話說識飲admin去左荼毒青少年導人飲酒。小朋友入世未深，又經唔起挑釁，一個個拎住自家水杯排排坐等斟酒，場面實在令人鼓舞。
席間有一好奇廢青問曰：「其實呢，啲酒點分靚唔靚？」
呢個問題問得非常之好，我亦都好樂意解答呢個問題。
第一，我地要係飲酒中，搵到唔同元素嘅平衡。一支葡萄酒，有好多個面向。味道固然係一大部份，另外仲有酸度、厚度、單寧強度等。一支好酒，從來肯定基本上要各個方面平衡，步伐一致，不顯突兀。白酒較睇重酸度有無做得過多者過少，紅酒就要平衡埋單寧。
我用例子答你，如果你買左支白酒，一入口酸到你個樣好似飲左收縮水咁，果味只能弱弱地匿係後面搖尾乞憐嘅話，我地就會話係「off balance」。相反，如果開支紅酒，即使有好澀好結實嘅單寧stay係你條脷，但同時酸度充足，有強力嘅果味做支撐，咁就仍然係balance喇。
第二，要睇下支酒有無魅力四射嘅複雜性。有人話，葡萄酒，咪係提子味囉。但其實一支優質葡萄酒，味道應該多采多姿。提子本身固然有水果味道，而就算係水果味之中，都應該有唔同嘅紅果、黑果、青色果實、熱帶果實等等嘅味道。
此外仲有礦物質帶黎嘅味道，木桶同酵母帶黎嘅辣味、香料味、果仁味，陳年之後發展出嘅皮革味、獸肉味、石油味，以至唔同提子品種，唔同土壤獨特嘅味道，例如青椒味、杉樹味、乾草、蘑菇、橄欖、尤加利葉……有時我會問，點解我嘅人生，唔可以好似葡萄酒嘅味道咁，有咁多好既伴侶……
第三，我地要留意支酒，係咪不嬲都係來去如風。呢度有兩重意思，首先係餘韻，即係支酒飲完喇，吞埋喇，味道仲keep唔keep到。會唔會縈繞不散，齒頰留香呢？定係好快就消失晒呢？
另外就係潛力問題。支酒適唔適宜長期熟成，繼續發展更多複雜性呢？定係其實已經走到盡頭，即使目前飲得杯落但都已經係技止於此呢？
今次拎左支Two Hands嘅Deer in Headlights 2002。入口果味香濃，容易親近，仍然有相當嘅酸度同單寧做骨格，副以少量嘅辣味、咸味，有一定嘅層次，可飲可擺，只係規模感稍弱，似乎唔能夠同Garden series或以上級別比較。
(Slurp Asia: $300)
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年2月28日
