點解港大最少人支持建設民主中國？因為多大陸人囉！

《明報》今日有個調查話大學生仍然有過半數覺得香港人有責任建設民主中國，但睇返每間學校嘅數據，港大竟然得17%支持！班所謂本土派就梗係好雀躍，話咩港大走得最前啦，但只要睇多啲數據，班所謂本土派就中晒伏啦。

當班所謂本土派仲喺度圍爐慶祝時，有心水清嘅網民即刻質疑，港大個支持率咁低，會唔會係因為大陸人特別多？於是我上教資會睇下啲統計數據，果然不出我所料，港大啲大陸學生真係最多！2013/14年度入面，13952個港大學生入面有成2863個大陸人！多過晒其他院校！

咁樣睇，一切都解得通。陳偉業都講過，港大退聯成功大陸專才「居功至偉」，港大得返咁少人支持建設民主中國，其實都係同一原因。呢班喺專制政權底下長大嘅學生，根本唔知咩叫民主，亦覺得冇需要有民主，自然唔會覺得要搞咩「建設民主中國」，因為呢啲大陸嚟嘅學生根本就唔覺得大陸需要民主！佢哋根本係中共嘅幫兇，而中共最想學聯散，咁亦解釋咗點解港大會退到聯，蕭若元一早講過港大退聯背後有中共嘅動員，又再一次獲得引證。

香港係保存六四火種嘅最後之地，而香港亦同大陸唇亡齒寒，所以有建設民主中國嘅責任，而家越黎越多大陸人落黎，令到支持建設民主中國嘅人越黎越少，情況實在令人擔心！港大嘅例子好清楚咁話咗比我哋聽，越多中國大陸嚟嘅學生，就越少人支持建設民主中國，要喺學界保存建設民主中國嘅精神，就一定唔可以再比咁多大陸學生落黎！

雖然而家學界支持建設民主中國嘅比率仍然過半，但再係咁樣比班所謂本土派搞落去，同繼續比咁多大陸學生落嚟，六四嘅精神遲早會失傳。學陳倩瑩話齋，唔為民主中國付出，我哋就唔配有民主！今年六四，維園見！

作者：同中伏

閱讀後覺得好，請多多讚好及分享～：）