隧巴要三個鐘先行哂?亡國興幫你成功爭取

(photo via cc Wikimedia Commons user  Mike Peel )

(photo via cc Wikimedia Commons user Mike Peel )

 

有無諗過一條隧巴線要三粒鐘先行得哂?大家唔駛咁多幻想,好快呢個情況就有機會變成常態。

運輸及房屋局已經跟三大巴士公司進行研究,預計下年就會將隧巴線過海後嘅分段收費下調,車資好可能同本區線(即只行港島或只行九龍嘅路線)睇齊。咁唔好咩?車費減左,乘客多啲選擇,唔駛左等右等,幾好呀!

但點解突然間運房局會諗到呢招?其實呢個建議係好鍾意寫書法既工聯會亡國興議員親自獻計,咁運房局當然要好好研究研究啦。只不過,你地真係以為多左選擇?其實,只係俾左一堆屎你食!

 

一、隧巴線車程再被拉長

其實而家堆隧巴線(特別行紅隧果堆),車程已經好長(閒閒地都可以個半鐘,或者兩個鐘)。車程咁長,有好多原因,如本身開辦嘅時候,已經定線定得好長;又或者呢十幾二十年,香港街道越黎越塞;堆$2客坐幾個站都照上堆隧巴線,唔肯等本區線……

如果將來隧巴過海後開埋分段收費,一程車隨時多40、50個客上車,呢到隨時又可以拖慢十五至二十分鐘。點解?上、落客花多左時間,然後就會出現骨牌效應—因為每個站上多左人,遲左開車,結果過唔到前面盞交通燈,要白白等一、兩分鐘先再開得車……

俾個例子大家。來往黃大仙至小西灣嘅106,而家車程已經好長(做到個半鐘已經算好好),但如果佢過海後做埋本區線嘅客,咁由銅鑼灣至小西灣呢段車程,就隨時由而家嘅45分鐘,增加至超過一個鐘。

 

二、隧巴線重組空間越黎越細

頭先都講左,隧巴線車程咁長,有一部分原因係歷史遺留落黎嘅問題,但唔代表呢樣野係合理、係唔需要去改。

車程長,脫班機會亦較高,對乘客嘅吸引力只會越黎越細,而地鐵就只會越黎越逼。所以,隧巴線(特別紅隧果堆)要進行大重組,已經逼在眉睫。

由於現時唔少隧巴線係兩間公司一齊營運,所以唔同公司服務唔同時段嘅問題,已經令重組空間比獨營嘅本區線細。如果將來隧巴線仲要兼顧埋本土客,即係重組嘅時候,又要顧多個stakeholder,咁傾十年都傾唔到共識啦。

又俾個例子大家。而家來往美孚至筲箕灣嘅102,車程過長(由太古至旺角,隨時都要50至60分鐘)已經成日被乘客投訴。因此,都有唔少人建議將102港島段分拆,如筲箕灣至鰂魚涌一條(即而家只係繁忙時間服務嘅102P,擴展成全日服務);而北角至銅鑼灣北又開另一條,從而縮短東區來往旺角嘅車程。

只不過,如果102遲下要做埋本土流水客(如天后返西灣河),咁條102線仲係唔係咁易去搞分拆呢?一搞分拆,將來用呢條線由天后、炮台山搭去太古、西灣河嘅乘客,又一定嘈、嘈、嘈……結果,大家十年後就繼續好白痴咁坐住條車程要2粒鐘嘅102(如果仲未轉投地鐵懷抱嘅話)。

 

三、本區線勢必減班,最終害死乘客

運房局又夠坦白,佢地都知道一旦隧巴線過海後減價,隧巴線嘅車程一定會更長,所以都話定俾大家聽,隨時要加車,先可以維持現有班次。咁要加車,車從何來?

好明顯,巴士公司一定會抽走一啲同隧巴線差唔多行車路線嘅本區線,調配去行隧巴線。例如:新巴嘅2A同82、城巴嘅10,又或者九巴嘅14、15,都同某啲隧巴線有所謂「重疊」(但角色、定位根本就唔同),呢堆線隨時就會被減班。

咁既然隧巴線都可以服務呢批客,本區線減班又有乜所謂呢?咁就錯啦!隧巴線只係過海後減價,過海前係唔會減價嘅。

舉個例子,來往柴灣至太古,而家有新巴82,來回程都係收$4.1。如果坐106,而家由太古坐返去柴灣,已經有分段收費$5.7,而將來可能會更加平(如$4.1,跟新巴82同價)。但係唔好唔記得,由柴灣坐返出去太古,由於106仲未過海,所以不論而家定係將來,都係會照收$9.8。即係話,雖然過海後嘅一段,你可以「叫兩飛」等82同106,但係過海前嘅一段路,將來你都係要死死氣等返82,除非你唔介意用$9.8由柴灣坐去太古。咁如果因為106要加車,變左82減班,到時候由柴灣出太古,你地等唔到車,亡國興就當然唔會理啦!

 

總結

要求隧巴線減價,去做埋本區線嘅客,簡直對成個社區係百害而無一利。原有用隧巴過海嘅乘客,車程一定會增加;而本身搭開本區線嘅客,雖然其中一個方向叫做多左選擇,但另一個方向就因為本區線要減班,而隨時得不償失。

不過,為左亡議員嘅功績表又多一樣野可以寫,大家包容下、袋住先啦!

 

作者:公共運輸研究組

公共運輸研究組
一群觀察到香港公共運輸問題的年青人,決定走出來,為香港做點事。希望加入你的討論,為香港創建更完善的,香港人引以為傲的公共運輸系統。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 111317
Date: 2015-07-15 04:07:28
Generated at: 2019-03-25 18:59:55
Permalink: https://www.vjmedia.com.hk/articles/2015/07/15/111317/隧巴要三個鐘先行哂?亡國興幫你成功爭取