【留學德國】所謂嘅柏林藝校大學生生活係咁嘅

 

當日喺柏林學德文到向心儀嘅藝術大學遞表申請大學,一年後嘅今日就係柏林藝術大學嘅純藝術系嘅學生。多謝容總呢個平台,呢一年間唔中都會收到網友問關於德國讀書嘅事,趁sembreak 完之前,希望簡單介紹啱啱過去大半年嘅德國藝校生活,令大家可以擴闊對外國留學的想像(一定係咁啦)

 

報考到取錄

當日報咗六間大學,最後收到三間嘅入學考試invitation,分別係Fachhochschule Bielefeld(比勒費爾德應用科學大學)嘅攝影系,Hochschule für Bildende Künste Braunschweig(布倫瑞克藝術高校)同Universität der Künste Berlin(柏林藝術大學)嘅純藝術系,而多數嘅院校都係事前要送portfolio去,而佢對你有興趣就可以去參加入學考試。三間大學嘅入學考試嘅考試形式都類近,都係比條題你,喺約干時候之後返去交作品。

第一間FH Bielefeld為例,入學考試嘅題係叫你諗一條題目,訪問十個人,影相,四個鍾之後交相;第二間HBK Braunschweig :條題係:空間,兩日後交作品,兩日內prof 們會巡示下,而你就要解釋下你自己嘅artwork做緊咩;

而我間學校入學考試(UdK)係考得最耐,考足四日,第一日叫你用德文或者英文,用四版紙答四條問題,內容都係圍繞住個人目標,點解想讀art,有咩啟發你嘅藝術家,而第二日至第三日就係做作品嘅時間, 一條係火焰,好簡單易明;另一條題就比較特別,就係比咗學校方圓半公里嘅地圖你,你可以根據呢張地圖,然後去做你嘅創作。創作方式隨意,(所以去到最尾見到有人用火槍燒爛咗一個木製模型交 😮 )總之喺第二日五點鍾之前交到就得,而第四日就係一對十幾個教授面試(可以揀德文或者英文進行面試,當日揀咗德文)真心畢生難忘,感覺就好似一個犯比十幾個官審咁,

 

公有圖片

公有圖片

(撇除幅畫嘅歷史墨略,呢幅畫係完全描述緊喺面試室個情況)

 

問你件作品嘅意念點嚟,繼而問你點解第一日篇文會咁寫,對藝術有咩睇法,心諗,都係報定私立藝校算(不過私立藝校好貴,八萬幾港紙學費一年),去到最後,我比而家呢間學校收咗,到今日諗返,其實真係好神奇嘅事。

 

校園生活

我學校係一間非常國際化嘅學校,除咗本土德國人之外(嚟自柏林嘅得小貓三四隻),仲有嚟自歐洲 ﹑盧森堡﹑希臘﹑伊朗﹑韓國﹑台灣等等國家嘅同學。有一次全班八十人新生坐埋一齊,教授問,邊個母語唔係德文,半數人舉手,就知道間學校真係好多唔同地方嚟嘅人。

同學嘅年齡層同背景都好廣泛,啱啱讀完中學就即刻入咗嚟讀大學嘅又有,喺巴黎行catwalk嘅model又有,有更多係讀過其他大學但發現讀嘅科唔啱自己,之後quit U 考藝校嘅又有,最誇張聽過讀到final year quit U;又或者係已成父母嘅都有,所以間唔中佢要帶個BB返嚟上tutor就無人可以專心到,其實都幾好玩。

正因為年齡層好廣泛,背景又好唔同,所以大家做嘅artwork都好唔同。(廢話)就好似已成人夫人母嘅同學,會令玩具做題材做installation;政治議題都會涉及到,就例如嚟自伊朗嘅同學,有一系列畫黑色頭紗下女人嘅眼神,又或者有同學會向柏林嘅廢棄醫院畫畫都會有,大家風格迴異,所以冇人知收生標準係咩,無人明白每個同學之間嘅共通點係咩,所以亦都令到睇同學嘅作品好有趣。

除咗平時固定嘅堂之外,每一個星期都會有集會(Plenum),簡單嚟講就係art critics section,每次都會有五個同學出嚟present自己嘅作品,之後同學會就住件作品比批評。講真,每一次都會好精彩(前提係要跟到同學講嘢嘅速度),因為就算本身班同學幾熟都好,如果佢覺得你件作品有嘢唔得,都會直接批評唔比面,真係槍林彈雨,聲風血淚,但係Plenum過咗,其實大家又會照樣可以傾到計,所以亦都欣賞班同學批評時對事不對人嘅態度。

喺課堂以外,我地都會定期喺學校studio開party,由於學校開廿四小時,所以玩到好夜都冇問題(柏林星期五,六提供24小時地鐵),而每個studio都會有沙發,如果醉咗直接訓都完全無問題,而我所屬嘅studio連床褥都有,好過份,再加上柏林酒真係好平,正常質素紅白酒3至4歐有交易,啤酒就更加唔洗講,所以如果喺學校開party飲到醉都絕對係好正常嘅事。

當然,喺呢度讀書亦都會有佢困難之處,語言就係其中問題。雖然自己學到一個幾進階嘅程度(B2),但遇上教授口音難明又冇powerpoint 嘅lecture,上完堂同冇上過無咩分別。學期頭試過有堂lecture 上完,一個字都無聽得明,真心唔知自己有冇學過德文。如果上tutorial 都還比較好,小班教學,唔明可以問到明,而tutor們都好樂意慢慢講德文覆述,又或者真係聽唔明講英文都無所謂。加上可能受慣咗填鴨式教育,要隻鴨突然自己搵食,真係會無頭緒,就因為做乜都得,所以你唔知可以做咩,亦都會係要重新習慣嘅一件事。

 

結語

當然兩年見到嘅嘢好難用短短二千字去寫哂,但只想講當日揀嚟德國雖然都係好random嘅決定,其中一個原因唔想哂咗自己學過嘅德文所以過咗嚟。一年喺演藝讀書,再加埋上年用咗成年學德文同準備入大學,令我遲同我一齊中學畢業嘅同學遲兩年入學,但諗返起喺德國嘅經歷,例如話喺畫畫學校準備portfolio,連同個只係識講德文嘅畫畫老師九唔搭八,到去到慢慢同老師講到自己做緊咩,去到入咗大學,同德國人flatmate日常用德文傾計都冇咩大問題,其實都係一個香港無乜機會發生嘅進步,所以遲咗入學應該係值嘅。再加上自己班flatmate一個去過法國做Au-Pair湊過一年仔先入返大學,另一個就去咗意大利學意大利文先返嚟升大學,其實可以諗下,中學畢業後,JUPAS以外,又或者係升大學以外,其實真係仲有好多唔同嘅選擇。

 

作者:Cmw Boni

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 104201
Date: 2015-04-12 12:03:40
Generated at: 2021-12-09 06:48:42
Permalink: https://www.vjmedia.com.hk/articles/2015/04/12/104201/【留學德國】所謂嘅柏林藝校大學生生活係咁嘅