「如果失敗左呢?你覺得會唔會有下一次?」

 

【有雷慎入】岩岩執房既時候,係檯底搵到一個好耐好耐好耐好耐無用過既袋,一打開,就見到呢堆東西,情不自禁諗返起好多野。不敢忘記,害怕回憶。我打呢段野肯定又比人話我做咩勾起人地既悲慘回憶,你唔想既話睇到呢句好停喇。

 

有好多人將雨革當成香港人的感動回憶乜乜物物,其實我都唔明有咩好紀念,呢場根本係慘痛既夢,兩個字—失敗,你有無見過人會慶祝失敗?呢半年我都越黎越少講政治,黎黎去去都係派下膠,專心搞風月亭同大家風花雪月。老實講,我真係好心灰意冷,大家投放左咁多心血,無咩成果可言都算,最可怕係,香港人理應係雨革入面見識到呢個社會有幾咁殘破不堪,但大部分人都仍然無動於衷。七警而家點?打佔領者果班人又點?落order放催淚彈個警官又點?亂鳩咁噴胡椒既警察又點?無,乜事都無。

 

兩三個月前有次係金鐘搭巴士,經過放第一粒催淚彈果個位我真係想喊,果個畫面我呢世都忘記唔到。當時係全無心理準備之下佢放左第一粒,我企既位置大約就係粒彈既十米之外。果陣驚到我死,索左唔少氣體,喉嚨痛到不得了。好多人尖叫同喊,大家係咁跑跑跑,當時既金鐘完全變成一個我無法想像既地方。我唔明點解有班人可以成日開口埋口要紀念雨革,話呢段回憶係香港人的驕傲,好感動乜乜乜。好老實,我完全唔會諗起大家一齊著住個電話揮舞唱歌好團結,或者成班人叫口號果下有幾咁振奮人心,我腦海入面只係得放催淚彈既恐怖畫面,班警渣打示威者打到pak pak聲,仲有空氣中飄散既胡椒氣味……

 

有一晚訓街,同一位朋友傾計:

我:「你覺得會唔會成功?」

佢:「唔知,唔敢答。」

我:「如果失敗左呢?你覺得會唔會有下一次?」

佢:「咁多巧合加埋先變成咁大規模,大家都無諗過會變成咁。如果衰左,我唔覺得仲有下次機會。就算再出返黎,又可以點?」

 

如果你問我係咪好似佢咁絕望?我又未至於去到呢個地步,但我覺得呢段回憶真係好傷,甚至到而家都復原唔到。大家投放左咁多時間心機,訓街的訓街,流血的流血,但普選仍然是假的,應該落地獄的仍舊逍遙快活,這是革命中不能承受的痛。

 

你Like左風月亭未?

 

 

作者:婷欣

婷欣
你好,我係風月亭亭長:)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 108398
Date: 2015-06-07 02:02:30
Generated at: 2020-10-31 18:55:35
Permalink: https://www.vjmedia.com.hk/articles/2015/06/07/108398/「如果失敗左呢?你覺得會唔會有下一次?」