759掃貨攻略進階篇

759

 

呢兩日759破天荒做6折,搞到間間排晒長龍,真係趁墟咁趁。聽到有人話排成粒鐘隊比錢,小弟反而冇乜意欲去排。既然越嚟越多人知道要留意唔同價種呢啲基本功,咁小弟就即管寫返個進階攻略,等各位識睇網媒嘅網民,買得比師奶更精明。

話明係進階攻略,如果你連正價、街坊價、公價、(會員)超抵價同熱賣價都未分清楚(其實最後兩種我自己都唔識分,因為好似真係冇分別),甚至連會員卡都冇張,請click上一頁離開,或去呢度補補底先

 

1) 有Mastercard paypass 88折就唔好為個幾銀錢排成粒鐘

雖然做6折真係第一次,但Mastercard paypass 88折呢個promotion已經做左三個幾月。呢個promotion係折上折,即係如果嗰日本身係7折,用paypass比錢係7折再88折,即係6.16折。冇錯6.16折真係冇6折咁抵,每買一百蚊就比貴一個六,但當上兩個星期日日做七折咁滯時,對有Mastercard paypass嘅人嚟講即係日日做6.16折,仲要冇人排隊。比夠你一次過買夠三百蚊撻多張會員卡,都係比多$4.8,但唔駛排隊唔駛同人爭崩頭,早買早享受遲買又慳唔到半舊,何必假日同人囷獸鬥?

不過要留意,88折promotion只係做到7月31號,冇就無謂而家先嚟申請,拎定你張八達通去排隊算吧啦。

 

2) 貨比三家是常識吧

759有啲嘢有係平,甚至係好平,但唔等於樣樣都抵買。喺759買得其實大家都已經唔係好睇牌子,咁嘅話就更加要留意出面有冇其他地方賣同類貨品係平啲,特別係深水埗家興超市或契丹人最愛嘅價真棧,要搵到比折盡之後嘅759更平嘅同類貨品都唔出奇。當然,行多幾轉超市,對個別種類貨品個最平可能價格有個基本概念,分得清咩係真減價同假減價,你就會知道759邊啲嘢真係平。

就拎1L盒裝全脂奶嚟講,兩年前價真棧賣緊$10或$11,百佳間唔中痴左線時會做到咁上下價,而家一般最平係$12左右。759隻Jersey 4.3全脂奶肯定貴過呢個價(超抵價$13.9左右),折盡都從來未試過低過$12,但最近就返左隻叫Fred & Chloe嘅奶,正價$13.9,7折折實$9.7,呢啲先真係平盡全香港。

 

 

759

 

3) 平價飲品請先睇成份

759有唔少飲品都真係幾平,但最平都應該係啤酒,基本上全部都係街坊價,7折起上嚟大罐裝都唔駛$5。但買其他飲品就最好睇睇成份先,因為好多人都唔想食咁多代糖,問題係759大部份低糖飲品都係真糖溝代糖,特別要留意日本「神戶居留地」呢個牌子,幾乎每款都係咁,有隻賣$10左右1L嘅果汁亦係,連前排好受歡迎嗰幾隻罐裝果汁酒都係。老實講,真糖溝代糖嘅低糖飲品外國真係好常見,但香港暫時唔太多,所以冇乜人留意。如果你真係好抗拒代糖,就最好自己睇清楚759啲飲品成份有冇「sweetener」,否則就真係代糖夫人都幫你唔到。

 

4) 對超抵價貨品睇relative price

好多人都嗔話越黎越多嘢變左冇得再折嘅超抵價或熱賣價,變相加價,甚至買咗先知中伏,但如果行多幾間超市,你就會知道超抵價啲貨好多都係同競爭對手價格睇齊或平一兩毫,唔折比你某程度上係話比你聽呢個已經係現時全港可以做到嘅最低價錢。例如$6.8隻杯裝啫喱,價真棧減到盡都仲賣緊$7。所以如果你有Mastercard paypass做到 88折,買超抵價貨品基本上都等於係用緊全港最低價錢買同類貨品。至於件貨值唔值呢個價,就睇你自己衡量啦。

 

啲貨值唔值個價,性價比乜乜乜,好睇個人喜好,心得其實都係得咁多,技巧係死嘅,用嚟買乜同點買法最後都係睇你自己。最後小弟利伸返我係揸住兩手0759蟹貨,都唔知幾時見家鄉,但如果你覺得呢隻股股價係睇零售業績就真係太天真鳥,而會買蟹貨中大伏嘅小弟亦太年輕鳥。

 

(黎緊星期二公價7折,下星期六正價、街坊價、公價一齊7折,唔好話唔提你)

 

作者:quenthai

非中國籍華人毒男,極右本土後現代民粹鍵盤戰士,崇尚精英民主及自由意志女性主義,深信後現代分析可為精英主義所用,因為霸權本是平常事。Blog: http://quenthai.wordpress.com

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 110554
Date: 2015-07-05 23:54:20
Generated at: 2020-08-10 11:19:43
Permalink: https://www.vjmedia.com.hk/articles/2015/07/05/110554/759掃貨攻略進階篇