《進擊的巨人》：餵完觀眾食屎後俾返啖飯你食下

（劇透注意）

由於巨人上集太爛的關係，於是抱住睇爛片的心態入場睇下集，點知反而覺得有點驚喜。其實都仲係有少少爛，但整體而言已經比上集好太多，有個尚算完整的故事，響原著仲未完的情況下，電影為各個主要謎團俾左叫做勉強合理的解釋，起碼能夠自圓其說。

角色方面，由三浦春馬飾演的男主角艾倫繼續鳩叫鳩衝，一腔熱血去推動劇情，基本上只係為劇情服務。所謂人類最強的長谷川博己繼續耍帥賣萌，由於太作狀，每次出場冷笑時戲院內總會伴隨著觀眾的恥笑聲。水原希子演的米卡莎繼續與原著零相似，作為一個平行時空角色，表現令我無法置評。本鄉奏多飾演的阿爾敏（阿明）算係最正常，表現合格有餘但唔算出眾。有幾個配角明顯係為左劇情需要而死的，其中一個死既時候太煽情太誇張，大家喊唔出之餘反而會想笑出來。而一眾演員之中，演得最出色的始終都係石原里美，佢簡直係將原著中的韓吉神還原出來，令人印象深刻，無法挑剔。

特技方面，可能上集被人鬧得太勁，今集特技有明顯進步。當然唔好諗住同荷李活比，但以日本仔水平論，已經算係超額完成，始終係「大型特攝片」嘛。上集出現的劣質普通巨人，今集好少出現，而艾倫巨人同超大型巨人的CG效果可以接受。值得一提既係，今集仲多左個原創巨人，造型效果還可以，總之整體點都會好過上集的。大家可以放心。

至於劇情，我講過佢故事大致完整，有交代巨人點來等等謎團，亦有表達出原作者鞭撻「家畜之安寧」不思進取的心態，算係有明確主題。但你當佢係平行時空古仔就得，唔駛太大期望。因為電影憑空虛構左個艾倫阿哥出來，又三角戀又戰友自我犧牲又反政府組織密謀起義呢類劇情實在太老土。不過值得慶幸既係，今集節奏比上集明快得多，至少冇乜拖戲。猶記得上集係悶到幾乎訓著，今集緊湊左唔少，開頭用幾分鐘交代返上集提要之後劇情就全速展開，未到中段就解開左幾個主要謎團。而且大概因為最拖戲同最九唔搭八的角色已經響上集死鬼晒，所以今集睇起上來順左好多，舒服左唔少。

簡單而言，由於上集實在太差，觀眾好似被逼食左舊屎咁，所以當降低期望去睇下集時，會覺得忽然順眼、忽然緊湊、忽然好睇。實情係下集只不過係為爛透的上集補返個正常的尾，叫做可以接受咁解。不過個尾算係開放式結局，正如片尾艾倫所講，「現在才是開始」。片商如果無良起上來，其實仲可以繼續拍落去、繼續掠水的。

最後溫馨提示，完左字幕仲有一幕的，大家唔好錯過。

作者：Lunyeah

一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好，請多多讚好及分享～：）