亞投行如何促進中國的國家利益?

亞投行

 

在今日的國際關係裡,仲邊有人講道義?所有國家,從來都只講「本國的利益」。美帝所作所為,只有一個動機︰「美國的利益」。英國首相Lord Palmerston的名言︰「Britain has no permanent friends, nor permanent enemies. She has only permanent interests.」。所以,所謂促進亞洲各地的經濟發展,是羊頭,真正的狗肉是所有參與者的利益。中國帶頭成立「亞洲基礎建設投資銀行」(簡稱「亞投行」),出錢出力,能夠和應該撈取最多利益者,毫無疑問是中國。其外交說辭如何漂亮和正氣,全世界的政府和人民,都不會懷疑中國在撈取利益,不過,大家齊齊玩、分一杯羹而已。特別係歐洲同東南亞國家群起支持亞投行,佢地希望中國出嚟同美帝爭霸,花錢爭取與國。作為小國,最好就左右逢緣,同美帝討價還價,同中國攞多啲著數。佢地明知人仔咪又係想做霸權,第時邊個贏第時先算,今日兩邊通吃就是各小國的「國家利益」嘞!

言歸正傳,中國的國家利益如何通過亞投行去體現?

 

首先,人民幣國際化係頭等大事

所謂人民幣國際化,就係威迫也好、利誘也好,要各國用人民幣,好讓中國人民銀行從發鈔中,帶領中國一眾以人民幣為基礎的商業銀行、投資銀行撈取大量利益。美圓霸權有幾著數,你知我知個個知,好多中國義民讀完《貨幣戰爭》系列之後更加為之著緊。中國人民銀行為甚麼就要讓美聯儲專利全球發鈔?發鈔銀行,就係有權控制銀根鬆緊,控制利率,可以將經濟問題出口轉移俾其他國家。美國所謂「利率市場化」,還不是美聯儲說了算?所以,中國人民銀行要推進人民幣成為國際儲備貨幣,拿一席發鈔銀行的位置。

好喇,咁關亞投行咩事?中國政府大拿拿攞五百億美金出嚟大家投資,要話事。第一重要的遊戲規則,就係亞投行要用人民幣計價。即係,大家要用人仔入股,將來投資時,跟投的銀行、基金、企業要用人仔投資。被投資的項目拿到人仔,就會用人仔買野。跟住,項目要付利息、還本金,又係用人仔。牽一髮而動全身!全部野都係用人仔,一個亞投行投入十億人仔的項目,累計下來,過千億的人仔在流動!幾十萬人用人仔,大交易用人仔、細交易又用人仔,創造人仔的國際需求,咁就可以幫手消化國內濫發咗幾年的人仔。同時,用人仔交易,最方便、又有最多人仔的當然是大陸資金的銀行(尤其係各大國有銀行),咁佢地又可以走出去賺多啲。

所以,隨著亞投行遊戲規則落實,佢應該要改口話︰「亞投行資本為一萬億人仔,世界各國以人仔入股」。嘩,依家全香港都無咁多人仔喎,何況世界各國。咁好容易解決,就各國的中央銀行,去中國人民銀行開番個戶口,放少少本國貨幣同美金,加埋亞投行股票做抵押,中國人民銀行一定會行個方便,貸放巨款。國家主權信貸,又有亞投行股票在,中國人民銀行唔使怕要收爛帳。就係咁順手,世界各國就有部份外匯儲備放咗喺中國人民銀行。有咗個頭,大家就會諗,外匯儲備唔一定要係美金放喺紐約架,北京利息高喎,轉多啲人仔好喎,咁慢慢就可以搶走美聯儲嘅生意。如果亞投行唔用人仔,我會懷疑主事人係唔係漢奸,咁大壇野用美圓,咪加強咗美圓嘅地位?點解要為美帝金融利益服務?

 

干涉外國內政的白手套

中國咁多錢,點解亞投行唔自己玩晒?咁大家要跟沈博士讀多啲國際關係,了解下呢個世界唔可以自己玩晒做獨家村。中國有錢起嚟都唔係呢幾年,一早都投資咗好多錢在外國,別人的地方,好易出事而無人同情。單是2014年,就有三單大鑊︰緬甸的水電站、墨西哥的高鐵、斯里蘭卡的港口,全部都被人一鑊蹺起。人地指控中國行賄、唔守規則、唔講環保、欺負土人,中國係百辭莫辯架(佢自己國內係點?)。

現在有亞投行,實,是中國話事,表,是各國的錢。有咩事出嚟,要干涉、要追究,就係世界各國共討之,項目所在地不能胡來也!亞投行又唔同世銀、亞行要扶貧、要行仁義咁高大上,開宗明義就係投資賺錢,促進經濟發展。就算咩反對派上台也好、遊擊隊打贏奪權也好,孟子再生出嚟話「何必曰利?亦有仁義而已矣。」也好,都可以一手推開話︰「還錢,唔還錢就淋紅油」。咁中國人民解放軍就有藉口好似美軍咁出動拳頭,為「國家利益、國際利益」而四處開戰了。

 

善用鬼佬

從報導得知,英法德等先進歐洲成員國,會積極參與亞投行的工作。有人懷疑歐洲人會在亞投行搞鬼,破壞中國的利益。而且中國唔係要話事咩,唔係亞洲人管亞洲咩,點解會俾英德法呢啲鬼佬一齊玩?當然唔怕!之前國有銀行、民營銀行嚟香港上市之前,都搵外國大銀行做戰略股東,捉隻鬼入董事會睇實班干部,隻鬼佬董事又會帶幾隻鬼同蕉幫手睇住關鍵部門。中國的銀行,一方面在制度上模仿外國銀行,一方面以夷人來防腐,搞好內部的管控,才能過香港的上市關卡。歷史也有例子,滿清的海關由英國人赫德(Robert Hart)掌管四十多年,當時被譽為全球最清廉的海關,為滿清政權提供了大量關稅,深得慈禧太后、滿漢高管的器重和尊敬。今日的領導唔係土八路,飽讀經史,亞投行就係要有一幫英法德鬼佬坐鎮,睇實班干部,等佢地規規矩矩,無得亂嚟。

有咗亞投行開個頭,中國就可以摸著石頭過河,吸收主導國際金融秩序的經驗。如何楚材晉用,以夷制夷,都要有實戰的平台。美國的金融體係,龐大複雜無比,其竅門不會教導中國,唯有自己實踐,總結經驗,方可以負起大國的責任,謀取國家的大利益。

此外,偉大的中華人民共和國成立以來,就算餓死幾千萬中國人民的艱難日子,偉大的中華人民共和國都係唔會放棄出錢出力援助亞非拉美兄弟友邦嘅。但係,世風日下,以前就兄弟,宜家就契弟,援助被外國上至總統、下至胥吏中飽私囊之後,反轉豬肚有之,政權易手有之。錢洗了,中國不一定得到好名聲。不久之前,為了拉美一支反美大旗,中國政府就免了拉美某反美大國欠下的四百億美金。今後,有亞投行參與海外的基建項目,中國就可以將部分援助海外的錢,轉化成亞投行的投資。第一,錢洗得規規矩矩,難以招人話柄。第二,受款國不容易開口要求唔還錢,要取得各成員國的同意不容易也。

 

不能放棄的否決權

有報導指,中國為了安定人心,出錢多,有相對大股(即不過半數但是最大的單一股東)之外,沒有拿到否決權。余以為,若果中國唔攞否決權,可能會令亞投行失敗。

「先小人,後君子」,中國出錢出力,就要對應的影響力。現在是由於參加的成員太多,中國的股份被分薄了,但不應影響其話事權和經營權。同馬雲一樣,管理層有金股,出錢的股東只有權分錢、無權話事,招股的時候就清清楚楚,願賭服輸。現在成員國願意參與亞投行,係跟中國呢個大佬,大佬就要當仁不讓,清清楚楚的權在我手來處置亞投行的事務。國際關係其實似黑社會,講實力、權謀,唔應該講民主。

否決權在手,所有成員國清清楚楚知道誰在話事,不會三心兩意,搞合縱連橫呢啲麻煩政治。亞投行是中國首次領導一個新的金融秩序,這領導權一早已經眾合周知,理應在制度上規範下來。否決權是那幫三心兩意的鬼佬的金頭箍,一早要他們死了搞局的心。否缺權亦令「盟友」知道,中國在制度上一早有了保障,不必在投票的關鍵時刻索要利益。權責分得清清楚楚,中國領導的國際金融秩序才算「透明」、「先進」。

 

總結

亞投行係大國政治的一環,對國際金融相應的話事權係中國大國崛起必然要進行的一步。中國應該利用這個機會,學習國際金融秩序,有所創新,謀取本國利益的同時,兼顧上友邦的利益。廿一世紀要縱橫捭闔,金融是無煙火的戰場,中國算係迎難而上。吾等僅有「坐看周瑜成大功」的份而已。

 

關香港咩事?

係,唔太關香港的事。香港唔會爭到咩野區域總部之類的著數,本地公司也不精於這種大型基建項目(可能地鐵除外,但有錢起地鐵的城市應該已無咩資格借亞投行的錢了。)香港亦無幾多人有人脈、地位去進入呢類國際機構的高職,要搵Intern、基層職位亦已有大堆中國人在排隊。所以,了解亞投行,真係純維園阿伯的討論,吹水、宏觀,但真係得個講字同睇字。

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 104285
Date: 2015-04-13 14:06:23
Generated at: 2021-12-09 06:25:17
Permalink: https://www.vjmedia.com.hk/articles/2015/04/13/104285/亞投行如何促進中國的國家利益?