圍爐取暖

明明已經過了立春和驚蟄，香港天氣偏偏乍暖還寒，間歇驟雨溝潮濕冷風，三月初春反而比一二月晚冬更冷。如此天氣，假如三五知己相約燒烤，圍爐取暖，順便裹腹，未嘗不可。

三五知己，旨在同聲同氣，圍爐取暖，花生一把，啤酒三打，鳩噏連場，由We can’t burn them all 到Chicken wings will be back皆宜，啤酒溝花生，說話咪當真，你明架啦，有些左朋膠友戲劇細胞發達，鏡頭前，大台上，人人大義凜然，雲長托世，包拯上身，大道德家發表大道德經，清風竟然輕拂，順便令佢秀髮飄逸，好似用咗Head & Soldier 咁樣，鎂光燈不停閃呀閃，仁哥仁姐又一次A1頭條，天助佢也，演技嚟嘅姐，嚇你唔到嘅。

佢著住GAP tee反資本家，笠住Hollister反歧視，單手捽住iPhone建設民主中國，都是高層次後現代艾未未式行為藝術，不要問，只要信，你唔好意圖或企圖質疑呢班再世孔孟嘅說話呀，人哋道德光環耀眼，你嘍囉一名，冇人冇物冇父幹冇政棍冇律棍冇大佬撐腰，咪駛旨意挑戰呢班永續社運抗爭營業部高級經理嘅履歷表呀，抗•命•不•認•命，深•耕•細•作，啲口號吹到終国BB頭咁大，差唔多要PG家長指引，你識條繩麼？

「抗爭」兩隻字，一橫一豎，嗰個想像空間闊到仆街㗎，好似係，公民抗命喎，都要你生活緊嗰個係公民社會先至對辦㗎，而家律政司可以選擇控告，前政務司貪得嗰幾百萬就要坐監，阿梁書記勾結外國勢力收半億就理所當然，偉大光明正確嘅公安同志對有圖片有聲有埋片嗰暗角打丁柒警就不了了之，路邊玩粉筆或者帶辣椒油出街嘅細路竟然要馬上被重案組拘捕，又要宵禁足禁令，阿粉筆妹妹仲差啲入女童院，大佬，呢種北韓lization嘅愚民社會，邊忽公邊樹民呀？

對住呢啲滿口仁義道德嘅虛偽君子，你仲要和平理性非暴力非粗口咁BBQ式「抗命」，不能力敵，當然要智取啦，又要威又要戴頭盔是常識吧？咪再咁天真嬌以為著捷古華拉Tee裇嘅人就係捷古華拉先得㗎，人哋老人家而家改姓葉，最喜歡嘅係龍呀。

圍爐取暖，固然得一時小圈子快慰，不過燒碳自high呢回事，後生仔，唔好日日上電啦，吸入光環牌碳精過多嘅人，好易飄飄然，無分老嫩，個腦會殘架。

作者：爽健

不求聞達於諸侯，只願笑傲賞江湖。

閱讀後覺得好，請多多讚好及分享～：）