關於罷工一小時,我想說的是……

下載

 

罷工有冇用﹖當然有用。罷幾耐先有用﹖咁要視乎資方有幾無良。通常資方愈無良,罷工期就要愈耐先愈有用。如果要達到抗爭目的,一般而言,罷工時間長短同僱方無良程度應該係成反比。咁當然,仲要視乎另一樣野,就係抗爭者的追求目標。即係「成功與否」、「有沒有用」其實係好視乎你點樣定義「成功」同「有用」的。

 

覺得以上都係廢話﹖的確。呢D都只係常識。應該冇咩人會唔同意的。咁又要去返個現實情況:罷工一小時有冇用﹖

 

如果你指的「有用」,係指要改變《明報》總編那種編採方針,甚至要光復返《明報》的話,我只能講話呢個「用」呢,微小都不能再小,係無限地接近零。咁當然,接近零又唔會等於零既。

但如果你指的「有用」,係指要引起新聞關注呢,或者再退而求其次係為左要表個態呢,咁的確又算得上係有用既。就好似O個D咩「熄燈一小時」咁,本質上都只係想有個宣傳作用,教育下市民,同埋俾D NGO有D活動可以持續咁做落去,都係有一定的積極意義的。呢點我唔反對。

咁如果你話「罷工一小時」係為左發洩怒氣、表達情緒,又或者係自我感覺平衡D、良好D既話,咁我覺得直情係好成功添啦。下次可以考慮「罷工半個鐘」、「罷工十五分鐘」、「罷工一分鐘」,可能都會有相同效果架。

 

所以個問題其實唔在於罷幾耐,而係究竟你想得到D咩﹖求仁就得仁,付出永遠同收穫係有一定程度的正比關係。呢方面個世界都幾公平。所以亦無謂將自己的要求強加於別人身上。可能人地根本冇諗過要達到你心目中果種目標呢﹖又或者人地覺得「無用之用大用也」呢﹖呢D野真係無得強求的。

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 98343
Date: 2015-02-05 03:08:49
Generated at: 2020-09-21 14:19:39
Permalink: https://www.vjmedia.com.hk/articles/2015/02/05/98343/關於罷工一小時,我想說的是