Weekend唔知點解突然間要負責煮野食。咁識飲Admin本人黎講呢，就係煮野食高手黎嘅，兩大名菜可以話係名震江湖，分別就係炒麵王同埋香辣味炒麵王……
咁點算呢？唔怕，有Google有YouTube呢個世界仲有咩係解決唔同丫？係煮家男人嘅YouTube搵到一個好似好好味又好似好易整嘅餸，最緊要係咩呢，哇要加酒入去煮咖，好啦決定是你了，出黎啦意式紅酒燴牛肉！
根據煮家男人介紹，呢個餸本身黎講呢，係意大利中部Tuscany嘅名菜。煮嘅過程中，要加入紅酒落去炆 / slow cook。
好多人夾食物或者煮某啲地方菜式時，會用返當地出嘅酒。煮家男人示範中亦正正用左一支Tuscany區嘅Chianti。呢個做法其實極大機會係正確嘅。好簡單，係悠長歲月嘅演進同埋淘汰之下，既然個種食物，同個種酒，係可以係同一個地方，一齊survive到今時今日，喂，就算唔係天作之合呀，都唔會撞到你要掉低筷子掛！
講到Tuscany區嘅酒呢，主要黎講有三大類。第一，亦可能係最多人接觸過嘅，係Chianti。第二，係Brunello di Montalcino。呢兩種都係意大利傳統酒款，而主要提子品種，一樣係Sangiovese。
第三種，就係所謂「Super Tuscany」嘅新派酒。以泰利愛酒Sassicaia為首嘅Super Tuscany一般以Bordeaux提子品種為主，間中加入Sangiovese，不受制於傳統意大利葡萄酒釀造法。
根據頭先所講嘅天演進化原則，以上三種酒之中Chianti同Brunello di Montalcino應該有更大機會同呢個餸互相配合。
事實上，Sangiovese有一點係令到佢同今次嘅燴牛肉特別夾嘅，就係佢嘅獨特酸味。今次嘅燴牛肉煮嘅時候會加入蕃茄。好多人可能唔知，蕃茄係好難夾紅酒嘅，因為其實蕃茄係屬於重酸味嘅食物，只有極少數紅酒可以夾得到，而Sangiovese釀出黎嘅酒就係其一，甚至好多時係Sangiovese中飲到tomato / dried tomato嘅味道都唔出奇。（Well，咁你同時明白點解意大利菜零舍多蕃茄啦。）
今次平平地執左支Fonterutoli Chianti Classico，都係一個質素穩定嘅大莊。2012未算係好靚年但已經比2011好。雖然新，但係充足嘅單寧更能有效同牛肉嘅肉質一同融化。加上煮家男人嘅精湛示範，我夠膽講句，今次煮呢個意式紅酒燴牛肉，係好味嘅！:0)
(Wine from Watson’s: $168)
（同場加映同樣向煮家男人偷師嘅蒜油意粉and賽螃蟹）煮家男人 Bob’s Your Uncle
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年2月2日
