「皮毛、納悶、泡湯」——論普通話口語入文問題

納悶

 

「搭檔、皮毛、能耐、嚇唬、盯、蹓躂、納悶、泡湯」

大家有冇係中學生作文入面見過,甚至寫過以上嘅詞語?大家又係咪會覺得以上詞語都係標準書面語?

好多老師可能都會接受以上詞語係作文到出現,可惜嘅係,以上都係「普通話口語詞」而唔係標準書面語。係教育當局同埋唔少學校大力推動普教中(用普通話教中文),話普教中可以減少口語入文嘅時候,大家又有冇留意到普通話口語,其實已經慢慢滲入我地學生嘅作文入面呢?大家可以睇下中文大學嘅何偉傑教授呢一篇文章,入面詳細列出左好多普通話口語詞同佢地相應準書面語詞。可以見到,包括我係文章開首列出嘅幾個例子,有好多普通話口語詞係不知不覺間已經係香港同學嘅作文中變得愈黎愈常見,而老師亦都往往會接受同學用呢種詞語。我作為一個中六學生,唔睇呢篇文章都唔知咁多詞語其實並非標準書面語,甚至自己都係作文用過部份以上口語詞而不自知。

 

係教育當局大力推廣普通話同普教中嘅大勢下,好多學生都產生左一種誤會,以為普通話就係標準漢語,而忘記左普通話只係漢語體系入面北方地區其中一種語系,同廣東話一樣,有佢嘅口語詞。更加有唔少推動普教中嘅人仕多番表示,用普通話學中文可以「我手寫我口」。呢一種論述,正正忽視左普通話口語詞嘅存在,誤導左唔少學生。試問如果同學信左呢一套,將上述普通話口語詞入文,仲以為自己用緊標準書面語,而老師又唔話佢錯嘅時候,係咪真係仲有助同學學好中文呢?

廣東話入文,會比老師打個大交叉話錯,同學就會學識要改用標準書面語。但係當大勢都推廣普教中、普教話時候,同學用普通話口語入文,可能老師都分辦唔到係咪錯,或者就算老師分到都唔敢話同學錯,同學就更加容易錯落去。文章開首嘅普通話口語詞係中學生文章入面比起廣東口語更常見。如果話普通話同廣東話對寫作一樣有影響,甚至更大影響,都絕不為過。如果有教中文嘅朋友睇緊,希望你地教清楚同學,學識分清普通話口語同書面語。其他朋友,亦都可以將呢個訊息話比身邊嘅老師、學生、朋友,令學生唔會成日用錯口語作文。

我地實在唔應該再用普教中誤導學生「普通話=書面語」,更加應該正視普通話口語對中文學習嘅影響。普教中,幫唔到學生學好中文之餘,好可能仲會弄巧反拙。「皮毛、納悶、泡湯」同「吾系甘牙」一樣,唔應該再係同學作文出現。

 

作者:普教中學生關注組

普教中學生關注組
學生自發成立的普教中關注組,以「捍衛粵教中,反對普教中」為組識目標。https://www.facebook.com/scholars.say.no.to.PMI

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 97176
Date: 2015-01-24 16:04:51
Generated at: 2021-07-27 16:22:29
Permalink: https://www.vjmedia.com.hk/articles/2015/01/24/97176/「皮毛、納悶、泡湯」-論普通話口語入文問題