敬拜的反思:即係點解成日要唱普通話詩歌呢?

(photo via cc Flickr user Ashley Campbell)

(photo via cc Flickr user Ashley Campbell)

 

番左十幾年教會,其中一樣令我最不解亦最唔妥既,就是本人返既教會經常唱大量普通話詩歌,而呢樣亦是相信是當今不少教會既寫照。關於呢個問題相信要追溯至10幾年前,當時大部分教會仍然係唱緊好多教徒稱之為「唔岩音詩歌」既古老聖詩(其實點解佢唔岩音,都係因為原本應該係普通話唱);但隨住靈恩派既崛起,教會漸漸又覺得佢地唱既詩歌又好聽(似流行曲),又岩音就唔在講啦。更加重要既是,相比起傳統詩歌,會眾唱新派既詩歌好似投入好多,人又搖哂手又搖哂,於是好多教會就是咁投向新派詩歌既懷抱。

但係,問題黎了:畢竟真係講廣東話既城市,除左香港之外就係得廣東省地區會用,但地方咁細,出產既歌量自然好少啦,點夠起祟拜每星期咁唱呢?於是,教會就將眼光放起普通話詩歌度:多產、好聽、夠聖靈感動。教會用,就要買譜買碟,又造就左另一個商機,亦係點解而家普通話詩歌比香港本土詩歌興盛既原因。

但係,筆者想問既問題係,既然我地是廣東人,有自己既語言,點解唱普通話詩歌既機率,會大過唱自己語言既呢?尊重自己既母語,用自己既語言敬拜神,有乜問題?反而愈唔用,就愈少用,有好多好好聽既廣東話詩歌都係咁愈黎愈少流傳。廣東話詩歌市場既萎縮同衰落,教會責無旁貸。

另一個更重要既原因,就係其實起教會有好多公公婆婆,佢地係唔識普通話既(淨係識廣東話同自己既鄉下話)。如果崇拜裡面最少有5成係普通話詩歌(本人教會經常出現呢種情況,但係其實筆者個人既普通話水平係試過教中學普通話既,我個人接收係唔會有問題),最多試過全部都係,咁你真係叫班公公婆婆成碌木咁棟起度或者坐起度聽火星文啫。篇文睇到呢度,大家又有無覺得其實都有少少辛苦?因為我用緊既字雖然係大家平時講開野既字,但始終唔常咁睇,睇都會有d辛苦。我地接收資訊都尚且有阻礙,更何況係一班根本唔識聽普通話既老人家?咁你唔係變相剝奪左佢敬拜既權利咩?

 

(好了,都是用回書面語舒服多了)更甚的是,普通話詩歌還一些核心的問題存在,其中包括:

 

1. 用詞片面、無限呼求又當首歌

普通話詩歌的其中一個特色,就是不斷的呼求,就以知名度最高的讚美之泉作品為例,其中一首名為「阿爸天父」,歌詞如下

阿爸天父 阿爸天父
從我心深處呼求祢名字
(從我心深處呼叫祢阿爸)
打開心門領受祢大愛
祢是最愛我的阿爸父

這麼短短一段,都叫了4次阿爸父,阿爸父都俾你叫到樹葉都落啦。詩歌有不同類型,筆者知道是有一類為「呼求」類,透過不斷重復,把歌詞唱入心中,其實都真的有其作用的;但是,如對讚美之泉系列稍有認識,都知道這首「阿爸天父」只是茫茫眾多「呼求」類的一首而已。當詩歌主題十首如一日,那信仰又是否可以十年如一日呢?再且,筆者對音律填詞略懂一二,個人認為他只是廢事諗咁多,於是歌詞不斷重復而已。

 

2. 題材單一、只有「愛愛愛不完」

承上文,同樣是「阿爸天父」,主歌是這樣的:

天父 祢滿有憐憫
滿有慈愛饒恕的恩典
醫治釋放我的心
慈愛雙手緊緊擁抱我

用我的說法,就是「你愛我」呀、「我愛你」呀、又「你愛我」呀、又「我愛你」呀,無限loop,只是爭在用不同的字眼鋪敘這個主題。

當然,信仰的核心是愛,毋庸置疑;但我卻覺得,信仰同樣是多面的,而特別如今的信仰往往輕忽了神是大而可畏的一個面向。要知道舊約時期,有個人叫烏撒抬住約櫃,因為驚約櫃跣低而托左一野,就死左了(當然烏撒是利未人,他應該知道約櫃是踫不得的)。我不是指上帝現在會這樣「賜死」我們,我想指出的是,信仰應該是多面向、而非單一只有「愛愛愛不完」吧。

 

3. 自我中心、強調個人經驗感受

普通話詩歌(甚或是新派廣東話詩歌都是),都著重於自我中心、強調個人經驗感受,而缺乏用宏觀環視信仰真象的視角。例子之多,不能盡錄,以一首其實很動聽的詩歌「禱告」為例

禱告,因為我渺小;
禱告,因為我知道我需要明暸,你心意對我重要。
禱告,已假裝不了;
禱告,因為你的愛我需要;
你關懷,我走過的你都明白。

是的,很Touching、很入心、我都知道。但在歌詞中,「禱告」的內容變得只與自己有關,身邊人呢?社會呢?其他國家的需要呢?萬一我「感受」不到上帝很「明」我,咁又點算呢?更危險的是,新一代的信徒就是靠這些詩歌餵養長大的。當自我無限放大、個人感受主導,這樣的信仰根基面對著當今複雜的社會議題全然顯得薄弱無力。新一代的信徒,靠著如此自我為先而單薄的信仰,自是愈加逃避、愈加離地。

 

4. 經過無數商業包裝的歌曲發佈會

每年暑假,幾個大型敬拜隊都會做亞洲巡迴演出(認真有錢…),讚美之泉呀、約書亞樂團呀等等都是基督教圈內較為人所知的;當然,唱廣東詩歌的亦有時會有演出(演出?),但明顯未成氣候。巡迴演出的大概流程都是這樣的:敬拜、敬拜同敬拜、再敬拜同敬拜,之後敬拜再敬拜,然後講道及收奉獻(重點!!!!),再敬拜同敬拜、同再敬拜、完。熱烈的唱k氛圍,大圍都好似好投入等等,都成為一眾基督徒藉以Boost Up一下靈命的安慰劑。

究竟有幾誇張?筆者曾有次幫手做義工而去(我不會俾錢入去…),一大顆人在帶唱者的帶領下,不斷大叫「我相信!」相信乜?原來是要「相信有愛就有奇蹟」呀!下,就咁睇個題,同信仰可以差十萬杖遠,咁都俾佢入到位,不得不寫服字。其實,完場時真的想問問剛才大叫「我相信!」的人,知唔知自己喊乜_?

 

其實普通話詩歌不是都是壞的,只是本人認為需要有好的平衡,最起碼祟拜昤廣東話普通話詩歌比例拿個五五分吧。上述的事情,筆者曾經「冒死」進言,得到的是一位在上者這樣的回應:普通話詩歌好聽d呀嘛。筆者更曾試過在祟拜之時,帶唱者可能太順口了,居然連中間帶唱所講的字和最後的禱文都變成普通話。我當堂嚇左一跳,然後得啖笑:大佬,尊重下本土文化啦,而家我去左台福教會咩。

其實,真正的問題,是教會根本不認為這些事有問題。

 

作者:殷琦

殷琦
港大表達藝術治療碩士生、教院音樂教育碩士、港大主修中文中史。一舊蕃薯般的孤獨文青。做YouTuber、專欄作家(稿費...)、鋼琴老師、合唱團、作曲卻不懂用電腦編曲。總活在迷霧之中,怨氣太多,希望太少;與你和我一樣,在小小的香港同受壓抑、同唱悲歌、每天僅為生活掙扎求存。興趣在表達藝術治療、哲學、心理學、生活、音樂、藝術、政治、宗教等。小妹專頁:https://www.facebook.com/pages/YanKi/1002326119779241

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 104348
Date: 2015-04-14 04:08:01
Generated at: 2021-10-28 02:49:23
Permalink: https://www.vjmedia.com.hk/articles/2015/04/14/104348/敬拜的反思:即係點解成日要唱普通話詩歌呢?