城大SU呀!退唔退聯,關你屁事咩!

 

自從學聯在雨傘一役之後,唔同大學都對撐唔撐充滿懷疑。好坦白,我已經離開咗大學多年,實在無咩資格去以年輕人角度寫學聯得失。不過,作為一個城大舊生,我真係睇唔過眼SU (學生會)嘅小學雞。

 

未讀過大學可能因為近年新聞,令大家以為大學學生會好巴閉。但其實除遇上大是大非(係大到六四同雨傘運動果種),否則歷年學生會同學生之間嘅最親密活動就只有選莊果陣。即係你一選完佢,就唔關你事,真係唔知選嚟為乜。

 

「我印象中讀咗三年,好似除咗每年有本記事簿之外,就係定時定候喺民主牆前,有本書派下囉。」

「派書係編委,唔係直接關SU事。」

「吓!咁有咩關佢地事呀?」

「咪就係阻住晒d學會做嘢。一唔用佢牌頭,又話無通知,又捉你咁囉!」

「Sor…!」

 

以上就係我同另一位同樣畢業咗好耐嘅舊同學對話。好明顯,其實咁多年嚟,選SU嘅人都只不過係貪威(玩),真係無咩實事做過。大家都係想畢業果時攞下嚟做reference、媾下女、有間房聚下、搵下小著數咁……心照啦!

 

點知去年雨傘一役,「英雄造時勢,時勢做狗熊!」學聯成為焦點所在,起初大家都覺得佢地巧威威。咁城大SU以為自己有份,威咗一陣就上晒頭,當正學聯係「巴打」就沾晒光咁。一班十零廿歲嘅大學生,無前輩嘅經驗,突然富貴就梗係土豪㗎!咪立即成班好似大陸d富商咁囉:「喂!我中央有人,我識姓周嘅!」

 

「頂!我點知佢比人抄家,仲要抄得咁快姐!」

 

香港(暫時)同大陸唔同,我地網絡好發達。一個咁出晒面嘅組織,如果有腐敗,係唔駛阿爺通知,都全香港知。咁好快學聯就被全港非左膠嘅民意抄家,不過都唔係指向個別大學學生會。係囉!所以當你大佬(著)數咗個光環比你之後,你係可以選擇唔去死撐。但威過一輪嘅城大SU,唔肯重歸原點,聽取學生意見。一遇退聯意見,心中大叫:「邊個攪我大佬,即係唔妥我!」

 

我係學聯的話,已先後被幾間大學唾棄,仲唔感動到咩體液都流晒出嚟咁講「好兄弟」咩!

 

嗱!咁就出事喇!咁就即係未聽學生意見,就主動代表學生立場。所以,就出咗咩黑布黑字呀、唔簽名去拖時間呀、趕宣傳人走呀……種種以為可以冷處理嘅「手段」。大佬呀!你班友攪活動都唔叻,就咪學共產黨玩手段啦!人地撚手段起家㗎!你有咩收買人心先?蛇齋餅粽呀?定果本爛鬼記事簿呀?乜都無,咁下場就梗係老土兼肉酸,比人爆料就預咗啦!

 

最笨係連攞著數都蠢過人!

 

人無完人,何況區區青年?貪心係人都有,否則經濟科阿sir多得你唔少,咩都唔洗教。今時今日,你唔好話我知大學生連六叉嘢(六千蚊)都無!我打死都唔信。但你地要貪都醒d吖!完咗學期臨別秋波先去旅行,就咩人都無仇報啦!唔洗有錢就趕住用晒佢掛?你班友去日本Happy果陣,無放相上Facebook?有的話,就係專登令人眼紅。我如果同你幾條友同班,我都唱你啦!死蠢!

 

結果,成班巧威威戰隊就變晒死狗。喺網上又話人欺凌邊個,人身攻擊嗰個。搏人同情原本係好計謀,但其實學聯同你非親非故,真係無必要撐。但既然件事已經有公共性,就唔可以威果陣扮超人,被人打果陣扮弱者。Come on!成年人,就要為自己講過咩負責。趁未投票前,認自己柒咗,之後公平處理,無人會再怪你地。反而到呢一刻都仲要攬住個爛鬼學聯,就真係唔知為乜。

 

其實大學生思想好單純,攪風攪雨嘅九成係壞人。好地地唔洗使咁多嘢,你地同學聯做埋咁多小動作,你咪就係壞人囉!

 

咁投票取向就會反而因為你班友做咗咁多柒事而轉變!

 

其實一開始,真係無人打算反SU。所有重大決定,回歸同學意見;你地係為同學服務,唔係學生領袖。

 

退唔退聯?關你屁事咩!

 

作者:之樂

之樂
常言道:「知足常樂」。只要凡事沒要求,那就不是最快樂嗎?於是,之樂樂於成為宅男一「枚」,睇睇女,寫寫字,足矣!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 105810
Date: 2015-05-03 03:35:11
Generated at: 2021-05-16 01:28:28
Permalink: https://www.vjmedia.com.hk/articles/2015/05/03/105810/城大su呀!退唔退聯,關你屁事咩!