見鬼倒胃的節目預告

 

最近打開電視,睇到《食平3D》個預告,都有想打爆電視機的衝動!

以往的電視預告是這樣的:剪碎該集內容,配上點題旁口,然後講埋節目名同埋幾時播,就係咁簡單;但唔知 TVB 由幾時開始,D 節目預告開始抄人家的做法:直接抽取其中一節完整播出,沒加任何旁白,然後 KEY 上節目名稱及播出時間便完了。

咁樣做當然無問題,如果該段預告是精華,真係好睇的話。

 

最近很多劇集都是以此方法 promo,坦白講,套劇無睇開,唔知 d 乜野角色忽然出現在熒光幕上,chit chat 幾句唔知有乜意思的時候,就已經去第二個廣告……望著電視呆了一呆,方知道原來剛才那個是劇集預告,無頭無尾九唔搭八,對白又不見得有甚麼睿智、精警、gimmick,真是他媽的給你浪費了思考和時間。

沒想到在這個效果功能表現上,《食平3D》更要命!

我知道肥媽和陸浩明已經上契,是名符其實的「母子」;亦知道這個節目是採用這種 odd couple型式:一唱一和、一個願打一個願捱,只不過今次是惡母痴兒,雖然做阿媽的成日罵個仔,但其實最後大家都好好感情,成個節目溫馨到不得了。

唔好意思,我一 d 都唔覺得窩心,只覺得噁心!

 

之前在《Roadshow》寫專欄時都已經講過,陸浩明在初演《食平D》時,刻意的不停一輪咀狂講野,以為自己好有趣,已經令人,至少令我非常反感!

想不到去到第三輯,呢個情況無改善之餘,表現得更討厭!

由今輯開始,佢開始同肥媽玩亂倫母子 FEEL--個仔好鍾意媽咪,媽咪就成日碌起雙眼啤住佢,或無佢符只能出現交叉眼的表情。因此節目中不停會出現陸浩明大聲讚賞肥媽,或公開表達對她的愛,甚至無端端唱歌自我陶醉的場口!

頂你個肺,阿陸浩明先生你知道自己這個作為有多難頂嗎?唔該唔好真係將肉麻當有趣,骨痺變成快樂事丫大佬!

這又是一次自我感覺良好的完美示範,歸根究底,都是一台獨大所致--我做乜播乜都有人睇、有收視,何需真正去了解觀眾的喜好,只消做一些自己覺得過癮、好笑既野就得啦!正所謂理 x 你感受!

只是,這種節目結構方式,實在 out 得太緊要!好鬼死舊,一點兒也不覺得好笑!

 

至於節目主題:《食平 D》今集仍然有貫徹,不過我聽好多朋友講:(1)現在已不會有很多大家庭,通常得一家三四口,唔會餐餐煮剩好多菜,所以佢果套剩菜重生法其實現實生活唔會好 WORK;另外 (2)有朋友媽媽真係照佢某一集教的方法煮(唔記得是用涼瓜煲湯還是甚麼?),跟著發現--非常難入口!

當然,你可以話佢廚藝不精;但真係抱歉,我到今天仍然唔會覺得肥媽煮野會好好食;始終由廚變演,同由演變廚,是會有點先入為主。

 

最後我有日無意中看了片尾 roller credit,看見那集的導演是我的一個好朋友,那刻我在想,有一天真的要好好問他個明白,究竟肥媽母子檔這個組合及出來的效果,他本人是真心覺得好笑有趣,還是因為工作理由而貫徹執行?

我希望是後者。

 

 

 

作者:反一台獨大聯盟

反一台獨大聯盟
一台獨大,扼殺選擇,是對香港觀眾的最大欺凌!我們決定號召市民力量,爭取電視市場百花齊放,讓觀眾可欣賞更多元化的節目!向「一台獨大」說不!TV Bully No More!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 108084
Date: 2015-06-03 03:05:24
Generated at: 2022-07-07 04:00:54
Permalink: https://www.vjmedia.com.hk/articles/2015/06/03/108084/見鬼倒胃的節目預告