有云千日琵琶百日箏,究竟學琵琶好定學箏好?

 

首先必須要強調,學中樂係一種修養,一種氣質,如果無廣闊嘅音樂知識同功底,只係當聊備一格的話,可能成世都兜兜轉轉,搵唔到中樂嘅真正韻味同樂趣。因為現代中樂摻雜咗太多古怪嘢,個發展已經變得相對奇怪,以迎合現代人嘅審美要求。

 

單由技巧上講,琵琶嘅難度應該係中樂彈撥樂中第一。中樂彈撥樂基本上都係近幾十年先建立起來,真正算係相對傳承到傳統,傳統思想可以留到落黎嘅,數來數去就只得琵琶、古箏、揚琴同三弦。琵琶嘅兩手技巧係最多,亦係最難。單單係五指輪已經可以叫人成世不停練。仲有鳳點頭,搖指等,每一種指法都叫人要下功夫。

而琵琶嘅傳統美學其實有啲似古琴,係好多「雜音」、「非音高性嘅效果」,十面埋伏已經係其中一例。抱起琵琶一坐,佢本身就係一件可以純獨奏,但音量唔大嘅室樂獨奏樂器,氣質其實同古琴、簫有相通之處。而琵琶嘅「文曲」、「武曲」流傳落黎嘅資源亦較多,單單係復興呢啲曲目,演奏同發揚呢類音樂,空間已經好大。而琵琶嘅「噪音性效果」又可以令佢玩到現代「無調性」「無音高」嘅新作品,可塑性好高。

 

箏本身亦有佢自己一套美學思想,傳統箏曲發揮嘅音色同音樂係自成一家。自成一家到一個地步係,佢係好難同樂隊夾到的。箏喺香港應該比起琵琶有更多人去學,但好多人學時都只係依從一種「唱民歌式」或「小曲式」嘅方法去學,其實只係強調一條旋律線,出來嘅效果反而單薄乏味。

因為箏基本上一弦一音,玩一般人心目中嘅「旋律音樂」其實好乏味,音亦唔夠,而傳統音樂亦唔係玩和聲進行,反而翻覆嘅指法,音色嘅組合更加有睇頭。

 

可惜嘅係,今日音樂有兩條「大宗」,一條係合奏之路,另一條係流行之路。合奏之路中,由於琵琶「音噪」,所以慢慢只用作一種特色樂器,睇香港中樂團一路削滅琵琶數目就知。而箏亦唔係一種適合樂團合奏嘅樂器。而流行之路,根本啲人就唔識呢種形式嘅音樂,亦好難寫得出流行嘅作品。

至於實驗性嘅作品係有,但的確好難普及。

所以呢兩種樂器其實面對嘅困境係類似嘅,但相對之下琵琶嘅表現力同可塑性係比古箏強。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 116171
Date: 2015-09-17 18:09:23
Generated at: 2020-04-05 05:09:39
Permalink: https://www.vjmedia.com.hk/articles/2015/09/17/116171/有云千日琵琶百日箏,究竟學琵琶好定學箏好?