為左懷仔好,應盡快遣返

政治 / 最新文章綜覽

肖友懷 偷渡

 

老老實實,就係覺得佢可憐、想佢生活得好啲,先要將佢遣返。你俾個居港權佢,佢喺香港就會生存到嗎?件事俾傳媒報到咁,社會迴響大到咁,佢繼續留喺度會有安樂日子過咩?又,佢12年黎冇接受過任何教育(而佢阿婆亦應該唔識做home schooling同冇請過家庭教師),留喺呢個乜都講讀書講補習講考試、啲BB由2歲開始就有狀元培訓班嘅社會,佢生存到咩?

 

想生活得好,識揀一定唔好揀香港。香港有錢?啲錢係用黎幫外人埋單嘅,再多嘅錢都會燒完。香港文明?文明嘅人係唔可以指責不文明嘅行為,因為你一講就係唔包容就係排外法西斯,到最後文明係會被不文明吞噬。

揀香港有乜為?香港人只係賤民,你俾個證佢(賤民證黎喎),佢並唔會過得好啲。佢只會變得人唔似人鬼唔似鬼——香港人打死都唔會認佢,仲會設法排走佢,佢一定會覺得被欺凌,佢會抑鬱,佢會癲;中國人亦只當佢係一般香港賤民,到中國人全面佔領香港嗰時,佢係乜都分唔到的,佢冇得扮恩主,只能夠同云云香港賤民一樣買唔到樓、個仔冇奶粉食。

 

有啲人話,佢冇證就冇身份(identity),一個人冇身份就好慘,會唔知自己係邊個,會有身份危機(identity crisis),會迷失,會混亂,會諗埋一邊。我想講,你俾張證佢都唔代表佢搵到自己身份。如我上面所講,佢留喺香港,既唔被香港人接納亦得唔到中國人認同,被兩個族群所唾棄,先會構成真正嘅身份危機。

唔好以為幫佢攞到個證係為佢好,咁樣完全係愛佢變成害佢。你以為佢黎喺香港就有保障有福利可以生活得好?連我地土生土長嘅都生活唔到,佢論學識論技能論視野都如同白紙,佢點生存?靠搣津貼搣福利?佢呢啲已經暴露喺鎂光燈下嘅人,愈搣就愈會被狙擊,你覺得一個9年黎都冇出過街同人相處嘅人,有冇足夠嘅IQ、EQ、AQ去面對呢種壓力?我都幾肯定佢冇。

 

真係想佢將來仲有路行,係應該將佢遣返。中國13億人冇人會留意佢過去9年去左邊,冇人會標籤佢刁難佢。你送佢返啲二三線城市甚至去鄉村過渡下,佢12、13歲入學都唔算太遲(所以梗係唔係講一線城市啦,一線城市嘅競爭都好癲的)。大不了,佢真係跟唔到學校教育嘅,仲可以去種田,種田都可以生活到,又或者分分鐘中國政府要用佢嘅地發展,賠百幾二百萬過佢(我真係識有中國鄉鎮朋友係咁),佢仲可以黎香港消費享受下做土豪嘅感覺,自我形象全面提升。

為佢好,送佢走啦。佢細個,唔知留喺香港有咩可能嘅後果,唔知留喺度仲困難。你班咁大愛嘅大人,幫佢諗多幾十年,諗遠啲,唔好害佢啦。

 

PS:我係從一個youth worker角度去睇,個現實就係呢個細路冇可能喺香港生存到。當年嘅Betty同而家呢個懷仔都係夾硬黎,兩個都唔應該留喺度。但如果你講現實環境,Betty當年千方百計R到書讀,係有讀過書而且讀得好好,喺呢個咁功利既社會,佢有沙紙、有學歷、有專業,佢係點都搵到飯食的。而呢個懷仔呢,就乜都冇嘅,佢點生存?
 
我而家就係講youth development啫,就係咁。其他野其他人講左好多,我唔認為我需要補充或拾人牙慧,我重複人地講嘅野要你睇,係浪費大家時間。

 

作者:Grace

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 107300
Date: 2015-05-22 12:32:08
Generated at: 2021-07-27 17:25:19
Permalink: https://www.vjmedia.com.hk/articles/2015/05/22/107300/為左懷仔好,應盡快遣返