一個插蘇,考起七百萬香港人

首先考大家一條連線題。插頭、插座、插蘇,分別對應右邊嘅 A 定係 B?

 

(搵張紙寫低答案,之後再睇落去)

插頭/插座/插蘇

(搵張紙寫低答案,之後再睇落去)

 

羊牯 vs 明燈

我留意到身邊有兩批人,姑且叫佢哋做羊牯同明燈。

羊牯對自己好冇自信,人哋話乜,佢哋就信乜。例如:

「個啲字唔啱, 正寫係尐,佢字又唔啱,要寫渠」

「要寫部分,唔可以寫部份,要寫身分,唔可以寫身份」

「任劍輝個任,係讀『淫』㗎」

聽完之後好多羊牯就會話,我由細到大都錯,我要悔改,我由今日起要寫正字讀正音。

明燈,顧名思義,大家都睇佢頭,佢話乜,大家就會信乜。好多明燈都立場堅定,論調清晰。啱就啱、錯就錯。明燈為咗發揮自己嘅作用,通常會不斷話俾周圍嘅人聽乜嘢係「正確」,幫大家做判斷。呢啲明燈通常有一定影響力,明燈講一句,對成個語言生態會引起即時影響。

羊牯同明燈嘅角色好似好唔同,查實理念根本就一模一樣;都係覺得語言有絕對嘅對錯。羊牯覺得對錯係明燈決定,而明燈就覺得對錯係由自己,或者幾本佢哋信得過嘅參考書去決定。

 

中央集權 vs. 分散權力

喺古代,有呢種思想好合理。因為大家討論語言文字,一般唔係傾日常生活嘅語言,而係一啲只係得少數讀書人識嘅書面語、古典語。好似拉丁文、古希臘文、文言文。呢啲語言有一啲出名嘅經典,而本身可以用呢啲文字嘅人係一個小圈子,所以識字嘅少數人有絕對話語權。你嘅用字唔合乎佢哋嘅習慣,你就埋唔到堆,所以一切只係得某幾個人嘅理解係啱,其他讀緊書嘅,考科舉嘅,做官嘅,唔跟呢套就冇運行。

不過今日嘅世界再唔係俾幾種書面語當道嘅社會。如果係日常生活嘅語言,例如廣東話,因為唔係死語,所以必然係喺生活上學返嚟,由屋企人,朋友,同學度學,而唔係卜卜齋或者幾個高官、權威話事。呢啲時候中央集權式嘅討論,就會出現好大問題。日常生活接觸到嘅語言唔係中央發佈,所以字詞嘅意思,其實係散落喺唔同嘅人度:冇人會知道晒成個語言所有嘅字,每個人對字詞嘅意思都會有偏差。成個語言嘅發展,就取決於成個群體點樣去用,每個字詞嘅意思,都會隨住日常嘅用法去轉變。微細嘅偏差唔會影響語言嘅運用,因為大家發現問題,自然就會調整,整一啲新嘅用法。讀得多書嘅人,因為形成咗一個小圈子,反而未必會知道出面世界嘅用法。

羊牯同明燈嘅問題,就係迷信中央集權,覺得有一個標準先至得,唔相信一樣嘢分散去做會work。雖然大家開口埋口都講「約定俗成」,不過乜嘢叫「約定俗成」,喺佢哋眼中,一切都要經過佢哋審批,並唔係真正嘅約定俗成。未經批核嘅,就係錯。

 

講咁多嘢同插蘇有咩關係?!!!!

為咗令到大家明白字詞嘅意思冇絕對嘅對錯,其中一個方法係令大家知道就算同聲同氣,大家嘅用字都可以有一堆意想唔同嘅差異。

究竟會唔會有一個字,所有講廣東話嘅人都識,但係可以每個人心目中嘅意思都會唔一樣呢?呢幅圖就係一個噉嘅例子。仲要係實物,而且係大家屋企都有嘅嘢。

 

由於好多人唔慣寫粵語,所以好多專有名詞會直接借用中文書面語。所以平日口講嘅字,唔會有好權威嘅書去話俾你知佢嘅定義。「插蘇」呢個字就反映咗呢個狀況。一般人其實冇需要分開 plug 同 socket (圖A同圖B),因為一般你只會搵socket,唔會搵plug,而plug又通常會駁住咗socket或者駁住電器。於是喺習得(acquire)呢個字嘅時候,大家好多時淨係籠統知道「嗰嚿嘢」,「plug + socket」嘅組合係插蘇,而唔會知道邊樣打邊樣。有人話「插蘇」係 plug,有啲話係 socket,有啲就覺得「萬能插蘇」先至係插蘇,甚至字典、工具書都有呢個情況。我整理一下唔同嘅工具書,大致嘅分類如下:

 

插蘇 = socket (圖B)

粵語維基 :http://zh-yue.wikipedia.org/wiki/%E6%8F%92%E8%98%87

曾子凡《廣州話普通話口語詞對譯手冊》

開放詞典網:http://kaifangcidian.com/han/yue/%E6%8F%92%E8%8B%8F

 

插蘇 = plug (圖A)

職安健網頁:http://www.oshc.org.hk/download/publishings/1/2559/21.pdf

消費者委員會:http://www.consumer.org.hk/website/ws_chi/shopping_tips/products/plug.html

 

插蘇 = socket / plug  (圖A/圖B)

CantoDict:http://www.cantonese.sheik.co.uk/dictionary/words/7655/

words.hk:http://beta.words.hk/zidin/插蘇

 

如果淨係俾兩幅圖大家,就會有好多個唔同嘅版本,其他叫法仲有「插蘇頭」「插蘇腳」「蘇插」/「插蘇座」「插蘇位」。或者用「公」「乸」去分,凸出嚟嘅叫「公」,凹落去嘅叫「乸」,諸如此類。

 

結語:施主,唔好咁執著啦

係咪一定要有標準答案先得呢?好明顯唔使。係咪一樣嘢淨係可以有一個名?係嘅話噉689唔使叫梁振英啦。呢個例子正正就可以佐證,一個詞語嘅意思,係並唔會全部人都有共識,即使係噉溝通都可以唔存在障礙。呢個字嘅演變就係由專指 socket 嘅 插蘇,變做兼指 plug,有啲人為咗區分兩者,有人加字,有人用書面語嘅插頭或者插座取代其中一個,日日要講呢樣嘢嘅師傅就加強區分之後再將佢縮做兩個音節嘅「蘇頭」「蘇座/蘇位」。無論你係用邊個叫法,都唔使同所有人有100%嘅共識。有需要嗰陣大家自然識得變通。唔清楚就加字,太長太唚就會縮返短。呢一個係不斷發生嘅過程,而「插蘇」呢個字嘅演化,正正示範咗呢個過程。

 

我估有好多自命聰明嘅人會話,「插蘇」個「蘇」嘅然係socket嘅音譯,所以插蘇一定係B 之類。明燈,我揸𨋢嘅啫,你查晒書我邊敢駁你呀。

 

【仲未知答案?Scroll返上去由頭睇一次啦】

 

作者:擇言

擇言
每個禮拜有15分鐘嘅話歡迎你加入粵典編輯組。 words.hk計劃: http://words.hkFacebook專頁

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 97084
Date: 2015-01-23 17:01:24
Generated at: 2019-12-11 05:24:15
Permalink: https://www.vjmedia.com.hk/articles/2015/01/23/97084/一個插蘇,考起七百萬香港人