如果話「打邊爐最緊要係個爐囉！」咁好明顯啦，飲葡萄酒最緊要就係隻杯。
又係喎，無杯點飲呀！葡萄酒酒杯要玩呢真係可以玩到好講究。有啲酒杯牌子直頭出到唔同葡萄品種都有一隻專用嘅杯。咁當然，又唔係吓吓要玩到咁大嘅，好似我呢啲凡夫俗子，屋企都係得幾款大路嘅杯嘅啫。不過酒杯嘅形狀、大小，以至材質，都確係對葡萄酒嘅表現有幾明顯嘅影響。
一般黎講，我地揀酒杯，最重要嘅目的係為左提升香味。為左令葡萄酒有足夠嘅空間同空氣接觸，揮發香氣，首先隻杯要有返咁上下大，而唔係用黎飲世界的五糧液個啲杯仔。同時斟酒嘅時候只會斟少少(around 50mL)，而唔會好似酒樓姐姐斟可樂咁斟到滿晒。
而為左令揮發出黎嘅香氣更加集中，葡萄酒酒杯係形狀上一般係鬱金香形，即係由窄到闊，再到返窄，係杯口收返住啲香味。香檳或者汽泡酒杯嘅形狀會特別啲，一般會係長窄嘅flute杯，令汽泡可以有更長嘅上昇時間，慢慢將香氣帶出黎。以前個種扁扁平平用黎搭個塔個隻香檳杯其實無乜人用，除非你真係用黎搭個塔啦……
飲加烈酒例如Port或者Sherry會用細少少嘅杯，避免揮發太多酒精影響欣賞酒香。跟住係白酒，最大就係紅酒杯。簡單原則就係越需要強調香味嘅酒，就會用隻越大嘅杯。如果係飲到一啲香味豐富嘅葡萄酒，特別係Burgundy，仲會用到啲手球咁大嘅杯添。
盡可能我地都會揀啲有腳嘅酒杯，拎嘅時候拎住杯腳，避免將體溫經杯邊傳入葡萄酒，影響表現。無腳嘅酒杯市面上係有嘅，目的係為左方便慳位，有時要帶杯出街就會帶呢啲。材質上多數會選擇玻璃或者水晶。有咩分別呢我就唔講咁深入喇，因為我都唔知，有人話過比我聽其實早餐即係常餐，水晶都係玻璃喎，搞到我好亂……膠杯正常就唔會用。因為膠黎講呢，好多時會係膠味濃郁，點飲呀大佬，比啲專業精神好無。
不過凡事都有例外，最近我搵到隻幾得意嘅膠杯，個brand叫Govino。首先外表上，唔膠。有時啲透明膠咪會好似透明得黎夾雜少少顏色，又或者唔知係咪厚得濟折射到杯入面嘅飲品硬係怪怪地咁。呢隻杯就無咁嘅情況，第一次見個時我真係以為係玻璃。加上唔知咩技術乜乜乜，佢竟然做到無膠味！我身先士卒買左兩隻，一返到屋企就試下掟爛隻膠杯/掟膠爛隻杯，又真係無事喎衰鬼。
我唯一唔鍾意呢就係佢懶係方便咁整左個手指位，其實我覺得用返鬱金香形就得。係屋企我都會用返原本啲玻璃杯嘅，但係出街就應該會用佢。今晚我首次帶佢出街街，touch wood有咩問題就再report啦。Bye~
(Enoteca, $80)
我去到2021年先唔再睇TVB——正向聯想 (Positive Association)
香港濕熱世界第一！？談散熱和濕度的關係
【職業安全】英國警花分享：防刺背心唔係咁著. . .
【遊戲評測】《血咒之城：暗夜儀式》新生惡魔城 四年等待完全值得
分手咪分手囉，三口六面講清楚好難咩？
薛定諤人生最尷尬的恥笑——薛定諤的貓實驗
2015年1月27日
