點解上床一定係女仔蝕底?

(photo via cc Flickr user Peter Alfred Hess)

(photo via cc Flickr user Peter Alfred Hess)

 

唔好再用父權角度看待愛情、性愛,好唔好﹖

好多人看待性愛既觀點根本就有偏見。講到性愛就一定係「男仔著數,女仔蝕底」﹖蝕﹖蝕左係邊﹖港女同鬼佬上床,雙方心甘情願,男女都好享受過程,點解一定係「男食女」﹖

如果你話因為身體比人睇蝕哂摸蝕哂,掉返轉頭,個女仔都可以睇返男方條J,摸男方個Pat pat既啫。大家都係得一個身體,係床上面,男睇女,女睇男,好公平。

如果港女同鬼佬上完床,係唔享受,係唔舒服,就唔會再食啦。點解有啲港女咁鐘意同鬼佬做,就係因為享受、Enjoy、舒服、開心,咁咪食過翻尋味,食完又食囉。過程中好作賤自己咩﹖我一啲都唔覺。識得搵一個好既床伴,享受性愛過程,咁先係對自己好。掉返轉頭,如果港男或者Asian床技好,溫柔體貼細心,都大把鬼妹痴埋來啦。

我無話過鬼佬出書好岩,我只係問,如果男女身份倒返轉,大家又會點睇﹖係咪會覺得出書個個港女好威同埋鬼佬受到侮辱﹖

 

鬼佬出書講食港女 vs 港女出書講食鬼佬

如果前者反應係﹕「哇,港女真不要臉﹗」
後者反應同樣係「哇,港女真不要臉﹗」
咁就證明,邊個出書根‧本‧唔‧係‧重‧點。

有呢種諗法既人,並非關心本書內容係咪性別歧視、種族歧視、作者食完唱等等,而係本身根深蒂固地認為,係「鬼佬同港女上床」呢件事本質上,無論如何都係港女蝕底。呢個就係我所講既用父權角度看待性愛。

 

為左消除一啲有關種族既不必要討論,

試下設想以下情況﹕

港男A出書講食港女 vs 港女B出書講食港男

你會點樣看待呢兩個作者——港男A港女B
好多人會覺得,港男A雖然係口賤,但係都食女無數,真係勁~之類
而港女B……哇,Bitch、Slut、淫、蕩婦…
事實上,無論男女都係有性需要。但係D人唔會覺得港男A係淫賤,相反仲會有少少佩服佢。

 

為左再消除一啲關於「出書」既討論,(我唔想大家集中講咩趙完唱既道德難題)試設想以下情況,

Case 1. 港男C同港女D拍拖,過程好開心,上床,最後港男C講分手。

Case 2. 港男C同港女D拍拖,過程好開心,上床,最後港女D講分手。

先假設港女D唔係處女。

Case 1,會有啲人覺得,港女D好慘,蝕左比港男C。

Case 2,嗯……not big deal。

但係其實咁樣諗係好奇怪,明明分手之前發生既事係你情我願,雙方都enjoy,點解由邊一個講分手會掉返轉頭justify返發生係之前既性事﹖如果Case 1入面真係覺得個女仔蝕左比個男仔,咁點解Case 2又唔會覺得係個男仔蝕左比個女仔﹖呢個「蝕底」既觀念到底係建基於乜野﹖

 

當然,女人可能會係性愛後懷孕,增加風險。但係即使女方係一個做左結扎,200%唔會懷孕既人,係咪同人做愛就唔會「蝕底」﹖似乎會否懷孕唔係一個主要原因。

受生理結構、傳統文化觀念影響,我地總係覺得性愛上,男同女並非對等存在。但係我認為去到今時今日唔適合咁樣睇。女方都可以嘆好多仔,都可以係床上面head住男方。男方即使係床上面,都可以感受唔到樂趣。既然我地係談戀愛上要求性別平權,食飯AA制,女人都可以出去做野,男人唔應該包養女人…等等,咁我地都應該思考下性愛上既平權。

 

(DLLM好撚左膠FEEL。都話左我先係真‧女權主義者。係咪應該加返句「重奪女性性愛自主權﹗」做口號。)

 

 

作者:林璃蝶

林璃蝶
林璃蝶,九十後香港博客。活在記憶,迷戀過去,因此喜歡以文字記下已發生的一切。最新文章﹕《張先生,謝謝你來探望我,可是……》、《鳩夢想》、《點解香港人就係唔識欣賞魔術》等。 Facebook專頁:https://www.facebook.com/o.indicum

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 109797
Date: 2015-06-26 15:53:10
Generated at: 2019-09-19 05:34:37
Permalink: https://www.vjmedia.com.hk/articles/2015/06/26/109797/點解上床一定係女仔蝕底?