廣西狗肉節 chinanews.com 圖片
所有操控其他動物嘅行為，包括食狗肉，我都覺得唔對路
四月尾討論過剪狗毛，染狗毛，以及動物絕育問題；有興趣可以睇返《分不清世人對於愛護動物嘅標準》前篇。有朋友仔inbox我，今日係玉林荔枝狗肉節，問我嘅睇法。
食狗肉肯定係錯，但點解錯，我有我嘅睇法。狗係寵物有人性，係人類嘅朋友，呢啲理由都冇恰當咁解釋食狗肉點解錯。
「人類作為動物，操控其他動物」，呢個先係食狗肉唔對路嘅原因。所有動物都係平等，人類雖然係高等動物，管理世界，但我地都係動物，有咩理由可以操控其他動物？
1. 將動物變寵物
「狗係寵物」所以唔食狗肉，呢個理由有啲牽強。將動物變寵物呢個行為本身就唔對路。
假設而家由狗統領世界，狗覺得人類呢種生物好cute，決定好似寵物咁飼養你。你想像下，要好似 ok 仔咁，日日畀 hand hand。好似cash咁畀鄺美雲拉你去皈依我佛同食當歸補身。好似忌廉哥咁辛勤，日日影硬照做月曆同出席大小公開場合。你 o 唔 ok？
點界定邊啲動物係寵物唔應該食？小學2年級，我買左隻雞返屋企，養左幾日，有一日訓左個覺，聽到慘叫聲彈左起身，原來呀媽劏左我隻雞。我當隻雞係寵物架，當見到我隻雞畀人斬開幾十件上枱，我喊到慘過睇雷雨。
2. 主宰動物嘅生育
人類係世界嘅統領，於是控制其他生物數量，決定邊啲動物可以繁殖，邊啲唔可以。我地覺得貓狗太多，唔好過度繁殖。另一邊廂，覺得熊貓太少，幫佢地交配。海洋公園隻盈盈冇仔生， 要扯佢同大陸熊貓交配。
3. 將動物變成賺錢工具
如果人類係珍貴嘅動物，例如北極熊或者紅毛猩猩；因為稀有而困喺動物園，收門票接受觀賞，收十蚊望我一野再不停用支長鏡影我，或者有線熊貓台咁，24小時真人 show 影我 eat sleep recycle，你 o 唔 ok？
如果你係一隻有表演天分嘅動物，好似莫斯科馬戲團隻獅子咁，日日烈火雄心咁入火海跳火圈。你 o 唔 ok？
甚至再衰啲，你係馬界保特，由於你跑得好快好快，畀田少個啲有錢佬買左你，日日畀個騎師SM，搵條鞭摑你「跑快啲跑快啲」。你 o 唔 ok？
–> 將動物變寵物，將動物變成賺錢工具， 幫動物繁殖，以上操控動物嘅行為，都唔會直接整死動物。將動物變食物就會直接整死佢，呢個亦係點解大家反應最大嘅原因。
–> 但我會問，點解豬比狗更抵死，更應該畀人食？因為佢智商低？如果用動物智商來衡量應唔應該畀人食，垃圾會33個走左去唔投票嘅人類，係唔係應該好似《天與地》個家明咁比人食？用動物智商將動物分等級，付予唔同待遇，呢件事好唔對路。
必須承認，我係好似好立克個班禽獸咁，「日日都食好多肉架。」，但我覺得食肉呢件事，人類有三個原則要準守。
一，你食個隻動物，會唔會令大部份人類有hard feeling先？好明顯食狗就係令人類好不安，點解要搞到大部份人唔happy？
二，人類絕對應該減少食肉，任何動物嘅肉都應該食少啲。唔只係道德嘅問題，減少食肉都環保啲啦。
三，真係要食，送動物最後一程，可唔可以唔好咁殘忍。例如活魚刺身，你食條魚姐，唔使食之前SM佢？SM條魚好食啲呀？
PS. 有啲大陸人話外國人批評佢地食狗，係唔尊重彼此文化，要抗議聖誕節食火雞嘅習慣。互相指責對方，「你先唔啱呀你」，呢啲行為同小學雞告隔離位過界有咩分別？高質素啲啦，討論下人類作為地球最高等動物，點同其他動物喺地球和諧相處，仲有建設性啦。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年6月22日
