左搭右搭上大學好羞恥咩?

(photo via cc Flickr user See-ming Lee 李思明 SML)

(photo via cc Flickr user See-ming Lee 李思明 SML)

 

其實我果屆嘅老拔係當年最「精彩」嘅一屆,成績應該係差到無倫。我果班,我果兩行十(定十二)個同學,得我一個直接入大學學士學位(仲要係地底泥嘅中文系)。

我咁講唔係想捧自己,事實上,今日我班同學全部無穿無爛,仲生活得好好,左搭右搭上大學好羞恥咩?讀非三大好羞恥咩?絕對唔係。講真,識揀其實應該揀理大,視光、物理治療、放射治療,不知幾好,好過你讀三大入面嘅冷門僻系。

 

更重要嘅,其實唔係話你大學讀乜,甚至你做乜工。講到尾人生好鬼長,到你三十歲,四十歲,邊個會記得你「咩中學出黎」?唔通你三十歲去見工(例如參選)仲強調自己十幾年前公開試攞 8A?而家叫伍猩猩啦,仲「A」!

三十歲前,其實都係一個畀自己試一試生命可以做啲乜嘅時間,香港嘅教育失敗嘅地方可能有好多,但我覺得最重要嘅係從來無認真培養過學生「想點」。就算係尖子,想像力都只係局限喺醫呀法呀之上,都只係「搵食」,搵食唔可恥,行有餘力都剩係諗搵食就可悲。

 

至於名校資源,的確係好過人家。無論係氣氛也好,眼界也好,係好過人,呢點係無得賴。你日日身邊啲人都開口埋口係咩「揸的士都最少搵四萬一個月啦」嘅唔知咸淡人,你個思維,尺碼,胃納,自然同一般人唔同。有好同儕逼迫住上嘅咪發得大囉,無能力,天資唔夠嘅,咪一樣應付唔黎。

名校,或者某些名校嘅人,好容易會覺得其實自己都唔係咁幸運,咁「gifted」,強調自己都有努力過云云。人家個環境的確係開唔到佢竅,啲人係搵唔到門路,亦無人帶佢路呀,唔係個個咁醒識自己搵嫁!都莫講話好多學校一味強調啲學生要「乖」,要「聽話」喇。

 

反過來,一個人如果自己有少少天份,又有某些環境(可能係學校以外嘅,例如家庭,甚至公共圖書館,咩都得)啟發佢,唔使名校都可以成到材。

老實講,人生好多嘢,真係講個運字嫁咋。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 113348
Date: 2015-08-11 17:36:39
Generated at: 2020-03-30 04:30:35
Permalink: https://www.vjmedia.com.hk/articles/2015/08/11/113348/左搭右搭上大學好羞恥咩?