「去旅行咋嘛,本小姐咁撚醒點會有事?!」

(photo via cc Flickr user peasap)

(photo via cc Flickr user peasap)

 

以前細個,都中意去湊熱鬧,去倒數呀去人多嘅場合趁下墟咁。即係夜晚八點幾出黎之後周圍唔知做乜去下機鋪周街行下之後等倒數迫到乜咁就好開心果種。後來到廿四五歲開始就開始唔中意去呢啲活動,越人多越唔中意。朋友之間亦係一樣,細個可能一齊去酒吧飲嘢跳舞去玩,到廿四五開始個個都寧願去 Home Party ,搵個朋友借間屋借個地方出黎聚下仲開心過出街。

 

台灣塵爆慘劇,喚醒咗人對呢方面嘅安全關注。有啲人事後出黎話呢啲係常識,但似乎唔係乜嘢「常識」,成個社會總體而言對呢方面嘅警覺不足。有啲嘢對我黎講係常識,但對大眾唔係常識黎嫁嘛,唔好下下用一種「你班人咁都唔知?」嘅討厭角度去講先得格。

報載有名重傷女生嘅爸爸係揸的士,當聽到新聞報道時就心諗今次弊,可能係乖女出事。全身九成燒傷,好返都好多後遺症,都唔講個樣嘅問題先喇。

 

養兒一百歲,長憂九十九。生個子女出黎,你同佢講當年老子都好似你咁樣戇鳩鳩過,都中意去趁墟,但你要小心有咩咩咩潛在危險呀,你個仔女當你古老石山嫌你煩啦。但到真係出事時邊個陪返個寶貝仔寶貝女返黎?

唔好話到自己仔女啦,我試過同一個比較後生嘅朋友講,叫佢去旅行要點樣點樣小心啲,佢完全係一副「知喇你估我戇鳩嘅咩!本小姐咁撚醒點會有事」嘅樣。過兩日就傳黎佢被劫嘅消息了。

「覺得你啲老人家好撚煩」應該係自然現象,後生仔懶叻之後柒到應一應亦係無可避免嘅事,於是人間就永遠會重覆出現一啲意外同慘劇。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 110014
Date: 2015-06-29 16:10:50
Generated at: 2020-03-30 04:52:55
Permalink: https://www.vjmedia.com.hk/articles/2015/06/29/110014/「去旅行咋嘛,本小姐咁撚醒點會有事?!」