學聯都道晒歉啦,你哋仲想點?

 

面對近日連番惡意攻擊,年三十晚都唔放過,學聯成員一定精神壓力好大,新年都未必過得開心。試諗下,過去嘅衰嘢咁樣比人摷返晒出嚟,仲要係包括鬧人「垃_圾」在內嗰啲老鬼作嘅孽要現莊受,除咗共產黨之外仲有邊個會高興?好啦,人哋學聯而家出晒聲明,道晒歉死狗咁款啦,你哋開心啦?

 

睇返份聲明,實在係寫得大方得體,開心見誠。單係第一段就將帳目交代得清清楚楚,斬釘截鐵咁證明學聯冇人收取金錢利益。既然最重要嘅金錢利益都已經講明係唔存在,好似自治八樓冇收過租呢啲非金錢利益輸送就無謂再提啦,會章都講明只對錢銀問題有規定,唔通學聯唔止有「行政疏忽」,仲有「立法疏忽」咩,講你都唔信啦!

至於間乜乜基金公司換董事,因為各種原因,趕唔切換,遲咗十年啫,好出奇咩?一個已經出現咗十年嘅行政疏忽,亡羊補牢,由2013年7 月開始搞轉董事,今年3月底前會搞返掂,年半就解決到,已經好好啦,呀唔知邊個前秘書長,一路走來,都仲係咁咋!就算係共產黨都笑佢先啦,點會覺得學聯做嘢唔掂?等到3月底,班退聯共諜陰謀失敗晒之後,先再睇學聯嘅工作報告同改革方案,我肯定大家到時將會見到一個誠心改革、透明度高嘅新學聯!

 

其實,明明只係一啲行政疏忽、少少缺失,但啲別有用心嘅人就拎嚟大造文章,講到好似有唔係行政疏忽嘅結構性問題咁,仲話佢哋完全無視會章、知法犯法,然後為掩飾而大話連篇,實在係太過份。試諗下,明明錯嘅係一班淨係識倒米嘅「老鬼」,但就因為佢哋已經落晒莊,而家已經喺唔知民陣定政黨到擔任緊要職,結果就要班無辜嘅年輕大學生出嚟做代罪羔羊,呢啲咁抵得諗嘅年輕人,又點會識講大話隱瞞自己嘅過失?

同樣道理,我深信嚟緊嘅新莊,都會繼承抵得諗呢個優良傳統,為前人留落嚟嘅問題負全責。所以,我希望大家繼續全力支持學聯,香港絕對唔可以冇咗呢個咁重要嘅學運領袖!

 

作者:同中伏

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 100533
Date: 2015-02-27 23:33:07
Generated at: 2019-10-19 04:15:02
Permalink: https://www.vjmedia.com.hk/articles/2015/02/27/100533/學聯都道晒歉啦,你哋仲想點?