一台獨大,咁又點啫?

一台獨大,咁又點啫?
Posted by 反一台獨大聯盟 TV Bully No More on Monday, June 8, 2015

 

昨晚無意中看了李思捷的《今晚睇李》,因為容祖兒和李克勤就黎開演唱會,所以兩個曾上過去的嘉賓「又」上多去一次。《今晚睇李》由始至終都是宣傳機器,擺明車馬劏鱔,老實講,完全無談論價值。

反而昨晚那集加了個新環節,叫做「咁又點啫?」,我覺得又真係幾好笑,唔係講嗰個環節做得好笑,而係李思捷好像代表TVB,向觀眾作出嘲笑(仲要吐舌嗰隻):「一台獨大,必然架啦!…」

「咁又點啫?」

你做得乜野?你奈得佢咩何?!

 

的而且確,一台獨大是必然發生的事,如李思捷所講,佢個節目都做左近半年,儘管收視不濟,口碑賤過地底泥,係人都知佢抄外國節目,佢本人亦擺到明借助呢個平台去 x果d在網上 x佢的網民……但依然面不改容繼續做落去,繼續低級趣味講鹹野講老母,連搬去四廠都要同觀眾分享(關人鐵事咩?) ,簡而言之,做乜都得,因為我鍾意!吹呀!

同埋我做乜,你都要睇,因為你冇選擇!

選擇唔開電視機咪得囉……我都唔睇電視既……很多人都有同我講,話搞「反對一台獨大」其實意義不大,因為這個現象根本改變唔到,你反對一台獨大,最簡單做法,就係唔睇電視。

首先有些事,有人支持有人反對有人欣賞有人睇死好合理,不能說認同理念的,就是才智過人洞悉世情,屬神的級數;相反不支持的就是契弟,唔該行遠 d。我個人對於有人不支持這活動,都抱開放態度,因為就如睇電視一樣,人,是有自由,有選擇的。

但如果面對一台獨大,最後採取的態度是「我唔睇電視」,我就覺得有 d奇怪。因為大氣電波屬人人擁有,大台利用呢個平台,即係你有份既野來搵錢,你可以拱手相讓、視若無睹咁有趣既?點解唔會去諗令呢個平台開放,引入更多選擇,可能會有新發現同驚喜都未定。

反一台獨大不會立竿見影,但我相信持之以恆,必有所成。

 

日前電視界老前輩蕭若元先生接受雜誌訪問時,表示無線霸權會兩年內終結,因為近呢幾年,傳統電視媒體的對手,已經不止是收費電視,還有電視盒子,來自全世界的競爭!

雖然在免費電視節目上,香港觀眾的選擇仍是遙遙無期;但其實只要行多一小步,不管是用盒子也好、付費也好,即係只係比開電視開多一兩粒掣,就可能會更多其他的新選擇,至少唔駛焗住睇死唔斷氣的大台節目咁眼冤。

當然,你話咁咪即係唔係免費?那就要視乎對方的收費是多少,可以提供的節目又值不值得比錢買?消費者是有選擇權利的,起碼,多一個選擇,總好過無選擇。講緊,消費者是可以選擇唔買的。

到時大台就不能再牙擦擦講:「咁又點啫?」!

至於本文的主題,亦即是那個新環節,其實真係冇乜好評論的地方,因為所謂遊戲方式,就是任何一個人,講句乜都好,跟著就會成個畫面出 flip:「咁又點啫?」,然後就完了。就係咁,喂,有甚麼戲劇效果?爆笑效果呀大佬?我睇完佢「示範」左幾次後,只能O嘴!但跟著,也不再多想了。

因為真係為佢再諗多一句半句背後懸念同創作動機,都會影響前列腺健康!

 

 

 

作者:反一台獨大聯盟

反一台獨大聯盟
一台獨大,扼殺選擇,是對香港觀眾的最大欺凌!我們決定號召市民力量,爭取電視市場百花齊放,讓觀眾可欣賞更多元化的節目!向「一台獨大」說不!TV Bully No More!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 108606
Date: 2015-06-09 17:43:38
Generated at: 2022-07-05 15:13:46
Permalink: https://www.vjmedia.com.hk/articles/2015/06/09/108606/一台獨大,咁又點啫?