暖男養成記

BIG

 

咁多人寫娘娘,點解唔見講下暖男呢?

咩係暖男?暖男可以理解為男版娘娘,比較接近既意思即係婦女之友。

 

呢類男人大致分三個養成基:

一、真係基;

二、自細同家姐細妹亞媽表姐姨媽姑姐叔婆舅母相處得多;

三、佢的前度(sss)調教得好。

 

其實暖男唔少,但暖男只會被當係兵,而大家只會見到娘娘好多兵,忽略叻兵都好多娘娘,而部分,其實就係暖男。暖男都好似機場Wi-Fi,都好多connections,係女search到,就算自己又男朋友都忍唔住connect。

 

(咁其實咩係暖男啫?)

 

好似前面講既咁,暖男即係同女人相處得多,比較識同女人相處既男人。

咁成為暖男容唔容易?話你知,係難過做娘娘!

 

暖男個型乾乾淨淨,唔可以太削要有番咁上下骨架,削過黃宗澤就好唔掂。因為暖男要平易近人,最好好似哈利波特個同班同學Matthew Lewis咁樣。細個係無害又蠢萌既死肥仔,小學啲女同學就當你人球咁又摸又砌,肉體上係受咗唔少苦楚,男同學又鄙視你同女同學玩,其實佢地大個諗番就知道其實當時不過係葡萄你可以埋女身,葡萄你可以近距離睇住女同學既青春綻放。而肥仔大個就變成暖男,個型無害又唔似男神咁chock上神台咁遙遠,暖男係不乏同囡囡相處既經驗。

暖男好似太陽咁,俾人溫暖,體貼,顧家,更甚者鍾意貓貓狗狗。囡囡抱怨同學hea做project、教授open book考試難或者補習辛苦,普通毒L淨係識合埋把口,或者同囡囡講道理,「係咁架啦,讀書(做野)係咁辛苦啦」。囡囡即刻收聲。而暖男就會好似Baymax(醫神)咁,笑笑口,發三個字「摸摸頭~」加個符號再加個emoji,囡囡就會好滿意你既服務,你可以熄機全身而退啦。

 

男人通常麻甩佬,爽快直接,最好你要乜野開口講就萬事大吉。

但事實上,而家女人搵錢唔少過男人,女人物質欲望逐漸飽和,所以暖男大行其道,因為暖男sell既就係暖意,精神上支持。

 

暖男會幫囡囡改啲得佢自己叫既花名,兩個人之間有個特別既connect,做你好熟好特別既朋友(即係朋友~~~)但暖男唔係兵,兵仔等娘娘翻牌下詔,你miss咗分分鐘冇下次,但暖男係大家既機場Wi-Fi、中央冷氣系統,豈會坐等囡囡召喚,所以熟絡後你約暖男,五次有一兩次唔得閒,因為暖男上知天文下知地理,又識電腦又識Lens又打gundam,今日同朋友去做動物義工,後日同朋友慶祝生日,下禮拜同朋友行3C。囡囡問:『同啲咩朋友行?』咪一班老死有男有女囉。咁你自問自己係咩?又係朋友囉。其實暖男咪又係男人,又係鍾意高達鍾意睇鍾意睇囡囡cosplay,同樣毒L都鍾意但個型唔同,同人相處恰到好處,毒L就見到囡囡變毒狼,暖男見到囡囡就遞手say hi,你企係佢隔離,個心窒一窒「咁你都識?」

 

暖男過馬路會拖囡囡手踭,或者繞過膊頭推你行,但唔係溝你。

暖男會主動搵你關心你傾計有頭有尾,同你講晚安,但唔係溝你。

暖男會送你番屋企,或者叫你番到屋企話俾佢知,但真係唔係溝你。

暖男會幫你做旅行計劃,會大大方方叫你記得帶m巾跟身,但真係唔係溝你。

 

暖男唔係兵,唔會同你詳細匯報行蹤。

暖男唔係後備情人,唔會秒回你message唔會情人節送禮物。

你唔係太陽,暖男唔係地球,暖男先係太陽,佢唔會圍住你轉,因為大家圍住佢轉。

暖男唔係義工,你都冇機會派好人卡俾佢,因為佢就係一個好人,亦好識照顧其他人。

如果你入戲太深,逼問態度,長篇大論要求表態,無緣無故疏離暖男,對唔住,佢connections太多,你矯情既時候,他系統繁忙,他只會覺得你今天有啲怪。

但暖男就係若有若無咁陪伴你,記得你既習慣、口味,讚你既衣著髮型,比你更早攞出紙巾分俾大家。

所以你要醒目,唔好中毒。娘娘蓄兵冇乜值得葡萄,同樣暖男keep connection都冇乜值得葡萄,人地付出既心力、時間同EQ高都係你冇既。

 

作者:三個水

三個水
末期懶癌,癔病綜合症

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 101710
Date: 2015-03-13 03:44:16
Generated at: 2020-10-31 15:41:21
Permalink: https://www.vjmedia.com.hk/articles/2015/03/13/101710/暖男養成記