馮煒光你數都計錯就唔好質疑人地公信力啦~

 

中大最近一個民調話有超過五成六嘅人唔想梁振英連任特首,今日馮煒光就喺頭條日報質疑媒體嘅報道點解咁斷章取義。

 

首先馮先生指出,有七成三嘅人唔知想邊個做下屆特首,認為「距離下次特首選舉仲有兩年,大部份市民還未有看法。」不過唔知點解馮先生無提到,回答呢條民調問題嘅人,係響之前一題話「幾唔想」或者「好唔想」梁振英連任特首。咁即係話有56% × 73% = 大約四成人覺得,嗱,我唔理邊個做特首都好,我就係唔想梁振英做。我又唔知點解馮先生話大部份市民未有睇法囉。

 

之後馮先生又話,有一成一人希望梁振英連任,但係得百份之六嘅人支持曾俊華做特首,而支持林鄭月娥同梁家傑嘅就更加只得百份之三同百份之二。但係馮先生又無提到,曾、林鄭同梁呢三位,都係由話「幾唔想」或者「好唔想」梁振英連任特首嘅受訪者提出。咁即係兩條問條受訪者人數唔同啦,應該話56% × 6% = 3% 嘅人支持曾俊華做特首呀嘛。馮先生兩次無提到兩組數字受訪者人數唔同,又會唔會係斷章取義呢?

 

再講,有一成一嘅受訪者希望梁振英連任,對照有四成人話我唔理,總之唔好梁振英做特首。邊方面嘅民意出D呢?

 

馮先生又話唔係要探討民調「結果可信不可信」,但係又問點解「調查對象不定在一般的十八歲,而是十五歲或以上」。咁即係想問唔想問呢?民調報告第一版都話「而 15 至 17 歲的受訪者只佔整體樣本 4%,此年齡組別的受訪者對整體調查結果並沒有顯著影響。」唔知點解馮先生又唔提吓呢?

 

好啦,咁我又姑且計一計。民調有431人話好唔想梁振英連任,而呢次調查未加權之前,有52位十五至十七歲嘅受訪者,即係就算所有十五至十七歲嘅受訪者都有問題,最少都有379人好唔想梁振英連任。

 

唔講喇,睇圖最實際。就算攞走52位受訪者,邊款意見都仲係最多人嘅意見呢?

 

 

最後馮先生話,傳媒報道「『吹水』可以,公信力呢?」我又想問吓,如果一位政府發言人,基本加減數同乘數都計錯,甚至比較數字大小都可以出問題,前言不對後語,吹水都未必可以啦,公信力呢?

 

作者:SweetSourPork

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 112228
Date: 2015-07-27 18:12:37
Generated at: 2021-01-18 16:16:12
Permalink: https://www.vjmedia.com.hk/articles/2015/07/27/112228/馮煒光你數都計錯就唔好質疑人地公信力啦~