打仗嗰陣,射得死敵人就得,理撚得你乜乜乜

 

話說最近有個丹麥人聲稱由古籍學得現代人遺忘嘅射術,然後有班自稱係射箭高手嘅人插佢誤導大眾,所謂「歷史上弓箭手射箭嘅方法」其實係佢老作,之類。

我唔識射箭嘅。我只係見到幾樣嘢:
1. 佢射得好快(作為男人未必係好事…)
2. 佢強調弓箭手近戰嘅重要
3. 佢條片表現出嚟嘅技巧仲型過 Legolas(主觀)

然後見到有人插佢:
1. 歷史嘅嘢你識條毛咩(插佢嘅人係現代弓手,並冇提及自己嘅訓古能力)
2. 射得快有撚用?都唔準!(其實條片入面佢都算係準,當然有可能重覆拍過好多次)
3. 射得快有撚用?都唔夠力!
4. 你嗰啲雕蟲小技算係乜吖!呢啲我哋不嬲都識架啦!

個情況就好似一個跑開一百米嘅跑手,話「我不嬲都識跑馬拉松架啦!你跑馬拉松 20 秒先跑到 100 米?太慢了!」有時都覺得幾好笑。明明原本條友係想帶出「古時弓手嘅近戰技巧都好重要」,叫人唔好一味追求「射程」同「準確」,但竟然可能俾人用返「射程」同「準確」呢兩個標準去鬧返條友轉頭。

 

令我有啲聯想。例如有人話班社運撚唔好一味「求被捕」,但佢哋會鬧你「都未俾人拉過,有咩資格出聲」。又例如當你批評學棍拎住個博士學位招搖撞騙,又會有人話你冇博士學位冇資格出聲。

呢個世界就係噉。只要有班人,搞啲乜叉乜叉世界比賽,搞啲乜叉乜叉學會團體,再搵幾個好似好有威望嘅人做下榮譽乜叉乜叉,噉大眾就會覺得佢哋好勁。如果你唔喺啲乜叉乜叉競賽入面決定性噉打贏佢哋,你講乜都冇用,仲會得罪成村人,變成過街老鼠。有時佢哋為咗令你輸,仲會特登諗屎橋去令你贏唔到。

人性呢家嘢,天然渾成,插嚟都冇用。In another world, in another context, 我都可能係呢啲仆街屎忽鬼。但究竟有咩原因,會令到人變屎忽鬼呢?

 

我認為最重要嘅原因係,呢啲屎忽鬼組織存在嘅目的,並唔係為咗解決實際問題。

 

現代箭術唔係用嚟打仗,而係用嚟比賽。所謂「比賽」,就係有 artificial rules,即係人類自己定嘅規矩,作用只係為咗令個比賽「公平」啲。久而久之,好多人會將呢啲規矩當咗係永恒不變嘅道理。當有人質疑呢啲規矩嘅意義或合理性,就會有班「衛道之士」走出嚟話你破壞傳統、冇資格、冇料到、搞事。

相反,如果一個組織以「解決實際問題」為目的,就唔會咁多規條。打仗嗰陣,射得死敵人就得,理得你準唔準,有冇架勢,有冇拎過乜叉世界冠軍。
一個唔係以「解決實際問題」為終極目的嘅組織,最後一定會充滿規條主義嘅屎忽鬼。所以點解香港社運圈子會演化出咁多屎忽鬼,就係因為佢哋先假設XXX係做唔到嘅,然後鳩做。鳩做唔會成功,所以唯有以「被捕次數」衡量一個人嘅地位;所以點解離地學術界會有咁多無聊人,用各種方法證明自己好叻、鬥出得多paper、鬥學歷鬥排名。因為佢哋研究嘅嘢,冇咩應用價值。

可能當一班人迷失方向,搵唔到生存意義嗰陣,就會鬥埋啲無聊嘢,執著埋啲無聊嘢。所以,人類有「健康」嘅信仰,有信念,係幾咁重要嘅事。

 

作者:散彈一號

散彈一號
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 97598
Date: 2015-01-29 04:09:56
Generated at: 2020-08-09 11:18:23
Permalink: https://www.vjmedia.com.hk/articles/2015/01/29/97598/打仗嗰陣,射得死敵人就得,理撚得你乜乜乜