而家係咪小店有光環就唔鬧得?

食物 茶餐廳 林婷欣攝

 

潮流興幫襯小店,好多香港人都鍾意去茶記打返個靚卡,然後加返個caption話:「支持小店!打倒地產霸權!」我自己本身都會特登搵小店黎開餐,但由於市面上越來越多偽小店出沒,食到一肚氣嘅經驗真係數之不盡。

一上開飯網,求其開一間已經出左名嘅小店黎睇,總會見到唔少震驚七百萬香港人嘅浮誇食評,真心想問呢班人嘅味蕾係咩構造。炒蛋講到好似食山珍海味咁,叉燒煎蛋飯就有如電影食神入面果碟黯然銷魂飯。無錯,有啲小店係真心唔錯,但你都唔係吹大到有如黃河之水滔滔不絕下話?

 

我幫襯呢啲小店都唔會話有咩要求,我俾蔗渣嘅價錢,你俾返蔗渣我都已經接受到,如果有燒鵝的味道就當係bonus啦。但我想講有啲小店真係好過份,有時連好多人吹捧果啲鋪頭都係咁。嘢食呢?凍嘅,難食到連我屋企個唔識煮飯嘅老母都煮得好食過佢嘅都有,伙記就好似當你殺父仇人咁。我黎幫襯小店有時都係想矯情地感受下果份人間溫暖,有啲伙記真係會當你friend咁同你吹返幾句,無咩特別嘅食物都會令你覺得好窩心。不過有唔少呢啲so called小店真係一啲誠意都無,直頭係拎住光環當令箭。無辦法啦,因為無論間嘢點差都總會有一堆香港人盲撐。

其實無誠意都未係最大問題,而係有好多小店出左名之後就變晒質。嘢食跌watt,瘋狂加價,而且個加價幅度大到根本唔係因為通漲同租金,而係要襯出左名賺到盡。呢一種「小店」仲係唔係原本嘅小店,我真係答唔出。

 

如果你帶頭鬧呢啲小店,你無命喇你!一定俾人話你係咪想啲小店死?你係咪無人性?分化香港喎!邊個最開心呀?地產商最開心呀!

 

作者:婷欣

婷欣
你好,我係風月亭亭長:)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 100496
Date: 2015-02-27 15:12:04
Generated at: 2020-10-31 18:26:20
Permalink: https://www.vjmedia.com.hk/articles/2015/02/27/100496/而家係咪小店有光環就唔鬧得?