港大退聯之「共產黨最高興」論

政治 / 最新文章綜覽
(photo via cc Flickr user purpleslog)

(photo via cc Flickr user purpleslog)

 

由幾時開始,我地做人做事的準則係要睇「共產黨高唔高興」﹖大家要含淚投票俾泛民﹗否則「共產黨最高興」;大家唔好退出學聯﹗否則「共產黨最高興」;大家唔好批評左膠﹗否則「共產黨最高興」;大家唔好衝擊升國旗﹗否則「共產黨最高興」……

咁點解當日又要勸大家從佔領區撤離﹖唔怕「共產黨最高興」咩﹖點解民主黨要入中聯辦密室談判﹖唔怕「共產黨最高興」咩﹖點解要反對本土派的「光復行動」﹖唔怕「共產黨最高興」咩﹖點解左膠孔令瑜當日要向毛范譚三個溫和本土派開記招下戰書﹖唔怕「共產黨最高興」咩﹖點解左膠要支持中港融合﹖唔怕「共產黨最高興」咩﹖點解天主教正義和平委員會要「為中港融合祈禱」﹖唔怕「共產黨最高興」咩﹖點解孔令瑜要盲撐縱火犯施君龍﹖唔怕「共產黨最高興」咩﹖點解左膠要圍插陶傑﹖唔怕「共產黨最高興」咩﹖

麻煩你解解俾我聽﹖

 

Daisy Chan

前學聯秘書長陳倩瑩(Daisy Chan)於港大退聯公投獲通過後於個人面書上的發言。

 

另外,你地憑咩野判斷港大退出學聯,共產黨就會「最高興」﹖點解唔係公投結果反映年青一代急劇「去大中華化」,反而令「共產黨最頭痕」﹖共產黨會寧願揀一個大中華的學聯做對手,定係揀一班本土意識抬頭的人做對手﹖你敢肯定咩﹖更何況,共產黨內部咁多派系,佢地既利益同取態會全部一致咩﹖就算當你判斷正確,咁根據係乜野﹖證據在何處﹖說好了的「科學客觀中立不偏頗不以偏概全」呢﹖﹖﹖

做人可唔可以唔好咁虛偽﹖唔好太雙重標準﹖「知行合一」少少好嗎﹖我要求都唔算好高啫。而家兩邊龍門射晒,你玩晒啦。咁搬龍門法,同共產黨有咩分別﹖學葉寶琳小姐話齋,「你憎中共卻變成擁有中共特質,值得嗎﹖」(2015年2月11日)

其實公道少少講,今屆學聯可能已經係歷屆之中最唔近大中華同左翼意識形態的了。但咁唔代表港大學生就必然要支持同加入。無論左定右,起碼要有一個基本共識,就係要尊重民主機制,尊重公投結果。雖然好老實講,我暫時睇唔到退出學聯會有咩即時而明顯的影響,但選舉總係有輸有贏,麻煩學聯班人尊重返投票者的意願,講少D酸溜溜的意氣說話,D咩「垃撚圾」的言論就麻煩衰衰地道返個歉,俾返少少風度。咁大個組織咁疊馬又成億資產又盛,唔係咁都輸唔起掛﹖

 

最後補充返,講左咁多,大家可能會以為我好支持退聯。但好老實講,完全唔係。你見我之前一直冇乜講過退聯單野就應該估到,其實我對退唔退聯係冇咩感覺,亦冇咩所謂。我只係睇唔過眼有D人發膠論又從來冇反省意識啫。

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 99242
Date: 2015-02-14 12:19:11
Generated at: 2020-07-04 01:14:12
Permalink: https://www.vjmedia.com.hk/articles/2015/02/14/99242/港大退聯之「共產黨最高興」論