香港嘅冬天真係好狡猾，凍幾日又暖返，凍幾日又暖返。有時想趁佢天寒地凍食啲冬日美食真係要比啲心機去捕捉它。
早幾日終於比admin我捕捉到有日凍凍地，走左去食個芝士火鍋。某連鎖店做左芝士火鍋都好多年，叫做大眾化，易食到，加上Corkage平，基本上我每年都會食一次兼開支酒試下夾。
芝士同紅酒易夾可能好多人都知，但其實好多芝士同白酒或者香檳一樣易夾，甚至好多時係夾得比紅酒更加好。就講芝士火鍋，傳統上多數會用到嘅芝士例如Gruyère或者Emmental，同白酒嘅配合度非常高（當然啦，而我不知道乜乜屋用啲咩芝士嘅……），加上傳統上煮芝士火鍋其實係會加白葡萄酒（一樣啦，而我不知道乜乜屋係點煮嘅……），所以一般我都會揀白酒黎襯芝士火鍋。
今年我揀左支Domaine A 2010年嘅Lady A黎配芝士火鍋。Domaine A呢個酒莊黎自澳洲Tasmania，即係陳奕迅去現袋塵世美個度呢。環境靚空氣好呢啲就梗咖啦，而當地更加係一個非常出色嘅wine region。同一般人對澳洲嘅印象唔同，Tasmania係一個相當凍嘅酒區，好多時會出產更多纖細精緻嘅葡萄酒，例如係Pinot Noir咁。
呢支Lady A用嘅提子係100% Sauvignon Blanc。呢隻提子現時有兩大主流風格，一種係清爽、高酸度，着重鮮嫩水果味同青草氣息嘅紐西蘭風格；另一種係比較沉鬱，酒體較厚，着重成熟果味同木桶味兩者平衡嘅法國風格。Lady A係偏向法國風格。事實上佢嘅風格原型正正係波爾多嘅Pavillon Blanc du Ch Margaux。揀呢支酒我第一個考慮係texture。新桶釀製再加上同酵母一齊熟成令到Lady A嘅口感變得豐盈幼滑，有足夠嘅厚度同芝士汁平衡，非常配合。
Sauvignon Blanc天然嘅高酸度令到Lady A酒體圓潤得黎又唔顯得膩，就好似初戀一樣咁清新脫俗，亦正好劃破芝士汁笨重厚實嘅感覺。味道方面Lady A成熟嘅蕃石榴、白桃、蘋果、柑橘味同木桶帶黎微微嘅烤焗、果仁味道平衡得相當好，而後者更加同芝士火鍋嘅主食，麵包，可以互相提升。
整體黎講對今次嘅pairing非常滿意，感覺上比我上年開個支HdV更加好。呢支Lady A亦都有足夠嘅力道同複雜性支撐晒成個晚餐。去到後段仍然一直變化，有更加重嘅香辛料同乾草風味，餘韻亦見深長。有興趣嘅大家都趁黎緊呢幾日凍凍地去試下喇喂，不過支酒好似已經賣晒sosad。
（Watson’s, $68X 好似係）
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年2月1日
