是狼震英令我們分手的

(photo via cc Flickr user Jonathan Kos-Read)

(photo via cc Flickr user Jonathan Kos-Read)

 

Crystal和Ricky拍拖未夠一年已認定對方便是Mr. & Ms Right,女的準備嫁,男的又準備娶,朋友親戚們都說他們很有夫妻相,簡直要唱番首「齊賀你,天生一對」,可惜他們和絕大多數香港人一樣,有一個很大的煩惱 – 無錢買樓結婚。雖說錢不是萬能,但無錢真的萬萬不能。衣、食、住、行樣樣都是錢,買一件Chocolaxx大褸、吃一頓日本鐵板燒、去一趟台北旅行,已不知不覺地用去不少血汗錢。

其實Crystal和Ricky各有一份穩定收入,但人工不高,每個月扣除家用、飯錢、交通費、電話費、交際費,然後拍多幾次拖,食多幾次日本嘢,已經所剩無幾,仲講乜野儲錢買樓結婚?通脹繼續咁落去,遲D分分鐘連去睇場戲嘅錢都無。最近政府推出居屋,二人當然唔執輸即刻填表抽,可是誰都知道,這只是個一年一次的六合彩,又會有多少人可以中獎?中咗都唔駛咁快開心住,搞得掂個首期再講啦!好喇,當你有屋企人幫手分擔首期,你又供唔供得起?每月供樓後已無多餘錢做其他事,終身為樓奴,生活又有何意義?於是Crystal開始有點擔心。。。

 

Crystal自抽居屋一事才醒覺原來買樓真是難過登天,從前她天真地以為只要大學畢業,搵份好工,努力幾年便可以買樓,心想爸爸小學未畢業都買到樓啦,我點都大學畢業,又唔係唔勤力,仲晚晚OT做到隻狗咁,點會買唔到樓啊?諷刺的是,看著如此高不可攀的樓價和每年只升5%的人工,她知道再不想辦法,便真的沒有機會建立屬於自己的家。

Crystal對投資不熟,沒有充足資金,又不想有太大風險,唯有想想其他辦法。她心想,既然不能增加收入,那不如就減少支出,Forever xx大減價,HK$90一條牛仔褲?買一條好喇,要慳錢啊,真係買多條都內疚。朋友約食放題?唔食喇咁貴,食車仔麵算啦。男朋友話睇戲?唔睇喇Download啦,廢事哂錢,然後慢慢地Crystal開始覺得心情低落,生活乏味,加上工作忙碌,壓力又大,最後還病倒了。

 

「唉,我最近覺得好煩啊,好似無論點努力都好,都無可能上樓咁。」Crystal對好友Brenda抱怨說。

「車,易啦,嫁個有錢人咪得,起碼唔駛為錢愁嘛!」港女Brenda說。

「癡線,你估有錢人就一定好架喇?有錢就有女,一定唔專一,又或者脾氣暴燥都夠死啦!」Crystal反駁說。

「有無錢嘅男人都會唔專一嫁啦,至於脾氣,你出去做野咪又係要受客受老闆氣,嫁個有錢人,頂多都係受佢一個氣姐,有賺啦!」Brenda理直氣壯地說。

「道不同不相為謀,我都廢事再同你再講落去。」Crystal說。

 

Crystal公司最近剛巧來了一個新的男上司叫Ben,聽說是內地尖子,更是富二代,想不到政府司政報告才剛說要輸入內地專才,現實便已出現一個在她面前。Ben高學歷,沒有財大氣粗的蝗蟲味,而且知書識禮,斯斯文文,實在是女人心目中的筍盤。日對夜對,加上多個無限加班的晚上,二人慢慢地開始了曖昧的關係。

「我不想再看到你為了區區一萬多的工資而加班,其實我在香港和內地也有物業,我可以養你。」Ben在一個加班的晚上,以字正腔圓的普通話跟Crystal說。

「梨之刀禾有男貧友的嗎?」Crystal以唔咸唔淡的普通話回答。

「我知道,但是你們最近不是因為買房子而吵架嗎?以你們的工資,我可以肯定你們一輩子都買不到房子,你跟他分手吧。」Ben說。

「己禾一點時奸,禾再想想吧。」Crystal說。

 

Crystal回家想了一整晚,愛情與麵包,她從來一直都選愛情,因為她覺得靠自己,只要努力,一定可以換來麵包,可是近年她實在看不到將來,如果努力一生換來的只是一個又爛又臭兼食唔飽的麵包,她倒不如靠人,靠一個可以給她很多很多麵包的男人。

 

「Ricky,我諗我地都係唔適合再一齊落去,不如分手啦。」Crystal冷淡地說。

「係咪因為我無錢買樓?唔驚喎,今年居屋抽唔中咪等下年,再唔中咪下下年,再唔係我地排公屋,我實儲到錢娶你嫁!」Ricky說。

「都唔係呢個問題。。。」Crystal猶豫地說。

「咁係咩問題?你係咪有咗第二個?」Ricky追問。

「唔係,總之我地唔夾,我地唔好再搵大家喇。」Crystal說。

嘟嘟嘟。。。

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 97222
Date: 2015-01-25 03:55:21
Generated at: 2022-09-28 15:31:51
Permalink: https://www.vjmedia.com.hk/articles/2015/01/25/97222/是狼震英令我們分手的