麻甩聚頭，老老竇竇十居八九都係大排檔茶餐廳打邊爐咁上下啦，都係個啲野。
細個嘅時候，Admin我話我唔飲酒咖，當啲麻甩好型好勁好成人咁叫Jolly Shandy嘅時候呢，我就舉手嗌：「人黎，比支維她奶我丫。」
結果到左今時今日？Admin我除左拍枱講俚語嗌收皮之外，仲會自備酒水去開餐添。學子華神話齋，細個我夠話唔同女仔玩啦，大個我咪比女仔……
大排檔十碟小炒，九碟熱氣，丫唔係，係九碟有鑊氣。當中椒鹽系就係Admin嘅至愛。佢唔似避風塘系咁山頭主義，避咩風塘啫，你咪又係中華人民共和國不可分割嘅一部份。相反，「椒鹽」呢個牌頭就係低調，係深沉，係平凡中有器用。
我一坐低，menu都唔使check就叫左句：「服務員，來一客椒鹽九肚魚。」大家有無留意，椒鹽九肚魚一般黎講呢，都會好似好九唔搭八咁跟碟醋。Admin有個極度簡化嘅觀念，就係跟得醋嘅野呢，我都會試下夾意大利紅酒睇下得唔得嘅。
今次我就帶左支Caiarossa嘅Pergolaia 2006去會一會佢。
Caiarossa呢個酒莊黎自意大利中部Tuscany，宜家已經歸波爾多列級名莊Ch Giscours同Ch du Tertre嘅莊主所有。Caiarossa嘅旗艦酒「Caiarossa」由N種提子混合而成，非常有特色。不過今次我地飲嘅係另一支酒「Pergolaia」。
Pergolaia用嘅提子以Tuscany盛產嘅Sangiovese為主，只加入左少量嘅Merlot、Cabernet Franc等作為輔助。
呢支酒嘅一大重點，就係抵飲，百零二百蚊左右但係質素遠超呢個價格。當然唔會話好複雜好深奧，但結構相當完整而且味道有一定層次。
入口以成熟嘅紅色果實為主，布冧、櫻桃、紅桑子等，非常可口。同時散發花香、土壤、丁香等氣息。
之所以我會嘗試用意大利紅酒夾一啲一向跟開醋嘅食物，係因為唔少意大利紅提係有天然嘅高酸度，Sangiovese正是其一。
呢支Pergolaia亦唔例外，酸度充足，而由於已有一定陳年，入口並唔尖銳。單寧亦因為年月而融合得更加細緻。
呢支酒雖然未必會用黎出啲咩大場面，但飲起上黎，就非常之有親切感。我誠意推介比咁多位讀者。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年4月29日
