你咁天真以為Mario真係三十年都未救到Peach公主？
你以為 Peach 真係被 Bowser 捉走？
你以為Mario係個專一既老襯？
少年，你太年輕啦！
呢隻根本係一隻「捉姦在床但係又次次遲左少少等條八婆又扮受害者」既 Game。
故事由1981年講起：
Mario 係一個地盤工人，係咁奴役一隻叫Donkey Kong既猩猩幫佢做野，叫佢係咁OT，得閒又冷言冷語，屌下佢咁。
於是Donkey Kong頂唔順，決定啟動佔中發起革命，於是佢綁架左Mario條女：
阿Pauline（無錯，你心目中既痴心情長劍Mario係有前女友既！）
咁阿Mario就去救阿Pauline，救完之後，佢因為引起騷動比人炒左
由於量地，於是佢兄弟Luigi就介紹佢去Mushroom Kingdom幫人通坑渠。
咁阿Pauline就梗係唔會跟佢去通渠啦，仲收埋Donkey Kong做兵，建立佢自己既事業。
留意佢兄弟，果時頂帽仲係白色的！
咁佢兩兄弟通渠真係有一手，搞到Mushroom Kingdom既國王鬼咁高興，於是就收留左佢兩兄弟，係城堡呃飲呃食，當然，最重要既係，幫佢通渠。
點知有一日，Bowser見Mushroom Kingdom發展得咁好，就衝入去城堡諗住叫國王讓位比佢，國王梗係落閘放菇，啋你都有味啦。Bowser食左咁大個檸檬，嬲嬲豬，條氣唔順，見阿國王個女Peach公主都生得幾好樣，於是就順手捉左佢返去享用。
國王就諗起果兩個通渠佬都幾打得，叫佢地去救個女啦，救唔到，咪當政治婚姻囉。
於是Mario就山長水遠咁行去Bowser屋企，再掉左Bowser入佢屋企個熔岩池。
不過你又唔使擔心，正常人，如果唔識游水就唔會係屋企整個泳池，所以Bowser係識遊熔岩既，完全無事。只係條女就比個鬍鬚仔搶走左。
搶左條女返黎，英雄救美，Mario即刻食住上，打算將Peach公主私有化。而亦因為謎一樣既原因，佢兄弟Luigi由呢集開始買左頂綠色既帽黎寸阿Mario。
有一日，佢兩兄弟、公主同一個菇頭隨從就去野餐，發現有個山洞可以通去異世界，於是一行四人就衝左入呢個叫Subcon既異世界冒險。係人地塊田度挖人地Ｄ蘿蔔出黎掟人地。做既野仲衰過Bowser黎Mushroom Kingdom果時，成個世界比佢地搞亂晒，原本已經差唔多完全佔領Subcon既Wart比佢地既主角威能搞到功虧一貴。
呢個係Wart。
而呢集亦證明左其實Peach公主好好打，完全唔輸比佢兩兄弟，或者Bowser。
ＫＯ左個異世界之後，Mario得到Mushroom Kingdom既一塊封地，叫Mario Land，但佢唔理，決定掉低條女係Mushroom Kingdom、掉低佢兄弟係Mario Land，然後出發流浪。
條友真係去到邊，邊度就會比人侵略；今次佢去到一個叫Sarasaland既地方，有一隻叫Tatanga既東西用心控術佔領左Sarasaland，仲打算強行娶Sarasaland既公主Daisy做老婆。
佢係Tatanga。
佢係Daisy。
鬍鬚仔見Daisy幾好樣，窮心未盡，色心就起，於是就直搗黃龍，打贏Tatanga，救左Daisy，然後當然係英雄救美，以身相許，一條龍。
可憐既Luigi同Peach慘被蒙在鼓裡，唯有各有各玩，隻眼開，隻眼閉啦。
當Mario玩夠，掉低Daisy，返到Mario Land既時候，發覺Mario Land已經被一個扮佢既肥佬Wario搶左，仲偷左佢城堡六個金幣。
佢今次就唔係好管閒事啦，話晒都係自己既野，一定要拎返，於是搵返六個金幣，打贏左Wario。仲知道原來Tatanga係Wario既小兵，負責引開Mario的。
Mario由Mario Land返去Mushroom Kingdom中央諗住搵Peach公主，但發現，Bowser又黎過，又帶走左Peach公主。無理由丫，明明上次係Subcon既時候，公主好鬼打得，點會咁易比人捉？唔理啦，一夜夫妻百二蚊，都要去救嫁，咁就搵埋佢兄弟出發。
原來今次Bowser請左七個幫手（合稱Koopalings）黎侵略Mushroom Kingdom，佢地分別係（是旦啦，講完你都唔記得），總之佢地就佔領唔同既地方，然後佢兩兄弟就打贏晒佢地解放晒堆地方啦。
最後，又打到入去Bowser屋企，呃左佢跌落個坑度之後，發現Peach公主係Bowser間房，仲踎埋一邊扮喊。
頂你，臨時演員都係演員黎，專業Ｄ啦。但無證無據，Mario亦都唯有信佢真係比Bowser捉返黎啦。
Mario同Luigi一齊帶Peach公主返佢地鄉下：Yoshi’s Island。
諗住享受下陽光海灘，嘆下世界。點知…
Bowser又出現！帶同Koopalings，侵略Yoshi’s Island！
大佬，你有無咁準時呀！你係咪同條女約好嫁？個世界咁大你度度都唔去，係要去鬍鬚仔渡假果度？係你唔好彩，定鬍鬚仔唔好彩呀？
咁照舊又係打贏晒咁多個Koopalings之後，去到Bowser新屋，Bowser今次坐住架飛船黎同Mario打，當然打輸啦。但最引人入勝既係，Peach公主係果架飛船跌出黎，而架飛船只係岩岩夠遮住Bowser下半身。
咁前事不計啦，始終無證無據，唯有返Mushroom Kingdom個城堡過Ｄ平平淡淡既生活啦。
但有一日，公主叫Mario去城堡食蛋糕，但Mario去到城堡之後，先發現Bowser又黎左啦！今次佢開宗明義，係黎搵你呢個戴紅帽既鬍鬚仔報仇既！於是佢將Peach公主變成一幅教堂玻璃，偷晒城堡既力量星星，佢要報牛～～
之但係，點解唔直接殺左阿Peach公主，又或者擰斷佢Ｄ手腳丫，又或者叫個鬍鬚仔交贖金，乜都好；都應該好過將條女變做教堂玻璃黎Ｊ。而家咁樣實在太變態，又或者咁講，佢實在太愛公主啦，如果佢係靚仔總裁而唔係隻有刺既龜，大概一早就奪得美人歸啦！
結果？就係Mario捉住Bowser條尾，掉左佢埋個炸彈度，拎返晒Ｄ星星，將公主救返出黎。然後，大家都話「the cake is a lie」
咁佢兩公婆無乜野做，又去渡假啦。今次去左一個叫Isle Delfino既地方；咁Mario就比當地警察誤認為罪犯，拉左佢，仲要佢用一個叫FLUDD既裝置清潔地方。
FLUDD簡直係超級兵器，進可攻，退可守，Mario清潔完城市，仲順手用佢黎維持治安。
係呢個時候，Peach公主又比人捉左！
我個「又」字就快要用font 144，痴線，你咁好打（玩過大亂鬥既人都知Peach公主有幾勁），唔好咁易比人捉得唔得？
今次捉佢既，叫做Shadow Mario！
打完一輪之後，發現原來Shadow Mario真身其實係Bowser Jr.，Bowser既親生仔！！
更驚人既係，佢叫Peach公主：「媽媽」！
嘩屌，今次真係真相大白。
Peach公主情急智生，係Mario打贏Bowser Jr.之後講，話呢個係Bowser作出黎既故仔，為左呃Bowser Jr.黎綁架佢。
我諗到左呢一刻，Mario已經睇化晒，真又好，假又好，已經過去既就無謂諗啦，於是佢又繼續同Peach公主生活落去。
之後Ｄ故事開始唔連戲，大概好似蜘蛛俠咁reboot 完一次又一次，所以都係唔講啦，反正都係「捉姦在床但係又次次遲左少少等條八婆又扮受害者」呢個套路，分別可能係上左宇宙，又或者Bowser嫌Peach公主老，改為綁架一堆七色小蘿莉咁。
所以話，人生，睇下睇下，就會化。
《阿媽有左第二個》：姜濤的個人表演
【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著
《星際啟示錄》全面大解構
【Reg Day 攻略】大學新生註冊四件事
《光年正傳》點解硬係要加啲LGBT 嘅情節呢？
《彼岸島》絕對是我人生中看的其中一套最令我無言的漫畫。
2015年9月16日
