駛我地香港人幾千萬去推銷政改。如果政府真係咁執著民意，咁點解唔叫中央修改基本法為1/2議員贊成通過就得呢？或者直頭唔駛立法會投票啦，既然咁信民意企係自己果邊，咁不如由政府搞一場全民公投，一人一票，過半數贊成就通過袋住先方案，我相信好多黃絲帶會贊成架，唔駛而家連何俊仁幾時辭職都拗餐懵啦！

呢個故事教訓大家，一個極權政府就係永遠都咁低能，為左要控制一切，就習慣不斷做出大小動作加強壓制敵人，結果最後咪綁手綁腳綁番自己囉。

作者：安祖

多重身份集於一身：通識教師、社工、基督徒、家長、反國教浪潮下當選的校友校董。無論上班下班，每天與智能手機、面書三位一體，分分秒秒等like，瀕臨被太太斷網邊緣。呂大樂教授筆下沒有個性，又近乎超齡的第四代香港人；還是苦等出頭，屬於三十世代的第三代人？把書翻了幾遍，到今天仍然身份迷惘，未有定論。

閱讀後覺得好，請多多讚好及分享～：）