你恐懼?你誤判!

(photo via cc Flickr user Tzuhsun Hsu)

(photo via cc Flickr user Tzuhsun Hsu)

 

夜闌人靜,唔好講埋啲衰嘢施政暴告,更加唔好講幼稚園提供全日性服務呢啲人細鬼大嘅諗頭。越諗,諗頭就越大。大得滯,好似泡沫咁,會爆。

唔講講呢啲,講邊啲?講,先主後立(有請墳場新聞採訪劉備…)的文化企管人的三字經之首:「我恐懼」。無謂講誤判,睇一場波都見唔少,有咩好講。無謂講愧疚,因為林峰愛「不疚」。(冷冷雨……嗚噢噢)

 

恐懼。甚麼時候會恐懼?有風險的時候。甚麼時候有風險?有不確定性的時候。例如,市場擔憂大陸經濟仆街,因為市場冇水晶球冇預知能力,所以唔知仆定唔仆。如果有財演知道大陸經濟仆硬街,咁佢需要恐懼嗎?都可以,因為佢未必知幾時會出事,可以怕水退時來不及著返條褲而畀人睇全相。

同樣道理,你毋須害怕交稅。唐英年講過,人生必然發生的事情包括交稅。你亦好清楚稅單幾時找數,正如知你清明重陽幾時到。唯一你要擔心的,可能是稅款上繳後何去何從,係畀咗區議員派多 15% 蛇齋餅粽抑或支援輸入人材計劃資助國內同胞來港同你爭飯食,定係送你仔女返大陸交流交流。

 

有家長擔心硬性規定小學中學各返有陸交流一次會洗咗純潔香港學生嘅腦。都係嗰句,洗腦必然發生,即使學生死都唔過羅湖橋,掉返轉有大陸學校落嚟交流一樣避無可避。更加毋須重複大陸教師來港教學、新移民單程證入讀本地學校同你乖仔乖女做同窗。

洗就梗嘅,洗得乾唔乾淨又另一個問題。洗過衫就知,即使洗衣機用水再多、洗衣粉乸過鏹水都好,頑固污漬都不一定可以清除。唔係賣廣告托咩。換句話講,家長要預防子女被洗腦,先要思想荼毒下一代。以毒攻毒,你敢唔敢?自己子女自己教,假手於賓賓效果會爭啲。

只要心知肚明,就知好多恐懼其實多餘,其實純屬心理作應。幻覺嚟嘅啫,嚇我唔到嘅。問題是,心不知肚不明的時間其實不少,例如心亂如麻的時候,例如飽暖思床褥的時候。然後就浪費好多時間船頭驚鬼、船尾驚賊。「擔心子女被洗腦」、「擔心外來人材爭飯碗」、「擔心補選落敗唔知點收科」、「擔心言論空間進一步收窄」……

多餘。恐懼不會解決問題,只會製造就業機會--如果你驚到痴咗線的話。與其畀錢人賺,不如自己做足準備面對洗腦、面對競爭、面對輸撚梗的殘局、面對講句嘢都會被批鬥的日子。除非你可以制止上述情況發生。但如果你咁本事,一開始就唔駛驚啦。多餘。

 

當然,不是所有恐懼都是多餘的。至少現在外圍經濟環境瞬息萬變,瑞士法郎可以失驚無神取消兌歐羅的匯率上限然後 chok 上幾成,唔驚就假。 (唔係歐陽震華做乜叫大家投資要謹慎而行?大企業做咩請人返嚟做風險管理?)

閒話到此,搵日再講不確定性嘅另一面。美好的一面,叫希望。

 

作者:賴叔

賴叔
我誤判,我恐懼。為咗將錯就錯,用嘲笑化解恐懼,我決定承認自己叔叔嘅身份~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 96371
Date: 2015-01-15 22:48:58
Generated at: 2021-06-16 16:50:27
Permalink: https://www.vjmedia.com.hk/articles/2015/01/15/96371/你恐懼?你誤判!