【中伏系列】今日有嗰12歲肥仔入咗嚟我間小學讀…

肥仔

 

我叫小咪,七歲,一個好普通嘅小學生。雖然每日放學都會畀媽媽捉去補習同上埋啲根本無興趣嘅興趣班,但整體上嚟講,生活都算係幸福同自由嘅。

然而,我嘅小學生活,直到一個人嘅出現變得不再一樣。嗰朝班主任時間,黃老師帶住個好大份嘅肥仔走入嚟課室。本身,見個肥仔著住件「Eat,Sleep,recycle」衫,我仲以為係提早上健康教育堂,想借呢個人板提醒我地健康飲食同運動嘅重要性。

但原來…

 

「啦~各位聽住啦,由今日起,呢位逍同學就係你地嘅同學仔啦。」

「吓~?唔係嘛!」嗰陣全班同學都好驚訝。

「因為各種原因,佢十二歲先入到學,所以你地會見到佢係比較大個。」

「十二歲?邊到似十二歲呀?睇過?」我隔離位杰仔笑住講。

「咁到底係咩原因呀老師?」我好奇咁舉手問。

「一男子因素啦~好難喺到交代架。」

「哦~」

「總之,我相信你地好快就會打成一片,成為好好嘅朋友~」

 

本來頭半個月,真係好地地架。可能係電視上面成日都出現嘅關係,佢成日都會帶啲糖呀汽水呀俾我地飲,表現到自己好珍惜呢次機會。但去到一個月,當電視同報紙都再無佢份嗰陣,佢嘅態度突然一百八十度轉變…

 

「你飲得我嘅汽水,你就應該要識感恩!」

佢開始要啲同學幫佢做功課,仲反過嚟要佢地買零食。為咗要佢開心,同學仔仲要夾埋自己零用錢去買鐵路玩具,仲有機場玩具上貢俾佢…唔願意服從嘅,佢就會用到「拳頭外交」。正如黃老師所講,我地今次真係「打成一片」。

我試過同杰仔一齊去同黃老師投訴,但結果竟然係咁:

「杰仔,小咪…大家有緣做得同學仔,就要學識包容架啦。」

「吓,但係…」

「聽講你地諗住要用激進手段,話要佔領小食部,咁會好影響小食部生意同學校聲譽架…」

「但如果…」

「總之,唔想全校一齊輸嘅話,呢個同學仔就要袋住先架啦…」

雖然我仲細,但我真係覺得黃老師呢番說話好奇怪,有種講唔出嘅荒謬。

 

點都好,肥仔佢唔單止無跌落渠,仲變本加厲。有次,我見住杰仔中咗肥仔一下棍訓喺我面前,我終於忍唔住喊住同屋企人講我頂唔順…

嗰晚,我喺房入面,聽到爸爸同媽媽嘈得好激烈…

「個女係唔開心咪轉去第二間讀囉!又唔係無錢!」爸爸大聲講。

「我都想轉呀!但今時唔同往日,香港已經唔同哂啦!」媽媽反駁。

「唉…鬼叫當日我地唔出聲咩。」爸爸聽完無奈咁講。

當時,我真係唔明爸爸媽媽所講嘅係咩意思。但最後,我都係轉咗去第二間小學到讀,雖然係好唔捨得杰仔,但一日有個肥仔喺到,我嘅小學生活都唔會過得快樂。

轉到去新小學,我過咗個猶如重獲新生嘅一星期。本來,我深信之後嘅日子都會好開心好快樂,估唔到…

「同學仔,唔好嘈住,今日想同大家介紹新同學…」

嗰日朝早班主任時間,成個場面都就好似似曾相識一樣…

「你地入嚟啦~」

今次仲要係三個…

「佢地分別係阿貢,阿橙,同阿當,我相信你地一定會打成一片架~」

 

嗚嗚嗚…今次真係中伏。

 

 

作者:有心無默

有心無默
故事星人,以心來描繪一個世界。小說《成為外星少女的導遊》現已登陸各大書局。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 107315
Date: 2015-05-22 18:41:53
Generated at: 2021-06-16 16:04:28
Permalink: https://www.vjmedia.com.hk/articles/2015/05/22/107315/【中伏系列】今日有嗰12歲肥仔入咗嚟我間小學讀