投資推廣署就有如謝師宴上嘅毒男

政治 / 最新文章綜覽

 

投資推廣署的網頁介紹指:「成立於2000年7月的投資推廣署一直致力推廣香港的營商優勢,鼓勵外地企業以香港為據點發展業務。本署致力引進對香港經濟及發展策略有利的投資,並鼓勵這些投資項目留港發展,一切服務以態度熱誠、重視誠信、專業服務、以客為尊、方便營商及迅速回應為原則。」

今次 UBER 事件,呢個小小的衙門成了風暴的一道點綴風景。先有網頁大鑼大鼓吹到 UBER係自己政績,然後一夜之間「彈弓手」撤下資料,又要扮晒嘢懶係睇清睇楚深思熟慮先話撤下係有諗過。好心啦,淆底就淆底啦,即係話當初你啲大鑼大鼓,其實都好有可能根本只係痴人家金糠,見人打入香港就狗衝去領功。

 

我身痕走去睇睇投資推廣署咩來頭,點解咁失策今次要「華麗轉身」,一睇發覺原來好趣。首先原來佢好多高層根本唔係公務員,或者唔係由公務員系統出身。睇返佢哋「審核2015-16年度開支預算管制人員的答覆」呢份文件( 第12頁),真係有饒有趣味:

原來投資推廣署真係一個好~細嘅衙門仔,總共只得35個公務員職位,另外「投資推廣署總辦事處及其分布全球的15個投資推廣小組參與投資推廣會議的員工共有94名,包括上面提及的35個公務員常設職位當中11個,及以非公務員合約條款聘用的其他人員。」。

 

毒撚 GRAD DIN

 

人少唔緊要,官有幾大呢?投資推廣署署長係首長第6級,同其他政府部門嘅首長無分別。但公務員職位對落就一跳落到去首長第2級,而非公務員職位就無講明第幾級。

點解要講職級咁掃興呢?「做到嘢咪得囉!」,一般情況下係嘅,但大家唔好忘記今日係梁書記掌控天下嘅大.時.代!梁書記做嘢係點呀?直接落柯打囉!直接搵特務囉!點解?聽話!有威權(唔係威信)!有效率(香港人最中意啦)!繞過程序(又係香港人最中意嘅事)!君不見廉政公署同警察部,都成為有效打壓嘅工具咩?連曾德成、鄧國威咁大粒嘅局長都可以無啦啦落馬,梁書記做嘢使你教?傻的嗎子!

 

神仙B 大王

 

另一方面,據聞有唔少人都有同的士牌有關嘅深厚利益,佢哋會唔會唆使梁書記「做啲嘢」?喂如果唔係政府最高層出手,又點會咁快手警察幾日內就做嘢呀?仲要廿萬保釋金呀大哥!早幾日就去蘭桂坊先做場戲,之後就入戲肉,有無咁蹺呀?

因此,你一係就有份分一杯羮,一係就夠高級接通天地線,否則你注定喺「親疏有別」之下轉身突慢,所以投資推廣署今次如夢初醒就好可以理解。成班公務員都唔過首長第2級,入到局都無人識你啦。

 

成個投資推廣署根本就好唔似政府部門,成班人都係商界入去,可能咁樣做投資推廣會好啲嘅,但係極度人治,繞過公共行政原則,毫無章法可言嘅梁書記政府入面,就註定做毒男咯。

 

舊聞一則

賈沛年小檔
年齡:47歲
學歷:
•英國謝菲爾德大學管理學院工商管理碩士
•格拉斯哥大學科學碩士
•英國倫敦大學國際商業法律碩士
工作經驗:
•早年曾任職多間私人機構
•1991年加入英國政府蘇格蘭工商委員會參與推廣投資工作
•2001年來港加入投資推廣署任助理署長,2009年晉升至署長

吳國才小檔
出生:毛里裘斯,是當地華僑第三代;籍貫客家梅縣
學歷:
•在加拿大一家大學主修市場學
•修畢香港科技大學與西北大學凱洛格管理
學院:( Kellogg)合辦的 EMBA課程
語言:英語、法語、廣東話及客家話
工作經驗:
•先後於毛里裘斯港資成衣企業、美國運通、渣打銀行工作
•曾在本港經營貿易公司
•02年加入投資推廣署
資料來源:《蘋果》資料室

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 113411
Date: 2015-08-12 16:36:11
Generated at: 2020-04-05 05:48:32
Permalink: https://www.vjmedia.com.hk/articles/2015/08/12/113411/投資推廣署就有如謝師宴上嘅毒男