失戀時,朋友講嘅野,聽下好喇!

(photo via cc Flickr user Satish Krishnamurthy)

(photo via cc Flickr user Satish Krishnamurthy)

 

分手初期,其實朋友扮演左一個好重要嘅角色。朋友會義無反顧咁陪你,睇住你喊,望住你個殘樣不離不棄,再加上其實你分手之後,講黎講去都果幾樣野,但佢地都俾無限耐性繼續聽你講再俾意見你。

但我想講嘅係,朋友嘅意見,聽下就算。佢地唔係你,唔知你個心有幾多掙扎,唔知你同個 ex 嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你,驚你亂諗啦。

 

我唔係主張叫啲失戀嘅人死唔放手,有時唔係你嘅就唔係你嘅,真正嘅 Mr. /Mrs. Right其實唔會咁對你。 不過講就易,接唔接受到就另一回事。所以,你依家可以做嘅,就係等時間過。叫你放棄你都做唔到,患得患失嘅感覺其實你知好難頂。但你放心,人喺辛苦絕望到一個程度,自自然然就會放手,情況就好似俾死燒咁,痛就自然縮手架啦。

所以朋友嘅意見,聽下就算,有佢地陪下,講下果個人壞話,至少令你心情平靜一兩日嘅,但聽完其實你都唔識放手,所以都冇謂逼自己。喺等嘅時候,鐘意做乜就做乜啦,盡力過就唔會有遺憾。冇野做嘅時候,出去跑下步,一黎令自己健康啲(失戀嘅你應該又失眠又冇胃口),二黎令心情好啲,日復日,遲早有日你就會放低。同埋,分手初期,基本上理智方面嘅能力係會大減,一切以感情感覺為主,個心好似唔受控制咁,但時間耐左,你慢慢就會冷靜落黎,理智亦都會返黎。

 

失戀嘅時候,其實係一個好嘅機會睇清自己同睇清對方。時間可以證明一切,愛情令人盲目,而失戀後,你會慢慢搵返原本嘅自己,睇清楚哩個人係咪適合自己,可以相守一輩子。如果唔係,就算俾你好彩一齊返,只會分手復合無限loop。你要記得,喺你未識佢之前,你都係一直咁過,雖則「曾經滄海難為水」,但每次分手,其實你就學識左某啲野,分多幾次手,其實你就會知,分手係戀愛嘅過程,就好似生老病死咁,分手其實都冇咁大不了。

願意付出嘅你係幸福嘅,因為你可以將你嘅好,轉交一個珍惜你嘅人,你失去嘅係一個唔珍惜你嘅人,而佢失去嘅,係一個為佢付出同愛佢嘅人。

 

但你要記得,要為自己做嘅每一個決定負責,唔好靠人幫你諗點算,唔好人地講乜你就做,自己諗清楚自己想點,每個人都會經歷挫折,你都唔例外。

所以,唔好旨意你睇完會有乜得著。每人有自己處理問題嘅方式,每人嘅情況都唔同,我又唔識你,又唔知你嘅故事,更加唔係你嘅朋友。朋友嘅意見都只可作參考,更何況網上文章,嘿!

 

作者:壞孩子

壞孩子
壞孩子不會永遠出錯。 我多愁善感,就是喜愛用文字來表達心中的細膩,你愛也好,不愛也罷,我就是我。Facebook Page:www.facebook.com/giuiti

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 106464
Date: 2015-05-11 15:53:23
Generated at: 2020-10-21 11:59:27
Permalink: https://www.vjmedia.com.hk/articles/2015/05/11/106464/失戀時,朋友講嘅野,聽下好喇!