早幾日同班舊朋友喺沙田食飯，因為早放工嘅關係，我百無聊賴去左逛宜家。見慣世面嘅我充其量以為只會見到啲試梳化試成三粒鐘等老婆度個櫃嘅老公、熱戀中試床褥嘅中學生、咬住熱狗四圍走嘅小妹妹同埋不斷要愛回家嘅死肥仔。結果行行下，我響遠處見到對男女拎住件貨討論緊⋯⋯行過果時其中一個講左句令我幾上心嘅說話：「買啦！12蚊之麻！番到去唔岩咪掉左佢囉！」
曾幾何時，香港人靠雙手努力打拼，一家十口住二三百呎，買鞋買大兩個碼再攝報紙、老豆老母死都要呀哥細佬家姐細妹入同一間學校，因為可以著一樣嘅校服用一樣嘅書⋯⋯當然啦，好多時大家都唔係為環保，只係為咗慳錢先至咁做，但起碼真正物盡其用吖。
時代變喇，曾幾何時勤𡚒節儉嘅香港人慢慢富裕，當大家討論緊其他國家嘅人民帶住人仔去外國食自助山式自助餐，喺金鐘自以為帶住獅子山精神唱緊海闊天空，又有無諗過個生活習慣是咪越嚟越似口中不屑的暴發戶？
心諗：呢個唔＿係12蚊嘅問題呀！而係你促成左一件垃圾誔生呀！
資本主義社會為我地帶黎繁榮經濟，曾經有學生問我：「啲大公司搵咁多錢，點解仲要做咁多野搵更多嘅錢？」大家即時答案一定係「少年你太年輕了，你以為真的有這麼多人賺盡了就離場嗎？」事實係公司除左而家呢一刻嘅價值重要，投資者更睇重將來嘅價值。要令業務增長，每間公司唔可以只維持每年嘅營利，更要令每年營利增長，最好係大幅果隻！講白啲咪啫係想搵更多錢囉姐係！有時唔係每一樣野都只能兩極化，我唔會話消費唔好優惠唔好，但係大家比商人嘅計謀⋯⋯咳咳市場策略，令到自己亂買野就唔係咁好囉⋯⋯老老豆豆，12蚊可能係少數目，俾著係拎最低工資嘅人唔駛半粒鐘就搵得番呢個數，但係呢件物件嘅生產過程一定唔只半小時，響堆填區分解呢舊膠嘢更加可能要用半個世紀⋯⋯當大家鬧緊三堆一爐同探討緊核能發電問題時，希望大家都可以留意下自身嘅日常生活嘅消費同商業活動。我對於剛剛宜傢傢俬一折優惠大家的反應真係要引用番Cliffy 嘅一句：執輸行頭，慘過宜家。為左呢一折，屋企又有幾多有用物品要去堆填呢？如果重嬲緊一折貨品無你份，我誠意邀請你到大家遺忘咗N年嘅添美新村，你會明白咩叫做應有盡有。
同一件物品喺不同人眼中就有不同價值，今日去咗理大觀賞第一屆香港廢柴機械人大戰，啲機械人名真係好廢柴，但係創意和實力真真係絕對唔廢柴。最驚喜嘅係唔少廢柴機械人真係用廢物、兒時舊玩具、自己個仔整爛咗嘅玩具同其他屋企雜物去製作，例如參賽作品Halt-None-Null 係用長期無用嘅迷你垃圾桶加上兩部舊四驅車摩打改裝而成，再配埋舊手套作為搖控；耶教異聞鹿就是由仔仔嘅吹氣長頸鹿痴上搖控車； 亦有唔少用膠水樽造的機械人，短短幾小時可見香港人其實真係創意無限！（如果想睇番完整未剪接版可以到YouTube 搵「HEBOCON Hong Kong 四小時足本直播重溫」）
其實講到尾啲唔再用嘅廢物對大家嚟講會有咩用途呢？
答案係：無！
因為如果佢地重有用就唔會俾你叫廢物啦～好似廚餘咁你可能唔會覺得佢有用，但響好多人眼中廚餘可以整成環保酵素同肥料。
假若而家⋯⋯宜家一折唔買唔得，但舊嘅嘢對你嚟講又無用可以點做呢？
同環保有關嘅平台／其他環保組織都有好多，隨住免費徵送嘅方式開始成熟，有個團隊針對舊有嘅徵送方式，開發咗一個嶄新嘅環保平台，希望可以比大家多一個選擇。響廢柴機械人大戰直播入面你會發現“Green Gift”字眼嘅出現，了解咗之後原來係一個免費手機平台，俾大家將自己唔要嘅物品送出同埋領取自己心儀嘅物品。我地唔會知眼前嘅廢物有乜用，但假若我地走多一步，將佢分享出去，覺得有價值嘅朋友自然會出現，理念就係物盡其用，令環保變得簡單。
由果句無意聽到嘅說話，去到宜家一折嘅瘋狂購物情景，我覺得香港人嘅消費習慣對本土環境嘅破壞真係越嚟越嚴重，似乎無人可以獨善其身只怪政策，不如從自己做起，很喜歡Green Gift的兩句：
快樂，源於分享；環保，其實可以很簡單！
P.S: 數下你宜家隔離有幾多唔再用嘅野
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2015年6月28日
