「家庭式位霸」

「家庭式霸位」

 

話說今日陪女友去去睇戲,本來假日睇套咁開心嘅片就好開心,不過就發生咗件唔係咁開心嘅事。相信大家有睇戲買過飛嘅都會見識過「位霸」嘅力量,佢地唔知係咪好怕同人類接觸,買飛總會隔開一個位。

咩意思呢?就係如果一行裡面,得返7~10四個位未畀人買,位霸就會專揀8,9兩個位,原本嘅7,10因為畀兩個位霸隔開咗,通常都唔會有人買,位霸就可以兩個人霸四個位,雖然我唔知要咁多個位有乜用,但佢地就係有一種旁若無人嘅孤傲。

大家都睇啦香港睇戲本來已經一飛難求,睇遲一個星期又會畀同事恥笑,但就因為呢啲位霸,本來可以容納四個人嘅座位,側面兩個就由吉位變死位。。

 

我仲發現,好多位霸都係情侶黎,所以我建議一個人去睇戲嘅人士組成「去死去死團」,專門揀呢類死位坐,左右夾住對情侶傾劇情,或者一桶爆谷傳來傳去分黎食。

 

所以我揀親位都會貼住隔離買,或者預留兩個空位畀其他人。不過估唔到今日畀我撞正更加霸道嘅「家庭式位霸」…

話說,今次我揀到個中間靚位,本來都預咗呢套戲會有好多小朋友大叫,但無法啦,加上咁樣氣氛都幾歡樂。我同女友準時入到場,發現成行都畀班細路坐晒,我望一望座位無錯,日期無錯,時間無錯,亦無買錯另一套戲,喺我茫然慌恐之際,一個疑似係老豆嘅男人就出聲:

「唔好意思,我地係一家人,本來想買晒全行,但畀你兩個霸咗我兩個位,你可唔可以同我地調一調去隔離?」個男人指住同一排走廊側邊嘅3,4號位。

但係…我就係驚無位先預早買飛,而家竟然成為呢一家人口中嘅位霸?

 

呢個時候阿媽又出聲:「我哋係一家人,想照顧小朋友…」說畢個阿媽就仲露出無奈嘅眼神。我想講我先係最無奈嗰個囉老母。

呢個情況,周圍梗係無人出聲,因為四方八面都係老母,而佢地深信天下間父母都係最偉大嘅生物,耶穌對落就係佢地。

 

現場一片寂靜無人出聲,戲院職員又唔知去咗邊,不過諗深一層就算堅持唔換位,兩邊小朋友萬一喊嘅話,我就連套戲都睇唔到,所以逼於無奈之下我同女朋友就掉咗去邊邊位。臨行開之前其中一個細路都唔知拿景定贈慶,同我揮手講「Poopaye!」(Minions語拜拜嘅意思)。

 

最後我想講,有仔有女都唔係咪有特權,係咪大撚晒?咁我特登預早買飛有乜意思呢?家計會仲叫人生夠五個,五個小朋友連埋老豆老母已經七個人,到時所有動畫都會畀呢類「家庭式位霸」佔領。

 

IG:BlueGodZi

 

 

 

關於作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。