過年食到飽一飽，一於食返啲世界級生果，清一清腸胃。
今次我母親買左啲成個小朋友拳頭咁大嘅士多啤梨返黎。咁奇特。等我首先黎以身試毒，會一會佢先。
生果黎講呢，其實同好多葡萄酒嘅香味有相通之處，就呢一點黎講本應係可以同葡萄酒互相配合。奈何基於生果嘅甜度、酸度等不確定性，用黎夾酒往往係危機重重。
曾經有個好偉大嘅人講過，「Buy on an apple and sell on cheese」，正正就係話比我地知，「喂你搵蘋果黎送酒呀，祝你好運喇，因為多數會令到支酒差左咖。」
芸芸生果之中，士多啤梨係少有地同葡萄酒形成到classic match嘅，佢夾嘅，就係香檳。
有個friend就話：「咦喂，香檳？士多啤梨？呢個配搭好淫賤喎！」然後佢頭也不回就去chill左支香檳，洗好士多啤梨，跟住見有啲時間就沖個靚涼，梳個靚頭，着起件浴袍，含住支雪茄就周圍同身邊啲囡囡講「How you doin’?」
我地先唔好咁快諗到咁遠先，講返wine matching。士多啤梨細膩嘅香甜氣息，結實穩重嘅酸度，優雅嘅平衡感，都同香檳嘅特性非常咁配合。
我多數會揀有Pinot Noir甚至係Pinot Noir成份比較高嘅香檳，希望佢有更多嘅紅色果實乃至係士多啤梨香味黎同返士多啤梨做配合，頂得住無？
由於我手頭上無啱洗嘅香檳，所以無錯，我又用偽香檳喇～今次開左支Quartz Reef Methode Traditionnelle Brut NV。紐西蘭大莊，釀造方法同香檳一樣，提子方面如無記錯 / 飲錯有相當份量嘅Pinot Noir，我敢講係其中一支風格最似香檳嘅非香檳氣泡酒。
最吸引嘅，都仲係個價，玩下手，一堆士多啤梨就貴過支酒喇，實在係居家看門口嘅必備良酒。
(Watson’s, $138)
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年2月24日
