女友叫我Facebook狀態改做單身

10845634_792681770817973_6491815054890813607_o

 

「喂!你搞咩啊訓喺地下,間屋亂過垃圾崗,起身先啦。」楊善兒,是我的多年鄰居,她的父母因為工幹要長期留居外國,於是她便一個人在工作地方附近租了個單位自住。她說反正一個人,住邊都方便。

 

可能我都是自己一個人住,所以跟善兒特別投契,性格男仔頭的她,平時在樓下碰面不僅有說有笑,有時她叫Pizza 外賣,都會一邊抱怨為何Pizza不可以叫半個外賣,一邊拿過來跟我分享。有時我會請客,有時她又會將食剩的晚飯拿過來給我。雖然我會嫌三嫌四,「食剩先俾我,當我垃圾桶啊?」但老實說,她的手藝比我的女友雅倩,好上很多倍。

 

「嘩,咁臭嘅,你幾多日無沖涼啊?」善兒將我扶起。

「我…同雅倩分咗手…」

「我知。」善兒欣然。

「妳點知?」

「咁…我之前Facebook有加你同雅倩嘛,咁…佢狀態又改左單身,我咪知囉,不過…」善兒頓了一下,又說:「喂大哥啊,都成個月前嘅事啦,你唔係成個月無沖涼吓嘛?」儘管善兒捂住鼻,但仍坐在我擺了幾星期無洗衣物的梳化上。

「妳唔好理我啦…」我放軟身子,側躺在梳化上。

「痴線,失戀大晒咩。」善兒站起來,開始在我家裡遊走,但我沒有心情理她。

我躺著,用手枕在額前,以前雅倩常常會來我家,家裡太多她的殘影。可是閉上眼睛後,又滿腦子都是跟她的回憶…

熱戀期間想念一個人,感覺好甜密。但分手之後,原來會變得好痛苦。

我當然沒有像善兒所講的一個月沒洗澡,我只不過是一個星期沒洗澡罷了。

因為一個星期前,原本對我不瞅不睬的雅倩突然在Facebook inbox給我。起初,我還以為會有復合機會,就算不是復合,可以轟轟烈烈鬧一次交都好。點知…

「唔該你可唔可以轉返個狀態做單身,咁樣好易令其他人誤會。」

「其他人?邊個其他人?」

對話欄顯示「已看過」,但雅倩始終都沒有回應我。

「乜一個社交網站嘅感情狀況,真係咁重要咩?」我當時對著電腦螢幕不忿地說。

回想起跟雅倩分手當日,她立即就將狀況轉為「單身」,不消十分鐘,讚好比平時貼我跟她的恩愛照片多好幾倍,她的男性朋友亦立即留言慰問。當然,我相信當中亦有很多男生會私下傳短訊、whatsapp、打電話給她…

不過,我沒有怪責他們的意思,因為在更早前,我跟雅倩拍拖的第一天,在回家的巴士上,我又何嘗不是立即用手機在Facebook上更改感情狀況為「與xxx穩定交往中」,在她眾多追求者中耀揚威呢?

連變回單身也要公告天下,到底她是以什麼心情去看待跟我分手這件事呢?

 

Facebook裡總有幾個朋友,感情狀況很不穩定。這天轉做穩定交往中,跟伴侶鬧交變成單身,約朋友出來飲酒哭訴,呼天搶地,結果不夠幾日又轉回穩定交往中,在facebook上大晒甜蜜。

我以為跟雅倩分手我也會變成這樣,但原來,我連喝醉的心情都沒有,朋友更加唔想見。這一個星期,我將儲備用來跟雅倩去旅行的大假請光,每日躺在家裡,什麼都不做,但其實是什麼也做不了。

「嘩過晒期仲擺喺雪櫃,係咪痴線嫁。」廚房裡傳出善兒的聲音。

我像觸電般從梳化上彈跳起來,衝入廚房指著善兒說:「喂!呢盒焦糖布甸唔丟得!」

「過期啦,留黎做乜啊?」

「以前…雅倩好鍾意同我坐喺梳化同我一齊食…」

「咁又點姐?佢都唔會返黎陪黎一齊食嫁啦。就好似呢盒布甸咁,過咗期啦,就算你擺喺雪櫃,佢都一樣過咗期唔食得嫁啦。」善兒頓了頓:「你個雅倩上星期已經換咗同另一個男仔穩定交往中啦,你仲成個傻仔咁。」

唔怪得,雅倩堅持要求我將狀況轉做單身,原來唔係驚有其他人誤會,係已經有咗其他人…

「關妳咩事姐而家,布甸我留黎同邊個食都唔關妳事。反正都唔係同妳個男人婆食囉。」

「……」

「點啊?無野講啦。」

「再見…」善兒將布甸丟在地上,氣沖沖地離開。

後來,我將散落一地的布甸清理乾淨,整個廚房都彌漫著焦糖混雜布甸的味道,唔知點解我有種感覺,當我清理完這盒布甸,雅倩就正正式式離開我了。

全身大汗,雙手又黏糊糊,我才不甘願地洗了個澡,將一身酸臭味沖刷後,整個人心情都平靜下來,我回到大廳,剛才情急之下衝入廚房,所以沒有注意到,原來善兒不斷在我屋內徘徊,就是幫我清潔亂七八糟的垃圾崗。整個房間都沒有了霉霉臭臭的味道,梳化上的衣服扔進洗衣機裡,枱上面的杯麵又執乾淨。

我也才愕然發現,咦!原來呢個世界,未末日喎。

「喂善兒,對唔住啦,都幾日啦,唔係嬲咁耐嘛。」我走過隔壁屋,在善兒的單位門外大叫。

自那天離開之後,她就沒有再來找我,我打她的電話沒人接聽,Whatsapp也一直沒有上線。難道連身邊唯一一個不用facebook溝通的朋友都要離開我?雖然很不情願,但我還是登入facebook找她。

按進善兒的近況,顯示她的住址在Mildura ,Melbourne。而又正好,她顯示在線上。

 

「喂妳搞咩啊幾日唔見人既。」

「我去咗澳洲啊,而家好興嗰D 賺幾十萬返香港嘅working holiday呢,其實我都籌備咗好耐啦。唉!不過你平時都唔留意我facebook,一定唔知啦。」

「咁、咁我係你鄰居…都要同我講聲掛。」

「嗰日我想同你講嫁,不過…你鬧走我喳嘛。」

「sorry囉,對唔住啊。」

「嘖,太遲啦~」

「妳…嗰邊點啊?雖然妳係男人婆,但都一個女仔吖,喂!聽講好多女仔去賣淫喎。」

「痴線!我喺農場啊,日日做到隻狗咁先賺得雞碎咁多,都唔似網上面講咁輕鬆嘅。平時…又無人陪我食pizza喎,連廚房都要輪流用啊,我咪唯有一次過煮幾日飯囉。」

「咁妳咪返黎囉,我而家又一支公,都無人陪我食pizza啦。」

「傻咩,簽證有一年嫁,幾大都玩盡佢啦。不過而家我仲搵緊人陪我環澳啊,我又無車牌,台灣人我國語又麻麻咁,總之好煩啦。」

「我有車牌喎。」

 

***

 

三個星期後

可能雅倩就係唔鍾意我份人太衝動,做事魯莽,少少事就發脾氣,佢先會離開我。

但亦因為呢股衝動,呢一刻,我弧身隻影,身處在墨爾本機場。

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 100350
Date: 2015-02-26 02:10:34
Generated at: 2020-12-03 06:20:58
Permalink: https://www.vjmedia.com.hk/articles/2015/02/26/100350/女友叫我facebook狀態改做單身