阿里維基一進一退 流行文化一國一制

王維基

 

端午節,有冇朋友同你講「端午節快樂」或者要「慶祝端午節」?希望冇。別讓屈原不開心。端午節,係紀念呢位愛國愛到投江自盡嘅詩人架嘛。(雖然以另一位姓屈嘅香港女寫手嘅邏輯嚟講,復活節同聖誕節都係慶祝愛世人愛到自願釘十字架嘅耶穌架啦,「慶祝」端午節根本冇問題。)

講到紀念偉人,賴叔近排諗起兩位:邱德根同邵逸夫。邱先生三個月前仙遊,喺佢治下業務登上高峰嘅亞視,喺半個月之後不獲續牌。邵爵士年半前駕鶴西去,其創辦之無線電視最近承認同阿里巴巴旗下嘅「娛樂寶」合作,將會攜手拍電影拍電視劇。(《大公報》報道連結在此

 

表面上,亞視夕陽西下,無線東山再起。同馬雲合作喎!睇下香港嗰啲畀阿里巴巴買起嘅殼股,隻隻都升成倍架。打入大陸市場喎!十四億人(Okay, 1,400,000,000 咁多人)嘅市場, 1% 嘅人肯睇你,廣告費都賺到兩世無憂啦。

表面上,好似真係咁。無線(上市公司名稱電視廣播)股消息公佈之後,開市應聲彈高 3% 。

表面上,事情好簡單。 TVB 唔拍港劇,咪由佢囉。大家最近一次睇無線劇集係幾時?唔好答我《大時代》,答我睇首播嘅劇集。《華麗轉身》?《武則天》?就賴叔嚟講,對上一次睇嘅無線劇集要數到 2013 年尾、黃子華主演嘅《 My 盛 Lady 》。係囉,大家後生仔女都背棄無線架啦,上網睇香港電視嘅劇集先係路架嘛。

問題係,王維基已經決定閂上電視劇製作嘅水喉。《蘋果日報》星期六報道, HKTV 播埋剩低嗰五套劇集就係咁先,今年九月尾之後以大陸劇集維持網購運作。就算《導火新聞線》成為一時話題,《警界線》曾經好多人想睇,《來生不做香港人》廣告賣到搭地鐵都睇到,營運數字呃唔到人。王維基唔係大慈善家,既然自家製作電視節目苦無出路(一男子因素,你仲記得架可?),全力搞好網購平台以免全軍覆沒,係唯一理智嘅選擇。

 

一個星期之內,無線棄港投陸,由本身自主決定拍乜題材、點樣拍、捧紅邊個,到同阿里巴巴共同決策,「迎合內地觀眾及粉絲需求」。港視棄守城池,一心想做香港人嘅電視台,到最後支持唔住搵真銀做貿易。呢兩個消息,雖然點都唔夠「八比廿八」、「等埋發叔」 呢場政治鬧劇咁爆咁 Juicy ,但對於香港流行文化嚟講,影響其實一樣深遠。

係, The City is Dying 。但《天與地》製作班底透過公仔箱話畀大家知,無功都有勞。係,無視越嚟越多劇集講普通話、返大陸拍,但自甘墮落都係自由意志嘅體現,第時畀人牽著鼻子走(甚或捏住春袋行),就真係連葉劉都不如。人哋「跟大佬(民建聯)離場」都係個別事件,其他議題都總有自己嘅立場。至少葉劉係咁講。

無線阿里「合拍劇」會係點樣樣?其實電影圈嘅「合拍片」已經有辦你睇。舉個例,你以前睇周星馳《審死官》、《逃學威龍》、《食神》好過癮?合拍片《長江七號》你又點睇?以前睇賀歲片有《家有囍事》、《大富之家》,近年嘅《家有囍事 2009 》、《最強囍事》以至《浮華宴》,你鍾唔鍾意?香港電影圈最高榮譽嘅金像獎,近年得獎嘅合拍片《投名狀》、《十月圍城》、《黃金時代》,同香港代表《打擂台》、《狂舞派》比較,你又鍾意邊樣多啲?

「合拍」,唔係話香港嘅人才同大陸人合作咁簡單。從合作模式分清莊閒,到劇本規範到語言選擇,統統都唔再係香港人「高度自治」、「當家作主」。喺有奶便是娘嘅世界,王晶嘅《澳門風雲》喺大陸票房超過三億人民幣。識撈,就係咁簡單。香港嘅核心價值? No la ,「大家都是中國人」嘛。由香港打出國際嘅成龍更加直接:「根本就冇港產片」

你話王晶同成龍忘本咩?佢哋同你講中港融合係大趨勢。而家無線同阿里聯手,正正係融合範圍由電影擴闊至電視劇。假以時日,電視劇集隨時普通話多過廣東話,大陸演員多過香港本土演員,仲想有好似《卡拉屋企》、《香港 82 》嗰啲貼身民生、諷刺時弊嘅處境劇?你諗都唔好諗。今時今日《東張西望》以娛樂包裝時事新聞,軟性輸入正能量同政治正確嘅訊息,將來三線劇集都照辦煮碗、符合大陸官方審查, How Hard Could it Be?

 

無線新聞部已經自我閹割咗好撚柒鳩多年,而家連劇集都閹埋。另一邊廂想入場嘅維基台就畀一男子隻手阻擋,無從進入市場競爭。嚟緊有免費電視牌照嘅「香港電視娛樂」(即係李澤楷嗰個)打響頭炮嘅《衛子夫》又係合拍劇。香港電視台同劇集,名副其實「嗰頭近」。

或者你會話,「唓,我最鍾意睇韓劇架。」品味高啲嘅,可能選擇台劇、日劇、美劇、英劇。品味低啲嘅,或者唔介意睇大陸劇。但香港劇集,以至香港流行文化都曾經風光過。繪炙人口嘅劇集何其多,從大家瘋狂重溫《大時代》同《他來自江湖》就可見一斑。賣埠嘅港劇,可以殺入東南亞,遠至美加澳紐華僑社群。

進一步講,香港人嘅身份認同,有部份都係透過電視劇集建立(連結為學者馬傑偉及吳俊雄撰寫嘅《普普香港:閱讀香港普及文化2000~2010(二)》);而家小學推行「普教中」,廣東話嘅生存空間日漸收窄,小朋友要聽到廣東話,除咗返到屋企同老豆老母講嘢之外,可能就剩低睇電視。日常生活用語係「蕃茄」定「西紅柿」,係「雞翼」定「雞翅」,係「老豆」定「老爸」,電視嘅影響都舉足輕重。如果連劇集呢個大眾傳播媒介都失守,大家嘅下一代都唔會再飲到香港文化嘅奶水,即使自稱「本土派」,亦徒具皮相。

大陸強國崛起,除咗講錢,仲講「軟實力」。雖然強國人嘅「國民外交」好失敗,但透過文化霸權去將香港「去殖」以至「赤化」就越嚟越成功。國民教育科「遍地開花」都只係面嗰浸,透過傳媒,由新聞媒體開始整肅,到而家連娛樂事業都逐步收編,從文化根本上將香港同大陸拉埋一齊,先至係「人心回歸」、「國民身份認同」嘅成功要素。

之前有人話,「今日香港,明日台灣」。台灣何嘗唔係喺文化上備受大陸統戰?立場親共嘅中天,廣告固然有旺旺同簡體字,就連節目內容,亦有兩岸融合嘅元素。例如話,《大學生了沒》近年就多咗兩岸學生上課 / 生活大不同嘅環節,用和諧嘅軟化手法話畀台灣觀眾聽,大陸學生嘅習慣係點,大家要互相包容互諒互讓……

 

係,香港近排關於政改嘅花生係好好食,但始終係零食。長久嘅精神食糧,需要我哋關注。電視劇集拍攝成本鉅大,如果冇大水喉射住,確實難以長久持續。雖然近期《100 毛》衍生嘅《毛記電視》緊貼社會話題嶄露頭角,但背後一樣有萬華媒體射水。(萬華媒體嘅大股東,其實係明報企業,大馬拿督張曉卿嗰間。)香港嘅製作人點樣透過成本低廉嘅網上平台殺出血路,好似美國嘅 Netflix 咁製作出《 House of Cards 》……咦,維基台咪拍咗《選戰》囉?

如果照搬美國網上播劇嘅模式唔得,唯有希望香港嘅商人(尤其是王維基)扭扭橋。呢個已經唔係有冇得一人一票選一個被篩選嘅特首嘅問題,而係「香港人」作為一個身份、一個族群存亡嘅問題。

 

作者:賴叔

賴叔
我誤判,我恐懼。為咗將錯就錯,用嘲笑化解恐懼,我決定承認自己叔叔嘅身份~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 109419
Date: 2015-06-21 00:33:26
Generated at: 2021-06-16 15:07:26
Permalink: https://www.vjmedia.com.hk/articles/2015/06/21/109419/阿里維基一進一退 流行文化一國一制