飲食業其實唔係咁黑暗

(photo via cc Flickr user Robert S. Donovan)

(photo via cc Flickr user Robert S. Donovan)

 

係高登,耐唔耐就會有人問飲食業有咩唔見得光既秘密,而好多曾經做過飲食業既巴絲就會入哂黎好樂意咁分享佢既經歷比大家知。筆者曾經都係一間餐廳做過兩年兼職,所謂廚房既秘密其實都接觸唔少,廚房師傅食住煙炒菜其實唔出奇,跑馬日既午市晚市都好易出現「炒場」既情況。我曾經都聽過有朋友講佢自己既經歷,佢既經理應該係黑心界既精英,所作所為聽到我有段時間都唔敢再去果間連鎖店到食野。但係衰格既始終係少數人,只係咁啱比人爆左出嚟先令到大家都覺得全個飲食業都係咁既樣。飲食業,其實唔係想像中咁黑暗。

到底個客係咪永遠是對的,其實視符當時你既身份:你做緊野,咪覺得多要求又黑面既客根本就係一個仆街;到你做客,唔覺唔覺就會做左你心目中既仆街。「阻人放工尤如殺人父母」,一間餐廳十點鐘LAST ORDER,其實廚房睇情況可能九點半已經開始洗緊野。你九點十一衝入去叫個雲吞麵同生炒骨,然後同個侍應講「兩樣野好快姐」,但其實就要麵檔同隻鑊一齊加返水開返爐去煮你果兩味然後又洗過。做得廚房性格都會豪邁小小,咁一路煮一路問候你同你親人自然小不免,如果咁啱撞正師傅輸波輸馬心情唔好,咁你果兩味野都唔方會好食得去邊。至於會唔會加料依個問題我做果間就冇啦,最多係炸物跌左落地一樣執返上黎比你。衛唔衛生?起碼我做咁耐未聽過有人因為咁而食物中毒先囉。

 

不過收工先有客既話唔止飲食,基本上咩打工仔都會唔鍾意。就算係賣衫都好啦,正常營業時間去到十點,但永遠都會有人十點之後仲試緊衫或者先決定去排隊比錢。雖然放工時間係十一點,之後係仲要執衫,但客愈遲走執衫數錢既時間就愈後,遲走既機會都愈大。如果你到十點仲要求多多話要換大個碼要件新既,入到個倉SALES咪一樣會好似廚房佬咁用三字經話你,然後搵件有小小甩線再包一包當新咁賣比你。仲有好多其它服務性行業都係咁樣做野,只不過係飲食業既野你要食落肚,所以你先覺得特別大獲姐。但唔好唔記得如果佢地真係玩到咁大,你食完野唔舒服既話,你一搵食環間食鋪就有大把手尾跟。冇邊幾個打工仔會冒住冇左份工既危險都要玩死你,最多咪對住碗麵打乞嚏。

 

所有打工仔但求都係做好哂野準時收工,雖然寫住十點鐘先LAST ORDER,但去到九點十一,你都見到佢地執緊個場洗緊地,有番小小同理心,就比人地早小小收工返屋企啦。你的確可以話「仲有五分鐘有咩理由唔比你食?」講道理你係啱既,但係咪成間餐廳都願意為你一個客而個個遲廿分鐘收工冇得早走?法律都不外符人情,咪食住間廿四小時老麥先,聽日早啲再黎幫襯,唔好搞到自己好似大陸人,以為有錢就大哂咁樣。而做樓面既,咪睇下廚房有邊個檔未收哂野,之後好聲好氣叫個客「不如揀乜乜乜食啦」,如果個客係都唔聽係要食其它野既,你咪到時先再黑面囉。

其實飲食業只係好真實咁反映返香港打工仔既心態,講黑暗邊夠政治圈,又黑金政治又被自殺咁。仲有娛樂圈陪瞓上位啊、空姐幫機師解決生理需要啊、黑警放蛇順便食霸王雞啊、醫生係手術室做做下手術玩自拍之類,我覺得手指插落碗飯比起以上咁多樣野都算係小巫見大巫。真係咁擔心阻人收工會比人加料既,咪早小小去食,或姐轉間開到兩三點既餐廳囉。

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 96965
Date: 2015-01-22 03:13:06
Generated at: 2022-12-09 18:13:40
Permalink: https://www.vjmedia.com.hk/articles/2015/01/22/96965/飲食業其實唔係咁黑暗