無興趣、懶求真:屈穎妍的忠實讀者群

屈穎妍

 

屈穎妍女士今朝嘅早餐,肯肯定係誠實豆沙包。所以佢自爆咗究竟佢啲文係寫畀邊啲人睇。只要當你睇新聞嘅時候,符合以下特徵:

「無興趣聽對話內容」
「無興趣找答案」

你就係佢嘅target。就係因為你哋乜都冇興趣,懶得求真,單憑表面就先入為主,咪覺得所有嘢都係後生仔亂嚟,睇唔過眼囉,總之講粗口就唔啱啦。屈女士嘅文,都唔係一味得個屈字嘅,至少佢好忠實地反映你哋嘅想法。

早幾日學生狙擊浸大校長候選人錢大康同浸大校董會,令浸大要延遲校長委任,並且承諾搞多幾場諮詢會。然後屈女士就問,「世上哪個地方選大學校長是要問過學生的?」哦,如果真係咁,咁仲搞諮詢會做咩?諮詢會遍及教員、學生、校友以至其他職工,原來只係扮民主?

都係果句,屈穎妍女士好清醒,好清楚自己嘅讀者係邊啲人,就係乜都冇興趣搞清楚只憑「常理」就判斷嘅人。

 

2015年5月18日,晴報屈穎妍《心筆在妍》專欄截圖

 

係囉,邊有話學生決定校長人選嘅啫?說好的尊師重道呢?一間公司老細請咩人都係佢自己決定架啦,學生又唔係幫大學賺錢,佢地只係浪費緊納稅人供書教學嘅錢,去搗亂去佔領,仲憑乜嘢要話事?

事實係,〈香港浸會大學條例〉第15條(1)(i),有關校董會組成,「大學學生會當其時的會長,為當然成員。」學生會會長以全體學生嘅代表身分坐入校董會參與大學決策,包括選任校長,白紙黑字天日昭昭。當然,實際架構上,學生代表響校董會人微言輕,但係校董會有學生成員嘅原意,就係尊重大學生作為成年人響大學裡面嘅角色,佢哋唔再係對老師唯命是從嘅學子,而係獨立自主嘅學者。

有幾多屈穎妍女士嘅讀者知道、查過、諗過呢個咁簡單嘅point?定係總之鬧醒呢班無賴後生就值得去睇去share?

無知未必係罪,肯去學肯去睇,令自己唔再無知就得。

但係利用人哋無知去達到自己目的嘅就係人渣。講完。

 

作者:慶生

慶生
慶生,唔係好乖嘅基督徒,前中學教師,篤爆匯豐錯版100蚊紙始作俑者,曾經留學日本,而家係freelance日語教師。 此外亦係行動不便嘅拐杖友,最近新寫專題:「椅杖遊蹤」系列,希望喚起大家關注呢個常人唔為意嘅咫尺天涯。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 106988
Date: 2015-05-18 15:38:09
Generated at: 2022-12-06 13:03:04
Permalink: https://www.vjmedia.com.hk/articles/2015/05/18/106988/無興趣、懶求真:屈穎妍的忠實讀者群